17
1 «ታ ኣያናይ ዳቡርዴስ፤
ታ ዳና ላይꬃይካ
ፖሌታናዉ ማቲዴስ፤
ዱፎይካ ታና ናጌስ።
2 ታና ቂꬊዛይቲ ታና ዩዪ ኣꬊዳ፤
ታ ኣይፌይካ
ኢስቲ ኢጺዛይሳ ጼሌስ።
3 ታ ጾሳዉ! ኔፔ ኣቲን
ታስ ኤቃናይ ሃራይ ዴና፤
ኔኒ ኔ ሁኤራ ታስ ዋሴ ጊዳ።
4 ኢስቲ ፒልጊዲ
ኣኬካናዉ ዳንዳዮንታ ማላ
ኢስታ ቆፋ ጎርዳዳሳ፤
ሄሳ ጊሻስ ኢስቲ
ጾናና ማላ ኦꬆፋ።
5 ሚሼ ዴማናዉ ጊዲ
ባ ላጌዛ ኣꬂ ኢሚዛ
ኣሳ ናይታ
ቦላ ጎሜይ ጋካና።
6 «ጾሲ ታና ኣሳስ
ካሳ ሚሽ ኦꬂዴስ፤
ኣሳይ ኢዛዴ ቦላ ጩቲዛ
ኣሳ ማላ ጊዳዲስ።
7 ኣፉንꬃፌ ዴንዲዳይሳን
ታ ኣይፌቲ ዶልጁሚዳ፤
ኩሜꬃ ታ ኣሳቴꬃይካ
ኤሾ ማላ ጊዲዴስ።
8 ጺሎ ኣሳቲ ሃይሳን ዳጋሜቲዳ፤
ጌሻቲ ጾሳ ኣማኖንታ
ኣሳታ ቦላ ሃንቄቲዳ።
9 ጊዶ ኣቲን ጺሎቲ ቱማ ኦጌፔ
ካሬ ኬኤቴና፤
ጌሻቲ ሚኖቴꬃ ቦላ
ሚኖቴꬂ ጉጄቴስ።
10 «ኢንቴ ኡባይካ ናምኣንꬆ ዪዲ
ታ ሲንꬃን ማርሼቲኮ፤
ኢንቴ ጊዶፌ ኢሲ ኣኬካራ ዲዛ
ኣስ ዴሚኬ።
11 ታ ላይꬃይ ዉሪዴስ፤
ታ ቆፋይኔ ታስ ዎዚና ኣሞይ
ሃዳ ጊዲ ኣቲዴስ።
12 ሃይቲ ሃ ኣሳቲ
ኦማርሳ ጋላስ ጌቴስ፤
ፖኦዛ ቃሴ ꬉማና
ሃኔስ ጌቴስ።
13 ሃይሳፌ ጉዬ ታስ ዲዛ ቃዳይ
ዱጌ ሃይቂዳ ኣሳቲ ዲዛሶ
ዱፎን ዎꬌꬃ፤
ያን ꬉማሶን ታኒ
ታ ሂጻ ኦንጋና።
14 ዱፎ፥ ‹ታ ኣዋዉ!›
ጋዳ ታ ጼይጋና፤
ታና ሚዛ ጉጹኔታ ታኒ፥
‹ታ ኣዬ፥ ታ ሚቼዬ!›
ጋዳ ጼይጋና።
15 ሂስቲን ታስ ኣይ ሂዶታይ ዲዜ?
ታስ ሂዶታ ጊዲዛ ሚሽ
ኦኔ ታስ ጼላናይ?
16 ታኒ ዱጌ ሲኦሌ ዎꬊሺን
ሂዶታይ ታናራ ኢሲፌ ዎꬋኔ?
ኢሲፌካ ዱጌ ዱፎን
ኑ ጌላኔ?»