66
ዛማሬታ ካቦስ ዬጼቲዳ ማዛሙሬ
1 ሳኣን ዲዛ ኣስ ኡባይ
ኢንቴ ቃላ ꬎቂሲዲ
ኢሊሊሳን ጾሳ ጋላቲቴ።
2 «ጾሳ ሱንꬂ ቦንቼቶ!»
ጊዲ ዬጺቴ፤
ቦንቾ ጋላታ ኢዛስ ኢሚቴ።
3 ጾሳስ፥ «ኔ ኦሶቲ
ኣይ ኬና ማላሊሲዞ!
ኔ ዎልቃይ ዳሮ ጊዲዳ ጊሻስ
ኔ ሞርኬቲ ያሻን
ኔ ሲንꬃን ኮኮሬቴስ።
4 ሳኣን ዲዛ ኡባይ
ኔስ ጎይኔስ፤
ኔና ሳቤስ፤
ኔ ሱንꬃስ ጋላታ ማዛሙሬ
ዬጼስ» ጊቴ።
5 ሃ ዪቴ፤
ጾሲ ኦꬂዳዝ ቤኢቴ፤
ኢዚ ኣሳ ጊዶን ማላሊሲዛ
ኦሶ ኦꬂዴስ።
6 ኢዚ ኣባ ሃꬃ ሻኪዴስ፤
ቃሴ ቤኒ ኑ ኣዋቲ
ሻፋራ ሜላ
ቢታራ ቶሆን ፒኒዳ፤
ኑኒካ ኢዚ ኦꬂዳ
ኦሶን ኡፋዬቲዶስ።
7 ኢዚ ባ ዎልቃን ሜርናስ ሃሬስ።
ካዎቴꬃታ ኡባካ
ባ ኣይፌን ጼሌስ፤
ሄሳ ጊሻስ ማካሊዛይቲ
ኢዛ ቦላ ꬎቁ ꬎቁ
ጎፔቶ።
8 ኣሳዉ! ኑ ጾሳ ጋላቲቴ፤
ኢንቴ ጋላታ ጬንጉርሳይ ሲዬቶ።
9 ኢዚ ኑና ሼምፖራ
ፓጻ ዎꬂዴስ፤
ኑኒ ኩንዶንታ ማላካ
ናጊዴስ።
10 ኣቤት ጾሳዉ!
ኔኒ ኑና ፓጫ ጼላዳሳ፤
ቢራ ሴሪሲ ጌሺዛ ማላ
ኑና ጌሻዳሳ።
11 ኔኒ ኑና ዎጺማዴን
ጌልꬃዳሳ፤
ኑ ዞኮንካ
ዴጾ ባኦ ባኢሳዳሳ።
12 ኑ ሞርኬቲ
ኑና ሁኤራ ዱጌ
ዬꬋና ማላ ኦꬃዳሳ፤
ኑኒ ሃꬃ ጊዶራኔ
ታማ ጊዶራ ካንꬂዶስ፤
ጊዶ ኣቲን ሃኢ ኑና
ኢሻሎ ሶሆ ኤሃዳሳ።
13 ታኒ ጹጌቲዛ ያርሾራ
ኔ ጌሻሶሆ ጌላዳ
ታ ኣዲና ኔስ ጋꬃና።
14 ታኒ ሜቶቲዳ ዎዴ
ታ ዶናፔ ታ ኬሲዳይሳ
ታ ኢንጻርሳን ታ ኣዲኔቲዳ
ኣዲና ታ ጋꬃና።
15 ታኒ ኔስ ጹጌቲዛ ያርሾስ
ሞꬎታ ሺሻና፤
ሳዎ ያርሾስ ꬋርሾታ፥
ኮርማታኔ
ኮርቤታ ሺሻና።
16 ኢንቴኖ ጾሳስ ያዪዛይቶ!
ኡባቲ ሃ ዪዲ ሲዪቴ፤
ጾሲ ታስ ኦꬂዳይሳ
ታኒ ኢንቴስ ዮታና።
17 ታ ቃላ ꬎቁ ሂስታዳ
ታኒ ኢዛኮ ዋሳዲስ፤
ታ ኢንጻርሳንካ ኢዛስ
ጋላታ ሺሻዲስ።
18 ታኒ ታ ዎዚናን ናጋራ
ጌንꬂዳኮ፥
ጎዳይ ታ ዎሳ ሲዬና።
19 ጊዶ ኣቲን ጾሲ ቱማፔ
ታስ ሲዪዴስ፤
ታ ዎሳካ ኤዝጊዴስ።
20 ታ ዎሳ ካꬎንታ፥
ባ ሜርና ሲቆ
ታፔ ሃሶንታ
ጾሳይ ጋላቴቶ።