2
ሃና ዎሳ
1 ሃናይ፥ «ታ ዎዚናይ ጎዳን ኡፋዬቲዴስ፤
ታ ካጬይ ጾሳን ꬎቁ ꬎቁ ጊዴስ፤
ኔኒ ታና ኣሺዳ ኣሾን
ታኒ ኡፋዬቲዳ ጊሻስ
ታ ዶናይ
ታ ሞርኬታ ቦላ ዶዬቲዴስ።
2 «ጎዳ ማላ ጌሺ ኦኒካ ዴና፤
ኔፔ ኣቲን ሃራይ ዴና፤
ኑ ጾሳ ማላ ዛላይ ዴና።
3 «ሃይሳ ማላ ኦቶሮን ሃሳዮፒቴ፤
ሃይሳ ማላ ጬቄቴꬃ ቃላይ
ኢንቴ ዶናፔ ኬዞፖ፤
ጋሶይካ ጎዳይ ኢዚ ኤራ፤
ኦሶ ኡባ ኢዚ ጌዳሬስ።
4 «ዎልቃማታ ቶራይ ሜቄሬቲዴስ፤
ዳቡራንቻቲ ጊዲኮ
ዎልቃ ዴሚዳ።
5 ካሴ ካሊዳይቲ ጋፊዲ
ሃኢ ካꬃስ ሃሬቲዳ፤
ካሴ ጋፊዳይቲ ሃኢ ካꬅ ካሊዳ፤
ማይኔያ ሃኢ
ላፑን ና ዬላዱስ፤
ዳሮ ናይታ ኣዬያ
ሃኢ ዬሎ ꬋያዱስ።
6 «ጎዳይ ዎꬌሲኔ ፓꬄስ፤
ዱጌ ዱፎን ጌልꬄሲኔ ኬሴስ።
7 ጎዳይ ማንቄꬄሲኔ ዱሬሴስ፤
ካዉሼሲኔ ጊታሴስ።
8 ኢዚ ማንቆ ጉዱላፌ ዴንꬄስ፤
ኣይኮይካ ባይንዳ ማንቆዛ
ꬎቁ ꬎቁ ሂስቴስ፤
ባ ሹሜታራካ ኢሲፌ ኡቲሴስ፤
ቦንቾ ኣራታካ ላቲሴስ።
ጋሶይካ ቢታ
ዮቻቲ ጎዳሳ፤
ኢዚ ኣላሜ ኢስታ ቦላ ዎꬂዴስ።
9 «ኢዚ ጌሻታ ቶሆ ናጌስ፤
ኢታቲ ጊዲኮ ꬉማን ዬጌታና፤
ኣሲ ባ ዎልቃን ጾኔና።
10 ጎዳራ ኤቄቲዛይቲ ሊቃና፤
ኢዚ ኢስታ ቦላ ሳሎፔ ጉማና፤
ጎዳይ ቢታ
ጋጻ ጋካናስ ፒርዳና፤
ኢዚ ካዎዛስ ዎልቃ ኢማና፤
ኢዚ ቲዬቲዳይሳ ካጬ
ꬎቁ ꬎቁ ሂስታና»
ጋ ዎሳዱስ።
11 ሄሳፌ ጉዬ ሂልቃናይ ባሶ ኤራማ ቢዴስ።
ናዚ ሳሜሊ ቄሴ ኤሌ ሲንꬃን ዲሼ ጎዳስ ሃጋዜስ።
ኤሌ ናይታ ኢታቴꬅ
12 ኤሌ ናይቲ ሹፉሮታ፤ ጎዳስካ ያዬቴና።
13 ሄ ዎዴ ቄሴቲ ዴራራ ዲዛ ኢሲፌቴꬃን ፖሊዛ ዎጋቲ ዴቴስ፤ ኣይ ኣሲካ ያርሾ ሺሺዛ ዎዴ ኣሾይ ዶይሴቲሺን ቄሴዛ ኦሳንቻይ ሄꬑ ኣቻራ ዲዛ ቃጴ ኤኪዲ ዬስ።
14 ኢዚካ ቃጴዛ ዱጌ ዲስቴዛን ዎይኮ ጻሮዛን፥ ኦቶዛን ዎይኮ ባꬃዛን ዬዴስ፤ ሄሳፌ ጉዬ ቃጴዚ ኤኪ ኬዚዳ ኣይ ኣሾካ ቄሴዚ ባስ ኤኬስ፤ ኢስቲ ሴሎ ዪዛ ኢስራኤሌ ኣሳ ኡባ ሄሳ ማላን ሞኬቴስ።
15 ጊዶ ኣቲን ሃንዳዚ ጹጌታናፔ ሲንꬃን ቄሴዛ ኦሳንቻይ ዪዲ ያርሾዛ ሺሺዛዴ፥ «ቄሴዚ ቃዬፔ ኣቲን ዶይሴቲዳ ኣሾ ኔፔ ኤኮንታ ጊሻስ ቄሴዛስ ጺጻና ኣሾ ታስ ኢማ» ጌስ።
16 ኣዴዚ፥ «ኮይሮ ሃኒዳይ ጹጌቶ፤ ሄሳፌ ጉዬ ኔ ኮይዛይሳ ኤካንዳሳ» ጊኮካ ቄሴዛ ኦሳንቻዚ፥ «ኣካይ! ሃኢ ታስ ኢማ! ኔ ኢሞንታ ኣጊኮ ታ ዎልቃራ ኤካና» ጌስ።
17 ጎዳስ ሺቂዛ ያርሾዛ ሄሳꬆ ሂስቲ ካꬊዛ ጊሻስ ኤሌ ናይታ ናጋራይ ጎዳ ሲንꬃን ኬሂ ዴጾ ጊዲዴስ።
ሴሎን ሳሜላ ዱስ
18 ሳሜሊ ቡሮ ዮጋቴꬃን ዲሼ ላይኖፔ ዳዴቲዳ ማይኦ ማይኢዲ ጎዳ ሲንꬃን ኦꬄስ።
19 ኢዛ ኣያ ባ ኣዚናራ ላይꬃን ላይꬃን ሺሺዛ ያርሾ ሺሻናስ ቢዛ ዎዴ ኡባን ኢዛስ ቦላራ ማይኣናስ ቄሪ ማይኦ ዳዲሳ ኤካ ያዉስ።
20 ኤሌይ፥ «ዎሳን ኢዛ ጎዳፔ ዴማዳ ዛራ ጎዳስ ኢሚዳ ሃ ናዛ ቆꬌ ጎዳይ ሃ ማጫሳይፌ ሃራ ዬሎ ኔስ ኢሞ» ጊሼ ሂልቃናኔ ኢዛ ማቼዮ ኣንጄስ፤ ሄሳፌ ኢስቲ ጉዬ ባሶ ሲሚ ቢዳ።
21 ጎዳይ ሃና ኣንጂዴስ፤ ኢዛ ቃንꬃታዳ ሄꬑ ኣቱማ ናይታኔ ናምኡ ማጫ ናይታ ዬላዱስ፤ ዬላጋ ሳሜሊካ ጎዳ ሲንꬃን ዲጪዴስ።
ኤሌኔ ኢዛ ና ናምኣታ
22 ሄ ዎዴ ኤሌይ ኬሂ ጪሚዴስ፤ ኢዛ ናይቲ ኩሜꬃ ኢስራኤሌ ቦላ ኦꬂሼ ዲዛይሳ፥ ጋይቶቴꬃ ዱንካኔዛ ፔንጌን ኦꬂዛ ማጫሳታራ ኢስቲ ላይማቲዳይሳ ሲዪዴስ።
23 ሄሳ ጊሻስ ኢዚ ኢስታስ፥ «ኢንቴ ኦꬂዛ ኢታ ኦሶዛ ኩሜꬃ ዴራፔ ታ ሲያይስ፤ ኣይስ ሃይሳ ማላ ኦꬄቲ?
24 ታ ናይቶ ሊኬ ጊዴኬታ፤ ጎዳ ዴራ ጊዶን ኢንቴ ጊሻስ ላሌቲዳ ዎሬይ ሎኦ ጊዴና።
25 ኢሳዴይ ሃራ ኣስ ቆሂኮ ጎዳይ ኢስታ ጊዶን ፒርዴስ፤ ጊዶ ኣቲን ኣሲ ጎዳ ቆሂኮ ኦኒ ኢዛስ ጋናታኔ?» ጊ ሃንቄቲዴስ። ጊዲኮካ ጎዳይ ኢስታ ꬋይሳና ኮዪዳ ጊሻስ ኢስቲ ባንታ ኣዋ ሴራ ኤኪቤቴና።
26 ዬላጋ ና ሳሜሊ ጌሳኒኔ ቴማን ጎዳ ሲንꬃኒኔ ኣሳ ሲንꬃን ዲጪ ዲጪ ቢዴስ።
ኤሌሶ ኣሳ ቦላ ዮቴቲዳ ቲንቢቴ
27 ሄ ዎዴ ጾሳፌ ኪቴቲዳ ኢሲ ናቤይ ኤሌኮ ዪዲ፥ «ጎዳይ፥ ‹ኔ ኣዋ ሶ ኣሳይ ካሴ ጊብጼን ፓሮኔ ኩሼን ዲዛ ዎዴ ታና ኢዛስ ቆንጪሳቤኪና?
28 ኢዚ ታስ ቄሴ ጊዳና ማላ፥ ታስ ያርሾ ያርሺዛሶዛ ቦላ ኢዚ ኬዛና ማላ፥ ኤጻኔ ጩዋሳና ማላ፥ ታ ሲንꬃንካ ኤፉዴ ማይኣና ማላ ኢስራኤሌ ቆሞታ ኡባ ጋርሳፌ ታ ኔ ኣዋ ዶራዲስ። ኢስራኤሌ ኣሳይ ታማን ጹጊ ሺሺዛ ያርሾ ኡባ ኔ ኣዋ ኬꬃ ኣሳስ ኢማዲስ።
29 ታ ኣቂዛ ኬꬃን ሺቃና ማላ ታ ኣዛዚዳ ያርሾዛኔ ካꬃዛ ኣይስ ካꬊዴቲ? ኔኒኔ ኔ ናይቲ ታ ዴሬ ኢስራኤሌይ ሺሺዳ ያርሾ ኡባፌ ሙሩታ ሙሩታ ዶሪ ሚዲ ኢንቴ ሞላቲዴታ፤ ኔካ ታፔ ኣꬃዳ ኔ ናይታ ኣይስ ቦንቻዲ?› ጌስ።
30 «ሄሳ ጊሻስ ጎዳ ኢስራኤሌ ጾሳይ፥ ‹ኔ ኬꬂኔ ኔ ኣዋ ኬꬃ ኣሳይ ታ ሲንꬃን ሜርናስ ሃጋዛና ማላ ሂዶታ ቃላ ኢማዲስ፤ ሃኢ ጊዲኮ ጎዳይ ሃኒፌ ጉዬ ታ ሃይሳ ኦꬂኬ፤› ታና ቦንቺዛይታ ታካ ቦንቻና፤ ታና ካꬊዛይቲ ሙሌራካ ካꬌታና።
31 ቤኣ ኔ ዜሬꬃ ጊዶን ጪማይ ቤቶንታ ማላ ኔ ዎልቃኔ ኔ ኣዋ ኬꬃ ኣሳ ዎልቃ ታ ሜንꬃና ዎዴይ ያና።
32 ኔኒ ታ ኬꬃን ሜቶ ቤኣና፤ ኢስራኤሌስ ኣይ ሎኦይ ኦሴቲኮካ ኔ ኬꬃን ሙሌካ ጪማይ ቤቴና።
33 ታኒ ታስ ያርሾ ያርሺዛሶዛፔ ዲጎንታ ኔ ዜሬꬃቲ፥ ሼምፖራ ፓጻ ኣታናይቲ ኔ ኣይፌታ ኣፉንꬃን ዶልጁሚሳናስ፥ ኔ ዎዚናካ ጬጬን ኩንꬃናስ ጻላ ኣታና። ጊዶ ኣቲን ሃራ ኔ ዜሬꬃቲ ኡባይ ዬላጋቴꬃን ሙልቄቲ ሃይቃና።
34 «ኔ ናይታ ናምኣታ ኣፊኔ ቦላኔ ፊኒሃሴ ቦላ ጋካናይሲ ኔስ ማላታ ጊዳና፤ ኢስቲ ናምኣይካ ኢሲ ጋላስ ሃይቃና።
35 ታ ዎዚና ማላኔ ታ ቆፋ ማላ ታስ ሃጋዛና ኣማኔቲዳ ቄሴ ታኒ ታስ ዴንꬃና፤ ኢዛ ኬꬃ ታ ሚንꬃ ኤሳና፤ ኢዚካ ታ ቲይዳይሳ ሲንꬃን ሜርናስ ሃጋዛና።
36 ኔ ዜሬꬃታፔ ኣቲዳ ኣይ ኣሲካ ኢሲ ሳቂሌ ቢራሲኔ ኢሲ ባርሳ ካꬃስ ጊዲ ኢዛ ሲንꬃን ጉፋኒዲ ጎይናና፤ ‹ሃቺስ ባꬊዛዝ ታ ዴማና ማላ ዛይ ታና ቄሴቴꬃ ኦሶታፔ ኣዋይሳንካ ጌልꬃርኪ!› ጊዲ ኔና ዎሳና» ጊዴስ።