101
ዳዊቴ ማዛሙሬ
1 ታኒ ኔ ሲቆ ጊሻሲኔ
ቱማ ፒርዳ ጊሻስ ዬጻና፤
ኣቤት ጎዳዉ!
ታኒ ኔስ ጋላታ ማዛሙሬ ዬጻና።
2 ታኒ ሱሬ ኦጌ ካላና፤
ኔኒ ታኮ ኣዉዴ ያኔ?
ታኒ ታ ኬꬃን
ሱሬቴꬃን ዳና።
3 ታኒ ታ ኣይፌራ
ኢታ ሚሽ ጼሊኬ፤
ጾሳፌ ካሬ ኬዚዳ ኣሳታ
ኦሶ ኢጻይስ፤
ታኒ ኢስታራ ሙሌካ ዙፔቲኬ።
4 ዎዚና ጌላቲ ታፔ ሃኬቶ፤
ኢታቴꬃራ ታስ
ጋይቶቴꬂ ዴና።
5 ጌማን ባ ላጌ ዚጊርዛይሳ
ታኒ ሲርጲ ኦꬃና፤
ኦቶሬቲዛይሲኔ ጬቄቲዛ ኣስ
ታኒ ጮኡ ጋ ኣጊኬ።
6 ኢስቲ ታናራ ዳና ማላ
ቢታ ቦላ ዴኢዛ
ኣማኔቲዛይታ
ታኒ ሎኦ ኣይፌን ጼላይስ።
ሱሬቴꬃን ሄሜቲዛ ኣሲ
ታስ ሃጋዛና።
7 ጪሞ ኦꬂዛይ ኦኒካ
ታ ኬꬃን ዴና፤
ዎርዶ ሃሳይዛይ
ታ ሲንꬃን ኤቄና።
8 ቢታን ዴኢዛ ኢታ ኣስ ኡባ
ታኒ ሃች ሃች ꬋይሳና፤
ኢታ ኦꬂዛይታ ኡባ
ታኒ ጎዳ ካታማፔ
ꬎቃላ ꬋይሳና።