26
ኢዮቤ ሃሳያ
1 ኢዮቢ ሂዝጊ ዛሪዴስ፤
2 «ሃይሳ ኔ ሃሳዮይሳን
ዳቡራንቻታ ማዲዳ
ኔስ ሚሳቲዜ?
ቄሴይ ኣርጋጪዳዴ ሚንꬂዳ
ኔስ ሚሳቲዜ?
3 ኣꬎ ኤራቴꬂ ፓጪዳዴስ
ኔ ኣይ ዞሬ ኢማዲ!
ኣይ ኤራቴꬂካ
ኢዛዴስ ቆንጪሳዲ!
4 ሂስቲን ሃይሳ ኔ ሃሳያና ማላ
ኔና ማዲዳይ ኦኔ?
ኔ ሃሳያና ማላ
ኔና ዴንꬄꬂዳይ
ኦና ኣያና!»
5 «ዎልቃማ ዎጋ ጊታ ኣባፌ
ጋርሳን ዲዛ ሃይቂዳይታ ሼምፖቲ
ዎልቃማ ኮኮርሳን ዴቴስ።
6 ሲኦሌይካ ጾሳ ሲንꬃን
ቆንጬን ዴስ፤
ኣባዶኔ ጌቴቲዛሶዛ
ኣይ ሚሺካ
ካማናዉ ዳንዳዬና።
7 ጾሲ ፑዴሃ ባጋራ ዲዛ ሳሎዛ
ጫርኮ ቦላ ሚጪዴስ፤
ቢታካ ኣይኮይ ባይንዳሶን
ኩሎቲ ዳና ማላ ኦꬂዴስ።
8 ጾሲ ሻራቲ
ሃꬅ ጹንጺ ኦይካና ማላ ኦꬄስ፤
ሃꬃፌ ዴንዶይሳን
ሻራቲ ዳኬቴቴና።
9 ኢዚ ኡቲዛ
ካዎቴꬃ ኣራታ ጌንꬃና፤
ሻራራካ ካማና።
10 ፖኦኔ ꬉማ ሻካናስ
ዎልቃማ ዎጋ ጊታ ኣባ ሲንꬃን
ሳሎዛ ዛዋ ኦꬂዲ ሚጪዴስ።
11 ኢዚ ሃንቂዛ ዎዴ
ሳሎ ቱሳቲ ዳጋማን ኮኮሬቴስ።
12 ኢዚ ባ ዎልቃን ኣባ ጮኡ ኦꬄስ፤
ኢዛ ኣꬎ ኤራቴꬃይካ
ኤራኣቤ ጌቴቲዛይሳ ꬋይሳና።
13 ባ ፔኖዛን ሳሎዛ ጌሻና፤
ጾንጌቲዛ ሾሻ
ባ ኩሼን ጫዳና።
14 ሃይታንቲ ኡባይ
ጾሲ ኦꬂዛ ኦሶታፔ
ጉꬃታ፤
ኑ ሲዪዛይሲ ኢዛስ ሳሱኬꬅ ጻላ፤
ዎልቃማ ጊሪሳ ኢዛይሳ
ኦኒ ኣኬካናዉ ዳንዳይዜ?»