86
ዳዊቴ ዎሳ
1 ኣቤት ጎዳዉ!
ታኒ ሂዬሳኔ ሜቶታንቻ
ጊዲዳ ጊሻስ
ታ ዋሶዛ ሲያዳ
ታስ ዛሮ ኢማ።
2 ታኒ ኔስ ዱማ ኣስ ጊዲዳ ጊሻስ
ኔ ታ ሼምፖ ናጋ፤
ኔኒ ታ ጾሳ፤
ኔናን ኣማኔቲዛ
ኔ ኣይሌዛ ታና ኣሻ።
3 ኣቤት ጎዳዉ!
ኩሜꬃ ጋላስ
ታ ኔኮ ዋሲዛ ጊሻስ
ኔ ታና ማራ።
4 ኣቤት ጎዳዉ!
ታኒ ዎዚናፔ
ኔና ዎሲዛ ጊሻስ
ታና ኔ ኣይሌዛ ኡፋይሳ።
5 ኣቤት ጎዳዉ!
ኔኒ ኑስ ኪያኔ
ኣቶ ጊዛዴ፤
ኔና ዎሲዛ ኡባስ
ኔ ሜርና ሲቆ ቤሳሳ።
6 ኣቤት ጎዳዉ!
ታ ዎሳ ሲያ፤
ታ ሾባ ዎሲዛይሳ ኤዝጋ።
7 ኔ ታስ ዛሮ ኢሚዛ ጊሻስ
ታኒ ሜቶ ጋላሳን
ኔኮ ዋሳይስ።
8 ኣቤት ጎዳዉ!
ኔ ማላይ ጾሳታ ጊዶን ባዋ፤
ኔ ኦሶራ ጊናቲዛ
ኦሶይካ ዴና።
9 ኣቤት ጎዳዉ!
ኔኒ ሜꬊዳ
ካዎቴꬃይ ኡባይ
ኔኮ ዪዲ ኔስ ጎይናና፤
ኔ ሱንꬃካ ቦንቻና።
10 ኔኒ ጊታ፤
ማላሊሲዛ ሚሽ ኦꬃሳ።
ኔኒ ጻላ ጾሳ።
11 ኣቤት ጎዳዉ!
ታኒ ኔ ቱማን ባና ማላ
ታና ኔ ኦጌ ታማርሳ፤
ታኒ ኔ ሱንꬃስ ያያና ማላ
ታስ ኢሲ ዎዚና ኢማ።
12 ኣቤት ጎዳ ታ ጾሳዉ!
ታኒ ኔና
ታ ኩሜꬃ
ዎዚናፔ ጋላታና፤
ኔ ሱንꬃካ
ሜርናስ ቦንቻና።
13 ኣይስ ጊኮ ኔ ታና ቤሲዳ
ሜርና ሲቆይ ኬሂ ጊታ፤
ኔኒ ታ ሼምፖዮ
ዱፎፔ ኣሻዳሳ።
14 ኣቤት ጾሳዉ! ኦቶራንቻቲ
ታ ቦላ ዴንዲዳ፤
ታና ዎꬋና ኮዪዲ
ፓንጋቲ ዱላቴቴስ፤
ኔና ዉዳንካ ዬጊቤቴና።
15 ጊዶ ኣቲን ኣቤት ጎዳዉ!
ኔኒ ቃꬌቲዛዴኔ
ማሪዛ ጾሳ፤
ሃንቄታናስ ጋምኢዛ ጾሳ፤
ኔ ሲቆይኔ ኔ ኣማኔቴꬃይ
ኬሂ ዳሮ።
16 ታኮ ሲማዳ ታስ ቃꬌታ፤
ታስ ኔ ኣይሌዛስ ዎልቃ ኢማ፤
ኔ ኣይሌይ ናዛ ታና ኣሻ።
17 ኣቤት ጎዳዉ!
ኔ ታና ማዲዛይሳኔ
ሚንꬄꬂዛይሳ
ታና ኢጺዛይቲ ቤኢዲ
ዬላታና ማላ
ኔ ኪያቴꬃ ማላታ ታና ቤሳ።