23
ኢዮቤ ሃሳያ
1 ኢዮቢካ ሂዝጊ ዛሪዴስ፤
2 «ሃኢካ ታ ዎዚናይ
ጫሞ ቆፋኒኔ
ዙዙንꬃን ኩሚዴስ፤
ጌንጬጫን ታ ዎሲንካ
ኢዛ ኩሼይ ታ ቦላ
ዴጺዳ ማላ ዴስ።
3 ኢዚ ዲዛሶታ ኤሪዳኮ
ኣይ ማላ ዶሳዚናሺን፤
ጌዴ ኢዚ ዲዛሶ ጋኪዳኮ
ታ ኣይ ማላ ኡፋዬታኔሺን፤
4 ታ ማጋና
ታ ኢዛስ ሺሻናኮሺን፤
ታ ሚሻዛ ማራራ
ታ ኢዛስ ሺሻናኮሺን።
5 ታስ ኢሜቲዛ ዛሮዛካ
ታ ኤራናኮሺን፤
ታና ኢዚ ኣይ ጋናኮ
ታ ኤራናኮሺን።
6 ሂስቲን ጾሲ ባ ጊታ ዎልቃራ
ታና ፒርዳንዴሻ?
ኣካይ፤ ታ ጊዛይሳ ኢዚ ኤዝጋና።
7 ሄንካ ሱሬ ኣሲ
ኢዛራ ማርሼታና፤
ታስ ፒርዲዛ ጾሳይ
ሜርናስ ታና ናጻ ኬሳና።
8 «ጊዶ ኣቲን ታ ኣርሼይ ሞኪዛ ባጋ
ቢኮ ሄን ኢዚ ዴና፤
ኣርሼይ ዉሊዛ ባጋካ ሲሚኮ
ኢዛ ዴማናዉ ዳንዳይኬ።
9 ኢዚ ጊዲኮ ፑዴሃን
ባ ኦሳ ኦꬄስ፤
ታኒ ጊዲኮ ኢዛ ቤያናዉ
ዳንዳያቤኬ፤
ዱጌ ባጋ ሲማዳካ
ኢዛ ዴማናዉ
ዳንዳያቤኬ።
10 ኢዚ ታ ታንጎ ኡባ ኤሬስ፤
ታና ኢዚ ፓጪኮካ
ታኒ ዎርቃ ማላ ጌሽ ጊዳ ዲሺን
ኢዚ ታና ዴማና።
11 ታ ቶሆቲ
ኢዚ ዶሲዛ ኦጌታራ ቤቴስ፤
ባሌꬆን ሃዲርሲካ
ኡሻቺካ ጊኬ።
12 ታኒ ኢዛ ኣዛዞታፔ ኬኢኬ፤
ኢዛ ቃላካ
ታ ሚዛ ቁማፔካ ኣꬃዳ
ታ ዎዚናን ናጋዲስ።
13 «ኢዚ ባርካ ባና ዳንዳይ ዴስ፤
ኢዛራ ኤቄታናይ ዴና፤
ኢዚ ባ ዶሲዳይሳ ኡባ
ኦሶ ዳንዳዬስ።
14 ታ ቦላ ኢዚ ቆፒዳይሳ
ኡባ ፖላና፤
ሃይሳ ሚሳቲዛ
ዳሮ ቆፋቲ ዴቴስ።
15 ሄሳ ጊሻስ ኢዛ ሲንꬃን
ኤቆይ ኬሂ ያሼስ፤
ታ ሃይሳ ቆፓዳ ያያዲስ።
16 ጾሲ ታስ
ዎዚናይ ዳቡራና ማላ
ኦꬂዴስ፤
ኡባ ዳንዳይዛ ጾሳይ
ታና ዳጋንꬂዴስ።
17 ጊርዲ ጊዳ ꬉማይ
ታ ኣይፌታ ጎዚኮካ፤
ሳካና ꬉማይ ታ ሃሳዮንታ ማላ
ታና ዲጊቤና።