55
ዳዊቲ ሃሳኣን ሺሺዳ ጊንጾ፤ ዳዊቲ ዛማሬታ ካቦስ ዲꬃን ዬጺዳ ማዛሙሬ
1 ኣቤት ጾሳዉ! ታ ዎሳ ሲያ፤
ታ ሾቢሺን ቄሊ ጎፓ።
2 ኤዝጋ፤ ታ ዎሳ ሲያ፤
ታ ቆፋን ታ ኡንኤታዲስ፤
ማራጬይ ታስ ኮኮሪዴስ።
3 ታ ሞርኬቲ ማንዲን ሂርጋዲስ፤
ኢታ ኣሳቲ ቆሂን ዳጋማዲስ፤
ኢስቲ ታ ቦላ ሜቶ ኤሂዳ፤
ሃንቆን ዴንዲዲ ታና ሞርኪዳ።
4 ታ ዎዚናይ ሂርጌስ፤
ሃይቃናኮኔ ጊዛ ዳጋማይ
ታ ቦላ ዎꬊዴስ።
5 ያሺኔ ዳጋማይ ታና ኦይኪዴስ፤
ታ ኣሳቴꬃይ ኮኮሪዴስ።
6 ታኒ፥ «ታስ ሃራጴ ማላ
ቄፌይ ዲዛኮ
ፒራꬋ ባዳ ሼምፓና።
7 ታኒ ቤታ ባዳካ
ባዞን ዴኣና ሺን።
8 ታኒ ጎቴፔኔ ኡሾፔ ኣቲዛሶ
ኤሶታዳ ጋካና ሺን» ጋዲስ።
9 ኣቤት ጎዳዉ!
ታኒ ካታማይ ጊዶን
ኦሺኔ ጌኔ ቤያዲስ፤
ኢታታ ዞሬ ኔ ꬋይሳ፤
ኢስታ ቆፋካ
ቡላኬሬꬃ ዬጋ።
10 ኢታቲ ጋላሲኔ ቃማ
ካታማ ጊምቤዛ ቦላራ
ዩዬቴስ፤
ኢታቴꬂኔ ጌኔይ
ኢዚ ጊዶን ዴስ።
11 ባሺ ኢዚ ጊዶን ዴስ፤
ጌኔይኔ ጪሞይ
ኢዚ ዱቡሻታፔ ሻኬቴና።
12 ታ ሞርኬይ ታና ጫዪዳኮ
ታ ኢዛ ዳንዳያ ኣꬃናኮ፥
ታ ቦላ ጬቄቲዛይ
ታና ኢጺዛዴ
ጊዲዳኮ ታኒ ኢዛፔ ቆቴታና።
13 ጊዶ ኣቲን ሃይሳ ኡባ
ታ ቦላ ኦꬂዛይ ኔና፥
ታ ላጌዛ፥ ታ ዳቦዛኔ
ታ ሲቆዛ።
14 ኑኒ ኢሶይ ኢሳራ
ኡፋይሳን ሃሳዬቲዶስ፤
ኢሲፌካ ጾሳ ሶን
ሲሜሬቲዶስ።
15 ኢታቴꬂ ኢስታ ዎዚና
ጊዶን ዲዛ ጊሻስ
ታ ሞርኬታ ቦላ ቆፖንታ
ሃይቆይ ጋኮ፤
ሼምፖራ ፓጻ ዲሼ
ሞጌቴቶ!
16 ታኒ ጊዲኮ ታ ጾሳ ጼይጋይስ፤
ጎዳይ ታና ኣሼስ።
17 ማላዶ፥ ጋላሲኔ ኦማርስ
ታኒ ዋሳይሲኔ
ታ ሜቶ ኢዛስ ዮታይስ፤
ኢዚ ታ ቃላ ሲዬስ።
18 ዳሮቲ ታና ኤቄቲኮካ፥
ኢዚ ታና ኦላ ቶራፔ ኣሼስ።
19 ቤኒሶፌ ካዎቴꬃ ኣራታን
ኡቲ ዲዛ ጾሳይ
ታ ዎሳ ሲዪዲ
ባ ኦጌ ላሞንታይታኔ
ጾሳስ ያዮንታይታ
ካዉሻና።
20 ታ ላጌዚ ባ ሲቆታ ቦላ
ባ ኩሼ ዴንꬂዴስ፤
ኢስታራ ጫቄቲዳ
ጫቆ ቃላካ ላሊዴስ።
21 ኢዛ ዶናፔ ኬዚዛ ቃላይ
ኦይሳ ማላ፤
ጊዶ ኣቲን ኢዛ ዎዚናይ
ጫዲዛ ቶራ ማላ፤
ኢዛ ቃላቲ ዛይቴፔካ
ኣꬊ ሹጎ፤
ጊዶ ኣቲን ቃንጺዛ
ማሻ ማላ።
22 ኔ ሜቶ ጎዳ ቦላ ዎꬃ፤
ኢዚ ኔና ሚንꬂ ናጋና፤
ኢዚ ጺሎቲ
ኩንዳና ማላ ኦꬄና።
23 ኣቤት ጾሳዉ!
ኔኒ ጊዲኮ ኢታታ
ዱጌ ጪማ ኦላን ዬጋና።
ሱꬅ ጉሲዛይቲኔ
ባሌꬂዛይቲ
ባ ዳና ላይꬃስ
ባጋካ ዴቴና፤
ጊዶ ኣቲን ታኒ
ኔናን ኣማኔታይስ።