108
ዳዊቲ ዬጺዳ ማዛሙሬ
1 ኣቤት ጾሳዉ!
ታ ዎዚናይ ሚኖ፤
ታኒ ኔስ ኩሜꬃ
ዎዚናፔ ዬጻናኔ
ኔና ሳባና።
2 ታ ዲꬂኔ ማሲንቆይ ዴንዲቴ!
ታኒካ ማላዶ
ዎንታራ ዴንዳና።
3 ኣቤት ጎዳዉ!
ታኒ ዴራ ጊዶን ኔና ጋላታና፤
ቃሴ ካዎቴꬃታ ጊዶን
ኔስ ሳባን ዬጻና።
4 ኔ ሲቆይ ጊታ፤
ሳሎታፔካ ኣꬌስ።
ኔ ኣማኔቴꬃይካ
ፑዴ ሳሎ ጋኬስ።
5 ኣቤት ጾሳዉ!
ሳሎታፔ ቦላራ
ꬎቁ ꬎቁ ጋ!
ኔ ቦንቾይ ቢታ ኡባ ጋኮ።
6 ኔኒ ሲቂዛይቲ ኣታና ማላ
ኔ ኡሻቻ ቄሴን ኑና ኣሻ፤
ታ ዎሳ ሲያ።
7 ጾሲ ባ ጌሻሶሆን ዲሼ፥
«ታኒ ጾናዳ
ሴኬሜ ቢታ ሻካና፤
ቃሴ ሱኮቴ ዙላ ጊሻና።
8 ጋላኣዴይ ታይሳ፤
ሚናሴይካ ታይሳ፤
ኤፍሬሜይ ታ ሁኤን
ዎꬂዛ ቢራታ ቆቤ፤
ዩሁዳይ ታ ካዎቴꬃ ጉፌ።
9 ሞኣቤይ ታስ ሜቻሶ፤
ኤዶሜይ ታይሳ
ጊዲዳይሳ ኤሪሳናስ
ታኒ ታ ጫማ
ኢዛ ቦላ ዎꬃይስ፤
ታኒ ፊሊስጼሜ ጾናዳ
ጌሬራይስ» ጊዴስ።
10 ጊምቤቲዳ ካታማኮ
ታና ኦኔ ኤፋናይ?
ኤዶሜ ጋካናስ
ታና ኦኔ ካሌꬃናይ?
11 ኣቤት ጾሳዉ!
ኑና ኣጊዳይ ኔና ጊዲኪ?
ኔኒ ኑ ኦላንቻታራ
ኬዚኬ ጋዳሳ።
12 ኣሳ ማዶይ ሃዳ፤
ሄሳ ጊሻስ ኑ ሞርኬታ ቦላ
ኑስ ጾኖ ኢማ።
13 ጾሲ ኑናራ ጊዲኮ
ኑኒ ሞርኬታ ጾናና፤
ኢዚ ኑ ሞርኬታ
ባ ቶሆን ዬꬋና።