48
ቆሬ ናይታ ማዛሙሬ
1 ጎዳይ ጊታ፤
ኑ ጾሳ ካታማን
ጌሻ ዙማዛን
ጊታ ጋላታይ ኢዛስ ቤሴስ።
2 ቢታ ኡባስ ኡፋይስ ጊዲዳይ፥
ፑዴሃ ባጋራ ቤቲዛይ
ꬎቃኔ ሎኦ ጊዲዳ
ጺዮኔ ዙማይ
ዎጋ ካዎዛ ካታማ።
3 ሄ ካታማ ጊምቤዛ ጊዶን፥
ኢዚ ካታማይስ ኣሺዛ
ሚጻ ጊዲዳይሳ ቤሲዴስ።
4 ካዎቲ ባንታ ቶራንቻታራ
ኢሲፌ ሺቂዳ፤
ሂስቲዲ ጺዮኖ ኦላናዉ ዪዳ።
5 ጊዶ ኣቲን ኢዞ ቤኢዲ ማላሌቲዳ፤
ዳጋሚዲ ጉዬ ባቃቲዳ።
6 ኢስቲ ሄሳን ዴኢሺን
ኢስታ ያሻ ኮኮሪሲ ኦይኪዴስ፤
ሚጻይ ኦይኪዳ
ማጫሳ ማላ ሚጻቲዳ።
7 ኣርሼይ ሞኪዛሶ ባጋ
ዎልቃማ ጫርኮን ሜቂዛ
ታርሴሴ ማርካቤታ ማላ
ኢስታ ኮኮርሳዳሳ።
8 ኑኒ ሲዪዳ ማላካ፥
ኡባፌ ዎልቃማ
ጎዳ ካታማን፥
ኑ ጾሳ ካታማን
ኢዚ ኦꬂዳይሳ
ኑ ቤኢዶስ።
ጾሲ ሄ ካታማ ሜርናስ
ሚንꬂ ኤሳና።
9 ኣቤት ጾሳዉ፥
ኔ ኬꬃ ጊዶን
ኔ ሜርና ሲቆ ቆፖስ።
10 ኣቤት ጾሳዉ፥
ኔ ሱንꬃ ማላካ
ኔ ጋላታይ ሳኣ ጋጻ ጋኪዴስ፤
ኔ ኡሻቻ ኩሼይ
ጺሎቴꬃን ኩሚዴስ።
11 ኔ ፒርዳ ጊሻስ፥
ጺዮኔ ኣሳይ ኡፋዬቴስ፤
ዩሁዳ ካታማቲካ
ኡፋይሳን ሆምቦጬቴስ።
12 ጺዮኔ ዩሾን ሄሜቲቴ፤
ኢዚ ጊምቤታ ዩሾን
ያኔ ሃ ሲሜሬቲቴ፤
ኢዚ ሻኮታ ቆዲቴ።
13 ዪዛ ዬሌታስ ዮታና ማላ፥
ኢዚ ኣሆ ጊምቤዛ ኣኬኪቴኔ
ኢዚ ሚጻታ ጾሞሲቴ።
14 ኢንቴ፥ «ሜሪ ሜርናስ
ሃ ጾሳይ ኑ ጾሳ፤
ኑ ሃይቃና ጋካናስ
ኢዚ ኑና ካሌꬃና»
ጊዲ ዮቲቴ።