95
1 ሃ ዪቴ!
ኣኔ ጎዳስ ኡፋይሳን ዬጾስ፤
ኑና ኣሺዛ ዛላስ ኢሊሎስ።
2 ኣኔ ኢዛ ሲንꬅ ጋላታራ ሺቆስ፤
ጋላታ ማዛሙሬ ኡፋይሳን ዬጾስ።
3 ጋሶይካ ጎዳይ
ዎልቃማ ጾሳ፥
ጾሳታ ኡባ ቦላካ
ዎልቃማ ካዎ።
4 ቢታ ጪማቲ ኢዛ ኩሼን ዴቴስ፤
ዙማ ጼራቲካ ኢዛሳ።
5 ኣባ ሃꬂ ኢዛሳ፤
ሄሳ ኢዛ ኩሼቲ ሜꬊዳ፤
ቢታካ ሜꬊዳይ ኢዛ።
6 ሃ ዪቴ!
ሆኪዲ ኣኔ ኢዛስ ጎይኖስ፤
ኑና ሜꬊዳ ጎዳ
ሲንꬃን ጉልባቶስ።
7 ኢዚ ኑ ጾሳ፤
ኑኒ ኢዛ ቆሮን ሄሜቲዛይታ፤
ኑኒ ኢዛስ ዶርሳ ዉዴታ።
ጎዳይ ኢንቴና ጊዛይሳ ሃች ሲዪቴ!
8 «ካሴ ኢንቴ ኣዋቲ
ማሳኒኔ ማሪባን
ኦꬆይሳꬆ
ኢንቴ ዎዚና ሙሚሶፒቴ።
9 ኢስቲ ታ ኦሶ ቤኢዲካ
ታናራ ኤቄቲዳኔ ታና ፓጪዳ።
10 ሄ ዬሌታ ቦላ ታኒ
ኦይዱ ታሙ ላይꬅ ሃንቄታዲስ፤
ታኒካ፥ ‹ኢስቲ ኡባ ዎዴ
ባንታ ዎዚናን ባሊዛ ኣሳ፤
ኢስቲ ታ ኦጌ ኤሪቤቴና› ጋዲስ።
11 ሄሳ ጊሻስ ታኒ፥
‹ኢስቲ ታ ሼምፖሶ
ሙሌካ ጌሌቴና›
ጋዳ ሃንቄታ ጫቃዲስ።»