35
ዳዊቴ ዬꬃ
1 ኣቤት ጎዳዉ!
ታናራ ኤቄቲዛይታራ
ኔኒ ኤቄታ፤
ታናራ ኦሌቲዛይታራ ኔኒ ኦሌታ።
2 ጎንዳሌኔ ጹሩሬ ኦይካዳ፥
ታና ማዳናስ ዴንዳ።
3 ታና ዬዴꬂዛይታ ቦላን
ኔ ቶራኔ ማሻ ዴንꬃ።
ታና፥ «ታ ኔና ኣሺዛዴ» ጋ።
4 ታ ሼምፖዮ ዎꬋናዉ ኮይዛይቲ
ዬላቴቶኔ ካዉዬቶ፤
ታ ቦላ ኢታ ኦꬃና
ማቄቲዛይቲ
ካዉዪዲ ጉዬ ሲሜቶ።
5 ጎዳ ኪታንቻይ
ኢስታ ዬዴꬆ፤
ኢስቲካ ጫርኮ ሲንꬃን ዲዛ
ሱላ ማላ ጊዴቶ።
6 ጎዳ ኪታንቻይ ኢስታ ጎዶ፤
ኢስታ ኦጌይካ ꬉማኔ
ሃሊꬅ ጊዶ።
7 ጮ ታና ኦይካናዉ
ባንታ ናርጻ ዎꬂዳ፤
ቃሴካ ጮ ታና ኩንዲሳናስ
ኦላ ቦኪዳ።
8 ኢስቲ ቆፖንታ ዲሺን
ባሺ ኢስታ ቦላ ፑቱ ጎ፤
ኢስቲ ዎꬂዳ ዎጺማዴይ
ኢስታ ኦይኮ፤
ኢስቲ ኦላን ኩንዲ ꬋዬቶ።
9 ሄ ዎዴ ታኒ ጎዳን ኡፋዬታና፤
ኢዚ ኣሺዳ ጊሻስ
ታኒ ኡፋዬታና።
10 ታ ኩሜꬃ ኣሳቴꬃይ ኔና፥
«ኣቤት ጎዳዉ!
ቆሄቲዳይታ ቆሂዛይታ
ኩሼፔ ኣሺዛይ፥
ሂዬሳታኔ ሜቶታንቻታ
ቦንቂዛይታ ኩሼፔ ናጊዛይ
ሃራ ኔ ማላይ ኦኔ?» ጋና።
11 ኢታ ኣሳቲ ታ ኦꬆንታ ሚሻን
ታና ሞቲዳ፤
ታ ኤሮንታ ሚሻን ታ ቦላ
ዎርዶ ማርካ ማርካሲዳ።
12 ታና ቢዛሲዳ፤
ታ ሎኦ ኦꬆይሳ ኩሼ
ኢታ ዛሪዳ።
13 ጊዶ ኣቲን ታኒ
ኢስቲ ሃርጊዳ ዎዴ
ማቃ ማይኣዲስ፤
ታ ኣሳቴꬃ ጾማን
ዳቡርሳዲስ፤
ታ ዎሳስ ዛሮይ ꬋይዴስ።
14 ታ ኢሻስ ዎይኮ ታ ዳቦስ
ታ ሙዞቲዛ ማላ ሙዞታዲስ፤
ኣያ ሃይቂን ካዮቲዛ ኣሳ ማላ
ኬሃ ዬካዲስ።
15 ጊዶ ኣቲን ታኒ ꬉጴቲን
ኢስቲ ኡፋይሳን ኢሲ ቦላ ሺቂዳ፤
ሄ ጌኔ ኣሳቲ ታ ኤሮንታ ጋሶን
ታና ዋꬊዲ ኣጎንታ ኢጺዳ።
16 ኢስቲ ኢታ ኣሳቲ ቂꬊዛ ማላ
ታና ቂꬊዳ፤
ዪሎስ ባ ኣች ጋርጪዳ።
17 ኣቤት ጎዳዉ!
ኔኒ ኣዉዴ ጋካናስ
ታና ጮኡ ጋዳ ጼላኔ?
ኢስታ ኢታ ኦሳፔ ታና ኣሻ፤
ሃ ጋሞ ማላ ኣሳታፔ
ታ ኣልኦ ሼምፖዮ ዎꬃ ኤካ።
18 ሄ ዎዴ ጊታ ሺቆን
ታ ኔና ጋላታና፤
ጮራ ኣሳ ሺቆን ታ ኔና ሳባና።
19 ዎርዶራ ታና ሞርኪዛይቲ
ኡፋዬቶፌቶ፤
ታና ጮ ኢጺዛይቲ
ታ ቦላ ቂምኦቶፔቶ።
20 ኢስታ ዶናፔ
ሳሮ ሃሳያይ ኬዜና፤
ቢታን ጮኡ ጊዲ ዲዛ ኣሳታ ቦላ
ዮኦ ቃጼꬄቴስ።
21 ኢስቲ ባ ዶና ታ ቦላ ዶይዲ፥
«ሄኮ ቤኣ!
ኔ ኦꬆይሳ ኑኒ
ኑ ኣይፌን ቤኢዶስ» ጌቴስ።
22 ኣቤት ጎዳዉ!
ኔኒ ሃይሳ ቤያሳ፤
ሄሳ ጊሻስ ኔኒ ጮኡ ጎፓ፤
ታፔካ ሃኮፋ።
23 ኣቤት ጎዳዉ፥ ታ ጾሳዉ!
ታ ጊሻስ ኦሌታ፤
ዴንዳ፤ ቤጋ፤
ታ ዶና ጊዳዳ ሞቴታ።
24 ኣቤት ጎዳዉ ታ ጾሳዉ!
ኔ ጺሎቴꬃ ማላ ታስ ፒርዳ፤
ታ ሞርኬታካ ኡፋይሶፋ።
25 ኢስቲ ባንታስ፥ «ሃሹ፥ ሃሹ፥
ኑኒ ኑ ዎዚናን
ኣሞቲዳይሲ ፖሌቲዴስ፤
ኑኒ ኢዛ ሚቲዶስ»
ጋና ማላ ኦꬆፋ።
26 ታ ዋዬን ኡፋዬቲዛይቲ
ኡባይ ዬላቴቶኔ ካዉዬቶ፤
ታ ቦላን ኦቶሬቲዛይቲ
ዬላኔ ካዉሻቴꬅ
ማይኤቶ።
27 ታኒ ሻቱሚዛይሳ ዶሲዛይቲ
ኡፋዬቲዲ «ሃሹ!» ጌቶ፤
ኢስቲ ኡባ ዎዴ፥
«ባ ኣይሌዛ
ሳሮቴꬃን ኡፋዬቲዛ
ጎዳይ ꬎቁ ꬎቁ
ጎ» ጌቶ።
28 ጋላስ ኩሜꬅ ታ ኢንጻርሳይ
ኔ ጺሎቴꬂኔ ኔ ጋላታ ዮታና።