141
ዳዊቴ ማዛሙሬ
1 ኣቤት ጎዳዉ!
ታኒ ኔና ጼይጋይስ፤
ታና ማዳናስ ኤሌላ።
ታኒ ኔኮ ዋሲዛ ዎዴ
ታ ዋሶ ሲያ!
2 ታ ዎሳይ ኤጻኔ ጩዋ ማላ
ኔ ሲንꬅ ሺቆ፤
ታኒ ታ ኩሼዛ ሚጪዛይሲ
ኔስ ኦማርሳ ዎዴ
ያርሾ ማላ ጊዶ።
3 ኣቤት ጎዳዉ!
ታ ዶና ናጋናስ
ዛቤ ዎꬃ፤
ታ ሜቴርሻታ ፔንጌን
ናጊዛይሳ ኤሳ።
4 ሞሮ ኦꬂዛ ኣሳታራ
ኢታ ኦሶ ኦꬆንታ ማላ
ታ ዎዚና ኢታኮ ዛሮፓ፤
ኢስታ ጊቢራካ ታና ሚዞፓ።
5 ጺሎ ኣሲ ታና ቃጻዮ፤
ሄሲካ ታስ ሎኦ፤
ኢዚ ታና ሴሪኮ
ሄሲ ታ ሁኤን
ዛይቴ ቲዪዛ ማላ፤
ሄሳካ ታ ኢጺኬ፤
ጊዶ ኣቲን ታኒ ኡባቶካ
ኢታ ኣሳታ ኦሶ ቦላ ዎሳይስ።
6 ኢስታ ዳናቲ
ኣፎራ ዱጌ ኦሌቲዛ ዎዴ
ታ ቃላይ ቱማ ጊዲዳይሳ
ኢስቲ ኤራና።
7 ጋዴይ ጎዬቲዛ ማላኔ
ጳሼይ ሊቂዛ ማላ
ኢስታ ሜቄꬂካ
ዱፎ ዶናን ላሌታና።
8 ኣቤት ጎዳዉ፥
ኡባፌ ዎልቃማ ጾሳዉ!
ታ ኣይፌይ ኔና ጼሌስ፤
ታ ዜምፖይ ኔና፤
ታና ሃይቆስ ኣꬃዳ ኢሞፋ።
9 ኢስቲ ታስ ዎꬂዳ
ዎጺማዴፔኔ
ኢታ ኦꬂዛይታ ጊቴፔ
ታና ናጋ።
10 ታ ሳሮ ኣꬊሺን
ኢስቲ ባንቲ ዎꬂዳ
ጊቴዛን ኦይኬቴቶ።