8
Amoxey Ajjuutan Be7ida Teeray Kumida Keeshe
1 Ubbaafe Wolqqama GODAY tana hara ajjuuta bessides; hessika teeray izan kumi diza keeshe.
2 GODAY tana, «Hessi ne be7izayssi aazee?» gi oychchides; tanikka izas, «Teerara diza daachcho beyays» gadis; qasseka Xoossi taas, «Ta dere Isra7eeles wurseththi gakkides; hayssafe guyen tani istta qaxxayontta aggike.
3 «Istti Xoossa Keeththan sissiza yeththay he wode yeehon laamettana; daro asa ahay awan awanka kundi attana; awanka coo yegetti attana» gees.
Isra7eele Kundeth
4 Intteno metotida asa qohizaytoo!
Qasse manqota biittafe dhayssana
koyzaytoo! Hayssa siyite!
5 Intte, «Nuni nu kaththa
bayzana mala
agina xeeron bonchchiza
ba7aaley ayde aadhdhaneeshaa!
Nuni kath giya gelththanaas
sambataykka nuus ayde
aadhdhaneeshaa!
He ba7aaley aadhdhiko
nuni maka
miishsha guuththidi
al7o waagan bayzana;
qasseka wordo meezaanen
asaa baleththana.
6 Gistte harqqoka muuruta
gistte waagan bayzana;
manqota biran, metotidaytakka
toho caamman shammana» geeta.
7 Yaaqoobeynne iza zereththati izan ceeqettiza GODAY, «Istti ooththida ooso ubbaa tani balikke.
8 Hayssa geedon biittay buro qaaxxana; biittay bolla dizay wurikka yeekkana; Abbaye shaafay kixxidi guummizayssaththo biitta ubbay qaaththi yoshikuyoshikana» giidi barkka banan caaqqides.
9 Ubbaafe Wolqqama GODAY, «He wode tani gallassa seetan awa arshe wulsana; gallassa seetan gade dhumisana.
10 Intte layththan layththan bonchchiza ba7aaleza yeehon laammana; intte yexxiza yeththaaka waason laammana; diza pexi issi nay hayqqiin camo yeeho yeekkiza asa mala intte intte hu7e binana buucidi maaqa may7ana mala tani inttena ooththana; he wurseththa gallassay camo gallas gidana.
11 Hekko tani biitta bolla kosha ehana wodey yaana;
hessika asay Xoossa qaala
siyana gafanne
saamo attiin kaththa gafanne
haaththa saamo gidenna.
12 Derey wuri pudehappe
dugeha gakkanaas
arshey mokkizasoppe
wullizaso gakkanaas
GODAA qaala kosh
yaanne haa yeemottanashin
demmenna.
13 He wode lo7o geela7otinne
mino panththati
saamoppe dendanayssan
daaburana.
14 Samaariya deren, ‹Ashamo›
geetetta xeygettiza
eeqa xoossayn caaqqizayti,
‹Daane xoossay beyiin›
woykko, ‹Bersaabehe
xoossay beyiin›
gi caaqqizayti wurikka kundana;
ba kundidasohoppe mulekka
dendanaas dandayettenna» gees.