64
ዳዊቲ ዛማሬታ ካቦስ ዬጺዳ ማዛሙሬ
1 ኣቤት ጾሳዉ!
ታ ማጋና ኔኒ ሲያ፤
ታ ሼምፖዮ
ዎꬋናስ ማንዲዛ
ታ ሞርኬታፔ ታና ኣሻ።
2 ፓላ ኣሳታ ማቆፌኔ
ማካላንቻታ ዱላታፔ
ታና ጌንꬃ።
3 ኢስቲ ባንታ ኢንጻርሳ
ማሻ ማላ ሌፊዳ፤
ቃሴ ማርዜ ቃላታ
ዎንዳፌ ዪሻ ማላ
ዱካናስ ጊግሲዳ።
4 ኢስቲ ቆቴቲዲ ባንታ ዎንዳፌን
ጺሎ ኣስ ዱኬቴስ፤
ኣሲ ኣኬኮንታ ዲሺን
ዱካናስ ጉዬ ጌቴና።
5 ኢስቲ ኢታ ኦꬃናስ
ኢሶይ ኢሳራ ማቄቴቴስ፤
ጌማራ ዎጺማዴ
ዎꬃናስ ዞሬቴቴስ፤
ኢስቲ፥ «ኑና
ኦኒ ቤኣኔ?» ጌቴስ።
6 ኢስቲ ጌኔ ማቄቲሼ፥
«ኑኒ ሎኦ ማቆ
ማቄቲዶስ» ጌቴስ፤
ሄሲካ ኣሳ ዎዚናይኔ ካሃይ
ኢታን ኩሚዳይሳ ቤሴስ።
7 ጊዶ ኣቲን ጾሳይ
ኢስታ ባ ዪሻን ዱካና፤
ኢስቲ ኣኬኮንታ ማዱንꬃና።
8 ኢዚ ኢስቲ ሃሳይዳ ቃላ
ኢስታ ቦላ ዛራና፤
ኢስታካ ባሻን ጋꬃና፤
ኢስታ ቤኢዳ ኡባይ
ኣሙሲዲ ሁኤ ቃꬃና።
9 ሄ ዎዴ ኣሳይ ኡባይ
ጾሳስ ያያና፤
ጾሳ ኦሶ ቆንጬን ዮታና፤
ኢዚ ኦꬂዳይሳካ
ዩሺ ቆፓና።
10 ጺሎቲ ጎዳን ኡፋዬቴቶ፤
ኢዛካ ባስ ባቃቲ
ኣቲዛሶ ኦꬄቶ፤
ዎዚና ሱሬቲ ኡባይ
ኢዛ ጋላቴቶ።