1CO
1
Taa uussa
1 Bulus wa ɗahavant kiyava nǝg kǝ zǝr ɓǝlga Yesu Kǝristi dǝ naaga Daadamazhigǝl, ard zǝraabamiyam sastanis.
2 Da vak uudaha Daadamazhigǝl kwar ma kurinti, ard da vak lii ɗahavtǝrant kǝ gata Kǝristi Yesu, ǝmtad ɗǝ lii aandzu ta kwara kwar dzugazhǝgǝla ma ɗaaga yesu tlǝkatǝga yaazhigǝlamiyama, baz yaazhǝgilatǝra ard kǝmyam baɗǝmma.
3 Hɛrǝrra ard gabǝr vak Daadamazhigǝl Daadamiyam ard Yaazhigǝl Yesu Kǝristi da vakaruwa.
Tagghartag nǝ Bulus kǝ uus kǝ Daadamazhigǝla
4 Ən tagar uus kǝ Daadamazhigǝl ba kǝla hǝng kwakyarvad kuurama, aɗabad hɛrǝr vǝlakur nǝ iin tǝdvad Yesu Kǝristi.
5 Aɗaba tǝdvad iina, vǝlakurvǝlǝg nǝ uud kǝ hyahhǝr aandzu takwar kǝ gyaba, tǝdǝvad taa ghaiya ard sǝgasǝrgǝr baɗǝmma.
6 Bandkwa haiyavant nǝ shiidamnd tǝghǝr Kǝristi mataatakaruwa.
7 Mbakyarvad kwaha maay nǝ dǝgiti vǝlakurbi nǝ Daadamazhigǝl tǝdvad shǝkwan biya, bandkwam fa gyi nǝ uuram am paka saaya Yaazhigǝlamiyam Yesu Kǝristi.
8 Da fǝkurnaafǝg nǝ Yaazhigǝl kǝ ndzǝɗa tangw dat ghaala shifǝgaruwa, aɗaba am da nal kǝ lii maay dǝ haip ma sartǝn da saay nǝ Yaazhigǝl Kǝristi.
9 Daadamazhigǝl kwa ɗaahakurǝt da ɓa huɗir ǝmtad dǝ Zǝran Yesu Kǝristi Yaazhgǝlamiyama, uuda jiirjiir nǝ iina.
Tagwazhatagwazha ma lii gatǝga
10 Ən ghaalakuram zaarabahara, mbakyarvad ɗaaga Yaazhigǝl Yesu Kǝristi, haiyamanthaig dǝ zaraabaharuwa, aandz maay nǝ tagwazhatagwazh ma taatakaru biya, am dzant kǝ ghǝraru vak palla, dzamaghǝraru ndakwi vak palla.
11 Zaraabahara, aɗaba taghwatag nǝ lii ma hǝnyaha kuluwi taakiya, mǝng nǝ mbaɗaghai ma taatakaruwa.
12 Dǝgiti ǝn tlǝtlǝg nai, iin taakiya, ma kwararuwa taa dǝgaan shahha, kwan taakiya, “Ən dǝga Bulus naiya,” kwan taakiya,“Ən dǝga Afulus naiya, ” kwan taakiya “Ən dǝga Kefasa, ” kwan dlaɓa taakiya, “Ən dǝga Kǝristi naiya
13 Mbats tagwavǝmtagw nǝ tlǝkatǝg shahshaha? Əmtsaǝmtsǝg Bulus tǝ tlaɓa hǝrtǝg kwakyarvad kuurama? Nii ɓaga kuura dǝ ɗaaga Bulus ha nǝ-uud kǝ tsufǝgi?
14 Ən tagar uus kǝ Daadamazhigǝl ɓaganarai aandzu war makuuram kǝ tsufǝg biya, ba kiribus ard gayus.
15 Mbakyarvad kwaha maiy watag da tag takiya ɓagakuura dǝ ɗaagar nǝ uud kǝ tsuufǝg biya.
16 Dzamanadzamǝga ɓaganara ɓag ɗlab kǝ yaha istafanus kǝ tsuufǝga, ma juujǝg ba kǝ yaha Istafanusa maay nǝ uudahii tlǝr ɓagantǝra naiy biya.
17 Ɓǝlakutbi nǝ yesu mbakyarvad tsuufǝg biya, ɓǝlakut mbakyarvad taa ǝlbǝg marawa, ɗlaba dǝ dabariya uuda dǝg shig biya. Aɗaba aada pǝlwai nǝ nǝghǝgga ndangngǝra ǝmtsǝga yesu tǝ tlaɓa hǝrtǝg biya.
Tlǝkatǝga ndzǝɗa Daadamazhigǝla ard dabariyana
18 Əlbǝga hǝrtǝga, ǝlbǝga ghwaɗ nǝ iin vak lii gata duula ǝmtsǝga, aɗaba vaka miyamǝn katakiyamǝtkatǝg nǝ uudna,ǝlbǝga katǝga ndzǝɗa Daadamazhigǝla.
19 Aɗaba viinɗa viinɗan taakiya,“Ənda badzǝgaan kǝ dabariya lii taaki ar mǝng dǝ dabariya.”
20 Aitsa mǝr nǝ lii ɗǝ dabariyǝni? Ar mǝr nǝ lii taakiya ar tsaga adzahadzahi? Ar mǝr nǝ lii taakiya ar sǝrgasǝrg kǝ dǝgitah baɗǝmni? Mbats maradai nǝ Daadamazhigǝl taakiya, dyǝmdyǝma lii dǝ dabariya kwan kǝ duniya ba ɗlagǝr nǝ iina.
21 Aɗaba ma tag nǝ dabariya Daadamazhigǝla, uudaha duniya ar sǝrgai kǝ Daadamazhigǝl tǝdvad dabariya biya. Dlakulvakwaha, dzǝghakakadzǝrg nǝ Daadamazhigǝl kǝ lii da katǝg nǝ iin kwa fardǝghǝrtfǝg tǝ iin tǝdvad taa ǝlbǝg marawa kwa ma zharg nǝ uud maay nǝ tlǝrani.
22 Yahudaha ar na ma marvǝtǝrdan nǝ dǝga sǝrga, helenaha dlaɓa ar gata sǝrga dabariya.
23 Kǝm taa ǝlbǝg marawa tlǝkatǝga kwa ǝmtsan tǝ tlaɓa hǝrtǝga kwa nal kǝ ɗuula mbǝɗǝg kǝ yahudaha, ɗlaba dǝga dlagǝr vak lii ar yahudah biya.
24 Ndzǝɗa ard dabariya Daadamazhigǝl nǝ tlǝkatǝg da vak lii ar yahudaha ard kwa yahudah biya,
25 Adaɓa dǝgiti ma zharga nǝ uud mandki dlagǝr wa ɓaga nǝ Daadamazhigǝla, juujig kǝ dabariya uuda, dǝgiti ma tlatlǝg nǝ uud hǝtsalhǝtsǝg nǝ Daadamazhigǝla juujig nǝ iin kǝ ndzǝɗ uud baɗǝmma,
26 Dzamamnadzamǝg kǝ ndzǝganaru ma sartǝn ɗahakurt nǝ Daadamazhigǝla, ba kyǝkwah ma kuuram nǝ lii dǝ dyǝmdyǝma ma zharǝg nǝ uudaha, bakyǝkwah dlab makuuram nǝ lii hǝkya kwarǝg ɗyaka, bakyǝkwah nǝ zarha lii ɗyaɗyaka.
27 Kǝsghaakakǝsǝg nǝ Daadamazhigǝl kǝ dǝgiti tlatlǝg nǝ uud taakiya dlagǝra, adaba tsǝtǝra kǝ zhirw kǝ lii dǝ dabariya duniya, kǝsghaka kǝsǝg nǝ Daadamazhigǝl kǝ dǝgiti zharg nǝ uudah mandki hǝtsalhǝtsǝg nǝ iina, aɗaba tsǝtǝra ku zhiruw kǝ lii dǝ ndzǝɗa.
28 Dǝgiti kǝsghant nǝ uud mandki maay dǝ ndangbiya, aandzu maay tlǝraniya, aandzu kwa maay nǝ dǝgiti tukvakaibiya, iin wa ɓag nǝ Daadamazhigǝl kǝ tlǝr dǝvakai kiyava ɗlagnan kǝ dǝgiti zharg nǝ uud mandki mǝng tlǝrana.
29 Bagaɓag nǝ Daadamazhigǝl kwanahaan baɗǝmma haik naaghǝr kǝ uudaha dǝgshiga tǝvuukwa Daadamazhigǝla.
30 Daadamazhigǝl wa fafǝg kwa namal nǝ uuram kǝ dǝga tlǝkatǝg yesu, Daadamazhigǝl dlab wa haighant haig kǝ tlǝkatǝga nal kǝ dabariyamiyama. Tlǝyamkǝna tǝdvad iin nǝ miyam kǝ jira Daadamazhigǝla ard katǝgana.
31 Mbakyarvad kwaha, band kwa viindviidan ma kakaɗa Daadamazhigǝl taaki,“Baɗǝm dadda kwa tsa kusgha aa ɓag bat yaazhigǝla.”