112
1 ጎዳይ ጋላቴቶ!
ጎዳስ ያዪዛ ኣሲ፥
ኢዛ ኣዛዞታካ ፖላናስ
ኡፋዬቲዛ ኣሲ ኣንጄቲዳይሳ።
2 ኢዛ ናይቲ ቢታን ዎልቃማ ጊዳና፤
ሱሬ ኣሳታ ዬሌታይ ኣንጄታና።
3 ኣቆታይኔ ዱሬቴꬂ
ኢዛ ኬꬃን ዴስ፤
ኢዛ ጺሎቴꬃይካ
ሜርናስ ዴኣና።
4 ኪያ፥ ቃꬌቲዛኔ ጺሎ ኦꬂዛ
ሱሬ ኣሳስ ꬉማ ጊዶን
ፖኦይ ፖኤስ።
5 ኪያቴꬃን ጮ ታልኢዛ ኣሳስ፥
ባ ኦሶ ሱሬቴꬃን ኦꬂዛ
ኣሳስ ዴኦይ ኢንጄታና።
6 ጺሎ ኣሲ ኣዉዴኔ ኩንዴና፤
ሜርናስ ኢዚ ሃሳኤቲሼ ዴኣና።
7 ኢታ ሚሺ ኢዛ ዳጋንꬄና፤
ኣይስ ጊኮ ኢዛ ዎዚናይ ሂርጌና፤
ጎዳን ኣማኔቴስ።
8 ኢዛ ዎዚናይ ሚኖ፤
ሙሌካ ያዬና፤
ዉርሴꬃን ባ ሞርኬታ
ኩንዴꬅ ኢዚ ቤኣና።
9 ኢዚ ሂዬሳታስ ኪያቴꬃን ኢሜስ፤
ቃሴ ኢዛ ጺሎቴꬃይ
ሜርናስ ዴስ፤
ኢዛ ካጬይ ቦንቾን
ꬎቁ ꬎቁ ጋና።
10 ኢታ ኣሲ ሄሳ ቤኢዲ ዪሎቴስ፤
ባ ኣቻ ጋርጪሼ
ጮ ጊልቂ ꬋዬስ፤
ኢታታ ኣሞይ ሃዳ ጊዳና።