88
ኢዝራኤሌ ኣስ ኤማኔይ ሶሬን ሺሺዳ ጊንጾ ቆሬ ናይቲ ዛማሬታ ካቦስ ዲꬃ ጊጊሶን ዬጺዳ ማዛሙሬ
1 ኣቤት ጎዳዉ!
ታና ኣሺዛ ጾሳዉ!
ታኒ ጋላሲኔ ኦማርስ
ኔ ሲንꬃን ዬካይስ።
2 ታ ዋሶይ ኔ ሲንꬂ ጋኮ፤
ኔ ሃይꬅ ታ ዎሳኮ ዛራ።
3 ኣይስ ጊኮ ታ ዴኦይ
ሜቶን ኩሚዴስ፤
ታኒ ሃይቃና ማታዲስ።
4 ታኒ ዱፎን ጌሊዛ
ኣሳታራ ቆዴታዲስ፤
ዎልቃይ ባይንዳ ኣስ ጊዳዲስ።
5 ታኒ ኣሃታ ጊዶን
ኦሌቲዳ ኣሳ ማላ፥
ሃይቂዲ ዱፎን ሞጌቲዳ
ኣሃ ማላ፥
ታኒ ኡባካ
ኔኒ ዶጊዳ ኣሳ ማላኔ
ኔ ማዶፔ ዱጺዳ
ኣሳ ማላ ጊዳዲስ።
6 ኔኒ ታና ጪማ ኦላን፥
ዱጌ ꬉማ ሶሆን ዬጋዳሳ።
7 ኔ ሃንቆይ ታና ዴጼስ፤
ኔ ሃንቆዛ ዳምባላይ
ታና ሙሌራ ሚቲዴስ።
8 ኔኒ ታ ላጌታ ታፔ ሃሳዳሳ፤
ኢስቲ ታና ሹኔታና ማላ
ኦꬃዳሳ፤
ታና ጊዶꬂዳ፤
ኬሳ ኤካናዉካ ዳንዳይኬ።
9 ኣቤት ጎዳዉ!
ካዮ ጋሶን ታ ኣይፌቲ ዶልጁሚዳ፤
ኡባ ጋላስ
ታኒ ኔኮ ዋሳይስ፤
ታ ኩሼታካ ኔኮ ሚጫይስ።
10 ኔኒ ሃይቂዳይታስ
ማላሊሲዛ ሚሽ ኦꬃይ?
ኢስቲ ዴንዲዲ ኔና ጋላታኔ?
11 ኔ ሜርና ሲቆይ ዱፎን
ኔ ኣማኔቴꬃይካ
ባሻሶን ዮቴቲዜ?
12 ኔ ማላሊሲዛ ኦሶይ
ꬉማን ኤሬቲዜ?
ዎይኮ ኔ ጺሎቴꬃይ
ዶጌቲዳ ኣሳታ ቢታን ቤታኔ?
13 ኣቤት ጎዳዉ!
ኔኒ ታና ማዳና ማላ
ታ ኔኮ ዋሳይስ፤
ማላዶ ማላዶ ታ ዎሳይ
ኔ ሲንꬅ ጋኮ።
14 ኣቤት ጎዳዉ!
ኔኒ ታና ኣይስ ኢጻይ?
ኔ ሲንꬃ ታፔ
ኣይስ ጌንꬃይ?
15 ዬላጋቴꬃሶፌ ዶማዳ፥
ታኒ ቱጋታዲሲኔ
ሃይቃና ማታዲስ፤
ኔኒ ታና ዳጋንꬂን
ሂዶታ ቃንጻዲስ።
16 ሱሊዛ ኔ ሃንቆይ
ታ ቦላ ጋኪዴስ፤
ባቢሲዛ ኔ ሃንቆይ
ታና ꬋይሲዴስ።
17 ኢስቲ ኩሜꬃ ጋላስ
ዲኦ ሃꬃ ማላ
ታና ጊዶꬂዳ፤
ኢሲ ቦላ ጊዲዲ
ታና ዶዲ ኦይኪዳ።
18 ኔኒ ታ ላጌታኔ
ታ ሲቆታ ታፔ ሃሳዳሳ፤
ꬉማይ ጻላ ታስ ዳቦ ጊዲዴስ።