60
ሜስጴጾሚያኒኔ ኣራሜን ዲዛ ዴራራ ኦሌቲ ሲሚዲ ኢዮኣቤይ ማጺኔ ዙሌን ታማኔ ናምኡ ሺ ኤዶሜ ኣሳ ዎꬊዳ ዎዴ ቲሚርቴስ ዳዊቲ ዛማሬታ ካቦስ፥ «ጪሻ» ጌቴቲዛ ዲꬃ ጊጊሶን ሺሺዳ ማርካቴꬃ ዎሳ
1 ኣቤት ጾሳዉ!
ኔኒ ኑና ኣጋዳሳ፤
ኑና ሜንꬄሬꬃ ዬጋዳሳ፤
ኔኒ ኑና ሃንቄታዳሳ፤
ሃኢ ጊዲኮ ሲማዳ
ኑና ጊጊሳ።
2 ኔኒ ቢታዮ ቃꬃዳ ዛኢሳዳሳ፤
ኢዛ ኮኮሪዛ ጊሻስ
ኔኒ ኢዚ ዛኣ ኩንꬃ።
3 ኔኒ ኔ ኣሳ ሜቶ ቤሳዳሳ፤
ኔኒ ኑና ማꬆሲዛ
ዎይኔ ኡሹ ኡሻዳሳ።
4 ኔስ ያዪዛይቲ ባንታ ሞርኬታ
ዎንዳፌፔ ኣታና ማላ
ማላታ ኢማዳሳ።
5 ኔኒ ሲቂዛይቲ ኣታና ማላ
ኔ ዎልቃን ኑና ኣሻ፤
ኔኒ ኑኮ ኣላ።
6 ጾሲ ባ ኬꬃን ዲሼ፥
«ታኒ ጾናዳ ሴኬሜ
ቢታ ሻካና፤
ቃሴ ሱኮቴ ሾባ ጊሻና።
7 ጋላኣዴይኔ ሚናሴይ ታይታ፤
ኤፍሬሜይ ታስ ሁኤ ቆቤ፤
ዩሁዳይ ታስ ካዎቴꬃ ጉፌ።
8 ሞኣቤይ ታ ሜጬቲዛሶ፤
ኤዶሜይ ታስ ጫማ
ዎꬂዛሶ፤
ታኒ ፊሊስጼሜ
ጾናዳ ጌሬራና» ጊዴስ።
9 ጊምቤቲዳ ካታማኮ
ታና ኦኔ ኤፋናይ?
ኤዶሜ ጋካናስ
ታና ኦኔ ካሌꬃናይ?
10 ኣቤት ጾሳዉ!
ኑና ኣጊዳይ ኔና ጊዲኪ?
«ኔኒ ኑ ቶራንቻታራ
ኦላስ ኬዚኬ» ጋዳሳ።
11 ኣሳፔ ጊዲዳ ማዶይ ሃዳ፤
ሄሳ ጊሻስ ኑ ሞርኬታ ቦላ
ኑስ ጾኖ ኢማ።
12 ጾሳ ዎልቃን ኑ ሞርኬታ
ኑኒ ጾናና፤
ኢዚ ኑ ሞርኬታ ዬꬌታና።