7
1 «ኣሳስ ቢታ ዱሳይ ባጼ ዱስ ዴኔ?
ኢስታስ ጋላሳይካ
ኡኔ ኦꬂዛ ኦሳንቻታ
ጋላሳ ማላ ጊዴኔ?
2 ኢስቲካ ኩዋ ጋርሳን ሼምፓናስ
ኣሞቲዛ ኦሳንቻታኔ
ባ ዳሞዛ ኤካናስ ናጊዛ
ኡኔ ኣሳ ማላ ጊዴቴኔ?
3 ታ ዳቡርዳ ኣጊናቲ ታስ
ጎኣይ ባይንዳይታ ጊዲዳ፤
ሜቶ ኦማርሳቲካ
ታስ ቆፋ ኦማርስ ጊዲዳ።
4 ኢቺዛ ዎዴ ኣዉዴ
ዴንዳንዲናሻ ጋዳ ቆፓይስ፤
ኦማርሳይካ ጊዲኮ
ታስ ጌዴ ኣዱቄስ፤
ታኒካ ዎንታና ጋካናስ
ሃ ሄ ሺሬታሼ ኣቃይስ።
5 ታስ ኩሜꬃ ኣሳቴꬃይ
ጉጹኔን ኩሚዴስ፤
ታስ ኣሾይካ ማዱንጺ ጎጊዴስ፤
ታስ ማዱንꬃይካ
ꬉቂዲ ኡዛዜስ።
6 ታ ላይꬃታ ጋላሳቲ
ዳꬃ ሞቄ ጾንጌꬃፌ
ኤሶቴቴስ፤
ኢሲ ሂዶታይ ባይንዳ
ዉርሴꬅ ጋኬቴስ።
7 ታ ጎዳዉ! ታ ሼምፖያ
ፔኖ ማላ ጊዲዳይሳ ቆፓ፤
ሃይሳፌ ጉዬ ኡባካ
ሎኦ ሚሽ ዴሚኬ።
8 ሃኢ ታና ቤኢዛይሲ
ናምኣንꬆ ዛሪዲ ቤዬና፤
ኢዚ ኮይዛ ጊዲኮካ
ታና ዴማናዉ ዳንዳዬና።
9 ሻራይ ላሌቲ ꬋይዛይሳ ማላ
ሃይቂዲ ዱፎን ቢዛ ኣሲ
ሃ ሲሚዲ ዬና።
10 ናምኣንꬆ ዛሪዲ
ባሶ ሲሜና፤
ኢዛዴ ኤሪዛይቲ ኡባይ
ኢዛ ባሌታና።
11 «ሃይሳፌ ጉዬ ጮኡ ጊኬ!
ታስ ኣያናይ ጬጪዳይሳፌ
ዴንዲዳይሳን ታ ሃሳያይስ፤
ታ ሼምፖያ ኢራዬቲዳ
ጊሻስ ዙዙማይስ።
12 ሃይሳ ሊኬ ናጌቲዛዴ
ኔ ታና ኦꬂዳይ ታኒ ኣባዬ?
ዎይኮ ኣባ ጊዶን ዲዛ
ዶኣዬ?
13 ታ ሂጻይ ታና ሚንꬄꬄስ፤
ታ ኢቺዛሶይ
ታ ሳኮዛ ባሌꬄስ
ጋዳ ታ ቆፓዲስ።
14 ኔኒ ጊዲኮ ታና
ኣጉሞን ያሺሳሳ፤
ኣጁታንካ ዳጋንꬃሳ።
15 ሃይሳ ሜቶይ ዳሪዳ ኣሳቴꬃ
ቶካዳ ዳናፔ
ታ ጩሌታ
ሃይቃናይሳ ዶራይስ።
16 ሂዶታ ቃንጻዲስ፤
ዳናስካ ታ ኮይኬ፤
ታስ ላይꬃይካ
ቃንꬅ ጊዲዳ ጊሻስ
ታና ኣጋጋ።
17 «ኔ ሶሆ ኢማናሲኔ
ቆፓናስ ኣሲ ኣዜ?
18 ዎንታን ዎንታን ፒልጋና ማላ፥
ዎዴን ዎዴንካ
ኔ ፓጫና ማላ ኣሲ ኣዜ?
19 ጩች ሚቲዛ
ጉꬃ ዎዴካ ታስ ኢሚኪ?
20 ኣሳ ካሌቲዛ ጎዳዉ!
ታኒ ናጋራ ኦꬆይሳን
ኔኒ ኣይ ቆሄታዲ?
ኣይስ ታ ቦላ ኔ ቶራ ዛራዲ?
ኣይስ ሃይሳ ኬና
ታ ኔና ዴጻዲና?
21 ኡባካ ታ ናጋራ ኣቶ ጊኪ?
ታ ኦꬂዛ ቆሆ
ታፔ ዲጊኪ?
ታ ዱፎን
ጌላና ዎዴይ ጋኪዴስ፤
ሃይሳፌ ጉዬ ኔ ታና
ኮዪዳኮካ ታ ቤቲኬ።»