6
ዳዊቲ ዛማሬታ ካቦስ ኦስፑን ሻያን ዋጼቲዳ ዲꬃን ዬጺዳ ማዛሙሬ
1 ኣቤት ጎዳዉ! ዪሎን ታና ሴሮፓ፤
ዎይኮ ኔ ሃንቆን
ታና ቃጻዮፓ።
2 ኣቤት ጎዳዉ!
ታኒ ዳቡራንቻ ጊዲዳ
ጊሻስ ታና ማራ።
ኣቤት ጎዳዉ!
ታ ዎዚናይ ማዱንጺዳ ጊሻስ
ታና ፓꬃ።
3 ታ ሼምፖያ ኬሃ ኡንኤታዱስ፤
ሂስቲን ጎዳዉ!
ታና ማዳናስ
ኔኒ ኣዉዴ ጋካናስ ጋምኣኔ?
4 ኣቤት ጎዳዉ!
ኔኒ ሲማዳ ታና ኣሻ፤
ኔ ማሮቴꬃ ዳሮን
ታና ኬሳ ኤካ።
5 ሃይቂዳ ኣሲ ኦኒኔ
ኔና ቆፔና፤
ዱፎን ኔና ጋላቲዛይ ዴና።
6 ታ ጬጬን ጻላ ዳቡራዲስ፤
ኦማርስ ኦማርስ ታኒ ዬካሼ
ታ ሂጻ ጫጲሳይስ፤
ታ ቦርኮꬃካ
ታ ኣፉንꬃን ሙሲሳይስ።
7 ታ ኣይፌቲ
ዳሮ ኣፉንጺዳ ጊሻስ ዳቡርዳ፤
ታ ሞርኬታ ኡባ ጋሶንካ
ዴሞ ኢጺዳ።
8 ጎዳይ ታኒ ዬኪዛ ዬሆ
ሲዪዳ ጊሻስ፥
ኢንቴኖ ኢታ ኦꬂዛ ኡባቶ!
ታፔ ሃኪቴ።
9 ጎዳይ ታ ሾቤꬃ ቤኢዴስ፤
ታ ዎሳካ ሲዪዴስ።
10 ታ ሞርኬ ኡባቲ
ዬላታናኔ ዳጋማና፤
ቆፖንታ ካዉዪዲ ጉዬ ሲማና።