10
1 «ዱሲ ታና ሳሌꬂዴስ፤
ታ ዴኢዛ ጫሞ ዴኦዛ
ቆንጬን ሲሳና።
2 ታኒ ጾሳ ሂዝጋና፤
ታ ቦላ ኔስ ላንጬይ ዲኮ
ታስ ቆንጪሳ ኣቲን
ታ ቦላ ፒርዶፋ!
3 ሃይሳ ሊኬ ኔ ታና ሜቶꬆይሲ
ኔስ ዎጋ?
ኔኒ ኔርካ ሜꬊዳ ኣሳ
ኔ ካꬋናስ ኔስ ቤሲዜ?
ኢታ ኣሳታ ዱላታይ
ኔና ኡፋይሲዜ?
4 ኔ ኣይፌይ ኣሳ ኣይፌ ማላ?
ዎይኮ ኔ ኣሳꬆ ጼላይ?
5 ኔ ዎዴቲ ኣሳይሳ ማላ?
ዎይኮ ኔ ላይꬃቲ
ኣሳ ላይꬃ ማላ ቃንꬄ?
6 ኣይስ ኔ ታ ቆሆዛ ጼላይ?
ኣይስ ኔ ታ ናጋራካ
ካላ ካላዳ ኣጎንታ ኢጻይ?
7 ታኒ ቆሆንታይሳኔ
ኔ ኩሼፔ ኦኒካ
ታና ኣሾንታይሳ ኔ ኤራሳ።
8 ታስ ሜꬋኔ ማላ
ኢሚ ሜꬊዳይ
ኔ ኩሼታ፤
ሂስቲን ሃኢ ሃ ኩሼቲ
ታና ዛሪ ላሊ ꬋይሳኔ?
9 ማና ሚሻ ማላ ኔ ታና
ቢታፌ ሜꬎይሳ ቆፓ፤
ሂስቲን ሃኢ ኔ ታና
ጉዱላ ማላ ሊቂሳኔ?
10 ታና ማꬃ ማላ ቲጋዳ፥
ሜቆ ማꬃ ማላ
ኢርኪሳ ኦꬃዳሳ።
11 ታ ኣሳቴꬃ ጋልባኒኔ
ኣሾን ካማዳሳ፤
ሜቄꬃኒኔ ሻያን
ጋꬃ ኦይꬃዳሳ።
12 ዴኦኔ ሜርና ሲቆ
ታስ ኢማዳሳ፤
ኔ ናጎይካ
ታ ኣያና ሚንꬂዴስ።
13 «ሄኮ ሃይታ ሃ ሚሻታ
ኔ ዎዚናን
ቆታ ዎꬃዳ ዳሳ፤
ኔ ቆፋይካ ሃይሳ ጊዲዳይሳ
ታ ኤራዲስ።
14 ታ ቆሂዳ ጊዲኮ
ኔ ኣይፌቲ ቤያና፤
ታ ናጋራ ጊሻስ
ታና ቃጻዮንታ ኣꬋካ።
15 ታ ናጋራ ኦꬂዳኮ
ኤሶራ ሜቶ ጊዶን ኩንዳና፤
ሎኦ ሚሽ ኦꬂዳ ጊዲኮካ
ጋላቴቲኬ፤
ታ ጊልቂን ዬላይ ታና ጋኪዴስ።
16 ታ ኦቶሬቲዳኮ
ኔ ታና ጋሞ ማላ
ሻንካታዳ ኦይካና፤
ኔ ታና ቆሃናስ
ዛራ ዛራ ሻንካታና።
17 ታ ቦላ ማርካቲዛ ኣሳታ
ኔ ኡባ ጋላስ ዴማና፤
ታ ቦላ ኔ ሃንቆይ
ጌዴ ዳሪ ዳሪ ባና፤
ኔኒ ታና ቆሃናስ
ኡባ ጋላስ ኦራꬃ ቆፋታ
ኦላ ኣሳታ ማላ
ታ ቦላ ዴንꬃሳ።
18 «ታ ጎዳ ጾሳዉ!
ኣይስ ታ ዬሌታና ማላ ኦꬃዲ?
ኦኒካ ታና ቤኦንታ
ታ ሃይቃይቺዳኮ
ሎኦኮሺን!
19 ታ ሜꬌቶንታ ኣታርኪና፤
ታኒ ታ ኣዬይ ኡሎፔ
ዱፎን ቢዳኮ
ታስ ሎኦ ጊዳናኮሺን!
20 ታ ዳና ላይꬃያ
ቃንꬅ ጊዴኬ?
ሄ ቃንꬃ ላይꬃይን
ጉꬃራ ታ ኡፋዬታና ማላ
ታና ኣጋርኪ!
21 ሄሲካ ታኒ ናምኣንꬆ
ሃ ሲማናስ ዳንዳዮንታ
ጊርዲ ጊዳ ꬉማሶ
ባናፔ ሲንꬃና።
22 ታ ባናሶዚ ꬉማ ኩዋይኔ
ሺሮይ ኩሚዳ ቢታ፤
ሄን ዲዛ ፖኦዚ ꬉማ ማላ።»