4
ጾሳ ኬꬃን ጎኤቲዛ ሚሻታ
(1ካዎ 7፡23-51)
1 ሄሳፌ ጉዬ ሶሎሞኔይ ኣዱሳቴꬃይ 20 ዋꬋ፥ ጎምፓይ 20 ዋꬋ፥ ጌሳይ 10 ዋꬋ ጊዲዛ ያርሾ ያርሺዛሶ ጻርቂማላፔ ኦሲሲዴስ።
2 ቃሴ ጻርቂማላ ሴሪሲዲ ጎምፓይ ያ ጋጻፔ ሃ ጋጻ ጋካናስ 10 ዋꬋ፥ ጌሳይ 5 ዋꬋኔ ዩዪ ኣꬋናስ 30 ዋꬋ ጊዲዛ ጊታ ጋባቴ ሜꬊሲዴስ።
3 ጊታ ጋባቴ ዶናን ካሬ ባጋራ ዚቂ ጊዲ ኢዛራ ኦይኬቲ ሜꬌቲዳ ሚስሌቲ ዴቴስ፤ ሄ ሚስሌቲ ናምኡ ማራን ዴኢዛ ቦራታ ሚስሌታ።
4 ሄ ጊታ ጋባቴይ ጻርቂማላፔ ሜꬌቲዳ ቦራ ሚስሌ ታማኔ ናምኣታ ዞኮን ኡቲዴስ። ቦራታፔ ሄꬓቲ ፑዴሃ ባጋ፥ ሄꬓቲ ኣርሼይ ዉሊዛ ባጋ፥ ሄꬓቲ ዱጌሃ ባጋ፥ ሄꬓቲ ቃሴ ኣርሼይ ሞኪዛ ባጋ ሲሚ ጼሊዛ ሚሳቴቴስ። ጊታ ጋባቴይ ኢስታ ቦላ ኡቲዴስ፤ ኢስቲ ኡባይ ኢሶይ ኢሳስ ዱጫ ዛሪ ዎꬂዳ።
5 ጊታ ጋባቴዚ ኢሲ ታꬋኮ ኬና ኦርዴ፤ ኢዛ ዶናይ ፒጫ፤ ቃሴ ጪሺ ጪዪዳ ሚሳቴስ። ሄ ጊታ ጋባቴዚ 60,000 ሊቲሮ ጊዲዛ ሃꬅ ኦይኬስ።
6 ሶሎሞኔይ ቃሴካ ኢስታን ሜጬቲዛ 10 ሳኔታ ኦሲሲዴስ፤ ሂስቲዲ 5 ዱጌሃ ባጋራ፥ ቃሴ 5 ፑዴሃ ባጋራ ዎꬂዴስ። ኢስታን ጹጌቲዛ ያርሾ ኣሾይ ሜጬቴስ፤ ጊዶ ኣቲን ጊታ ጋባቴዛ ሃꬃን ቄሴቲ ሜጬቴስ።
7 ሄሳፌ ጉዬ ሶሎሞኔይ ኢስታስ ኢሜቲዳ ሃልቾ ማላ ጾምፔ ዎꬂዛ 10 ባላታ ዎርቃፌ ኦሲሲዲ፥ 5 ፑዴሃ ባጋራ፥ 5 ዱጌሃ ባጋራ ጾሳ ኬꬃ ጊዶን ዎꬂዴስ።
8 ቃሴካ ኢዚ 10 ጻራጴዛታ ኦሲሲዲ 5 ፑዴሃ ባጋራ፥ 5 ዱጌሃ ባጋራ ጾሳ ኬꬃ ጊዶን ዎꬂዴስ፤ 100 ጻሮታካ ዎርቃፌ ሜꬊሲዴስ።
9 ሶሎሞኔይ ቄሴታስ ጊዶ ዛጎኔ ካሬ ባጋን ጊታ ዛጎ ጊግሲዴስ፤ ዛጎዛስ ፔንጌታ ጊግሲዲ ፔንጌታ ጻርቂማላን ሜሺዴስ።
10 ጊታ ጋባቴዛ ጾሳ ኬꬃፌ ዱጌሃ ባጋራ ኣርሼይ ሞኪዛ ባጋን ዎꬂዴስ።
11 ሁራም-ኣቤይ ኬሬታ፥ ቃጴታኔ ጻሮታ ሜꬊዴስ፤ ሂስቲዲ ሁራም-ኣቤይ ካዎ ሶሎሞኔስ ጾሳ ኬꬃን ጎኤቲዛ ሚሻታ ኦሶ ፖሊዴስ።
12 ኢዚ ኦꬂዳ ሚሻቲካ ናምኡ ቱሳታ፥ ቱሳታ ጼራን ዎꬂዛ ሳኔ ማላ ናምኡ ቁስቴታ፥ ቱሳታ ቦላ ዴኢዛ ናምኡ ቁስቴታ ኣሌቂሲዛ ናምኡ ጊቴ ማላ ሳንሳላታታ፥
13 ኢሲ ኢሲ ቁስቴ ቦላ ናምኡ ማራን ጻርቂማላፔ ሜꬌቲዳ ኢሲ ኢሲ ጼት ኦሮማኔ ቴራ ሚስሌታ፥ ሙሌራ 400 ኦሮማኔ ቴራ ሚስሌታ፥
14 ኢስታን ሚሻታ ዎꬂዛ 10 ጋሬታ፥ 10 ሜቻ ጋባቴታ፥
15 ጊታ ጋባቴዛኔ ኢዛፔ ጋርሳን ዴኢዛ 12 ቦራታ ሚስሌታ፥
16 ኬሬታ፥ ቃጴታ፥ ጻሮታኔ ሃራ ሚሻታ ኡባ።
ሁራም-ኣቤይ ካዎ ሶሎሞኔስ ጾሳ ኬꬃ ኦሶስ ሜꬊዳ ሃ ሚሻታ ኡባ ቁጬቲዳ ጻርቂማላፔ ሜꬊዴስ።
17 ካዎ ሶሎሞኔይ ሱኮቴፔኔ ጻሬዴፔ ጊዶን ዮርዳኖሴ ዙሌን ዴኢዛ ጻርቂማላ ሴሪሲዛ ሶሆን ሃይታንታ ኡባ ኦሲሲዴስ።
18 ጻርቂማላፔ ሜꬌቲዳ ሃ ሚሻቲ ኡባይ ኬሂ ዳሮ ጊዲዳ ጊሻስ ኣይ ኬና ዴጺዛኮ ኤሬቲቤና።
19 ቃሴካ ሶሎሞኔይ ጾሳ ኬꬃን ዴኢዛ ሚሻታ ኡባ ዎርቃፌ ሜꬊሲዴስ፤ ሄይቲካ ዎርቃፌ ኦሴቲዳ ያርሾ ያርሺዛሶ፥ ጾሳ ሲንꬃን ዎꬂዛ ኡኬꬂ ኢዛ ቦላ ኡቲዛ ጻራጴዛ፥
20 ኢስታስ ኢሜቲዳ ዎጋ ማላ ኡባፌ ኣꬊዛ ጊዶ ቆልኣ ሲንꬃን ፖኣና ማላ ጾምፔ ዎꬂዛ ዎርቃ ባላታ፥ ኢስታ ዎርቃ ጾምፔታ፥
21 ሙሩታ ዎርቃፌ ኦሴቲዳ ጪሻ ሚስሌታ፥ ጾምፔታኔ ቃጴታ፥
22 ጾምፔዛ ቶይሲዛ ሚሻታ፥ ጻሮታ፥ ኤጻኔ ጩዋሲዛ ሚሻታኔ ታማ ኤኪዛ ሚሻታ። ሃ ሚሻቲ ኡባይ ሙሩታ ዎርቃፌ ኦሴቲዳ። ጾሳ ኬꬃስ ካሬ ባጋ ፔንጌታኔ ኡባፌ ዱማቲዛ ጊዶ ቆልኣ ጌሊዛ ፔንጌታ ዎርቃን ሜሺዴስ።