81
ኣሳፌይ ዛማሬታ ካቦስ ሱሱልኤን ዬጺዳ ማዛሙሬ
1 ኑስ ዎልቃ ጊዲዳ
ጾሳስ ኡፋይሳን ዬጺቴ፤
ያቆቤ ጾሳስ ኢሊሊቴ!
2 ማዛሙሬ ዶሚቴ፤
ካራቤ ባቂቴ፤
ዲꬃኒኔ ማሲንቆን
ሎኦ ማዛሙሬ ዬጺቴ።
3 ኣጊናይ ጼሪዛ ዎዴኔ
ꬉማን ጌሊዛ ዎዴ
ባኣሌስ ዛዬ ፑኒቴ።
4 ሃይሲ ኢስራኤሌስ ዎጋ፤
ያቆቤ ጾሳይ ኢሚዳ ኣዛዞ።
5 ጊብጼ ቢታ ኢዚ ዬዲ ኬዚዳ ዎዴ
ዮሴፌ ዛሬታስ
ዎጋ ሂስቲ ዎꬂዴስ፤
ታኒ ኤሮንታ ቃላራ ኢዚ ታስ፥
6 «ኢንቴ ሃሼፔ ቶሆ ዎꬃዲስ፤
ኢንቴ ኩሼ ዴጾ
ጎሾፔ ሼምፒሳዲስ።
7 ኢንቴ ሜቶ ዎዴ
ታና ጼይጊዴታ፤
ሂስቲን ታኒ ኢንቴና ኣሻዲስ፤
ታኒ ሻራ ጊዶራ ዳዳን
ኢንቴና ኣላዲስ፤
ማሪባ ጌቴቲዛ
ፑልቶ ሃꬃ ማታን
ታኒ ኢንቴና ፓጫዲስ።
8 «ታ ዴሬዞ!
ታኒ ኔና ሴሪዛይሳ ሲያ!
ኢስራኤሌ ኣሳዉ!
ኔ ታና ኤዝጋ ሲዪዳኮ
ኣዜ ዲዛይ!
9 ኢንቴ ጊዶን ኣላጋ ጾሲ ዶፖ፤
ሃራ ጾሳስ ጎይኖፍቴ።
10 ታኒ ጎዳ ኢንቴ ጾሳ፤
ኢንቴና ጊብጼ ቢታፌ ኬሳዳ
ኤሂዳይ ታና ኢንቴ ጎዳ፤
ኔ ዶና ኬሃ ሃንጋ፤
ታኒ ኔና ቱꬃና።
11 «ጊዶ ኣቲን ታ ኣሳቲ
ታ ቃላ ሲዪቤቴና፤
ኢስራኤሌቲ ታስ
ኩሼ ኢሚቤቴና።
12 ሄሳ ጊሻስ ታኒ
ኢስቲ ባ ዎዚና
ሙሜቴꬃꬆ
ባ ዶሶይሳ ሃናና ማላ
ኣጋጋዲስ።
13 «ታ ዴሬይ ታና ሲዪዳኮ!
ኢስራኤሌ ኣሳይ
ታ ኦጌ ካሊዳኮ!
14 ታኒ ኢስታ ሞርኬታ
ኢስታስ ጉልባቲሳና፤
ኢስታ ባሊጋራታካ
ታ ሾጫናኮሺን።
15 ጎዳ ኢጺዛይቲ
ኢዛ ሲንꬃን ኩንዳና፤
ኢስቲ ሜርናስ ቃጻዬታና።
16 ጊዶ ኣቲን ታኒ ኢንቴና
ሙሩታ ጊስቴ ሚዛና፤
ቃሴ ዛላፌ ኢንቴና
ኤስ ካልሳና» ጊሺን ሲያዲስ።