79
ኣሳፌ ማዛሙሬ
1 ኣቤት ጾሳዉ!
ካዎቴꬃቲ
ኔ ቢታ ዎራጂዳ፤
ጌሻ ጊዲዳ
ጾሳ ኬꬃ ቱኒሲዳ፤
ዬሩሳላሜ ላሊ ዬጊዳ።
2 ኢስቲ ኔ ኣይሌታ ኣሃ
ሳሎ ካፎታስ
ቁማ ኦꬂዲ ኢሚዳ፤
ቃሴ ኔ ጌሻ ኣሳታ ኣሾ
ሳኣ ዶኣታስ ኢሚዳ።
3 ኢስታ ሱꬅ ዬሩሳላሜ ዩሾን
ሃꬃ ማላ ጉሲዳ፤
ኢስታ ኣሃ
ሞጊዛ ኣሲ ꬋይዴስ።
4 ኑ ሾሮታስ ኑኒ ቂልጫስ ጊዲዶስ፤
ኑ ሄራን ዲዛይታስ ቂꬌሲኔ
ሚቻስ ኣቲዶስ።
5 ኣቤት ጎዳዉ!
ሃይሲ ኣዉዴ ጋካናስ
ሃናኔ?
ኔኒ ሜርናስ ሃንቄታኔ?
ኔ ቃናቴይ ታማ ማላ
ኤጺሼ ዴኣኔ?
6 ኔና ኤሮንታ ዴሬታ ቦላኔ
ኔ ሱንꬃ ጼይጎንታ
ካዎቴꬃታ ቦላ
ኔ ሃንቆዛ ጉሳ።
7 ኣይስ ጊኮ ኢስቲ
ያቆቤ ዜሬꬃታ
ዎꬊዳኔ
ኢስቲ ዴኢዛሶዚካ
ሙሌራ ꬋይሲዳ።
8 ካሴ ኑ ኣዋታ ናጋራ
ኑ ቦላ ቆዶፓ፤
ኤሶን ኔ ማሮታ ኑስ ኪታ፤
ኣይስ ጊኮ
ኑኒ ኬሂፔ ሜቶቲዶስ።
9 ኣቤት ኑና ኣሺዛ ጾሳዉ!
ኔ ሱንꬃ ቦንቾ ጊሻስ
ኑና ማዳ፤
ኔ ሱንꬃ ጊሻስ ኑና ኣሻ፤
ኑ ናጋራካ ኣቶ ጋ።
10 ካዎቴꬃቲ፥ ኣይስ «ኢስታ ጾሲ
ኣዋን ዲዜ?» ጋኔ?
ኔ ኣይሌታ ሱꬅ
ኢስቲ ጉሲዳይሳ
ኔኒ ሃሎ ኬሲዛይሳ
ኑ ኣይፌይ ቤኢሺን
ካዎቴꬃታ ኤሪሳ።
11 ቃሾ ኣሳታ ኦሌይ
ኔ ሲንꬅ ጋኮ፤
ሃይቆስ ፒርዴቲዳይታ
ኔ ሚኖ ቄሴን ኣሻ።
12 ኣቤት ጎዳዉ!
ኑ ሾሮቲ ኔና ቂꬊዳይሳ
ሃሎ ላፑን ኩሼ ኢስታስ ዛራ።
13 ሄ ዎዴ ኑኒ ኔ ዴሬቲኔ
ኔስ ዉዴ ዶርሳቲ
ሜርናስ ጋላታ ኔስ ኢማና፤
ዬሌታፔ ዬሌታ ጋካናስ
ኔኒ ኑስ ኦꬂዳ ኦሶዛ
ኑ ዮታና።