12
ዳዊቲ ዛማሬታ ካቦስ ኦስፑን ሻያን ዋጼቲዳ ዲꬃን ዬጺዳ ማዛሙሬ
1 ጎዳዉ! ሎኦ ኣሲ ቢታ ቦላፌ ዉሪዳ ጊሻስ
ኔ ታና ማዳርኪ፤
ዴራ ጊዶን ኣማኔቲዛ
ኣሲ ዴና።
2 ኢሶይ ኢሳስ ዎርዶ ሃሳዬስ፤
ኢሶይ ኢሳ ዶናን ጪሜቴስ፤
3 ኣቤት ጎዳዉ!
ባሌꬂዛ ዶና ጎርዳ፤
ኦቶሮን ሃሳይዛ
ኢንጻርሳታ ቃንጻ፤
4 ኢስቲ፥ «ኑኒ ኑ ኢንጻርሳን ጾናና፤
ኑ ዶናይ ኑሳ፤
ኑስ ጎዳይ ኦኔ?» ጌቴስ።
5 ጎዳይ፥ «ሂዬሳቲ ኡንኤቲዳ
ጊሻሲኔ
ሜቶታንቻታ ዋሶ ጊሻስ
ሃኢ ታኒ ዴንዳና፤
ታኒ ኢስቲ ኣሞቲዛ ሳሮቴꬃን
ኢስታ ዎꬃና» ጌስ።
6 ጎዳ ቃላይ ኢዛን
ዋላካይ ባይንዳ ሙሩታ፤
ጮጬ ታማን ላፑንቶ
ፓጬቲ ጌዪዳ ቢራ ማላ።
7 ኣቤት ጎዳዉ!
ኔኒ ኑና ሳሮቴꬃን ናጋ፤
ሃ ዎዴን ዲዛ ኢታ ዬሌታፔ
ሜርናስ ኔ ኑና ኣሻ።
8 ኣሳ ጊዶን ኢታይ
ቦንቼቲዳ ዎዴ
ጌላቲ ኡባ ዎዴ
ኦቶሬቴꬃን ሲሜሬቴቴስ።