32
1 Salotoo! Tani yootizayssa
ezgi siyite;
Sa7azoo ta doonappe
keziza qaala siya.
2 Ta immiza timirtey
ira mala bukko;
ta haasayaykka
xaaza mala xoketto;
maata bolla loddi gi bukkiza
ira mala bukko;
kaththa caarechcha bolla
puuse mala wodhdho.
3 Tani GODAA sunth awajjays;
nu Xoossaa gitateth
intte yootite.
4 «Izi nuus miixa;
iza oosotikka kumeththa;
Iza ogeti wurikka suure;
izi balettontta
ammanettida Xoossa;
izi suurenne xillo Xoossa.
5 «Istti iza sinththan
iita ooththida;
istti bantta iitateththaafe
dendidayssan
hayssafe guye
iza nayta gidettenna;
istti bokkanne geella yeletata.
6 «Intteno eeyatoo!
Qasseka wozinay bayndaytoo!
Intte GODAAS
immiza zaaroy hayssee?
Inttena medhdhida
intte aaway iza gidennee?
Inttena medhdhidi hayssas
gaththiday iza gidennee?
7 «Kase beni wodeza
yuushshi qoppite;
daro yeletata
layththaaka akeekite;
Intte aawata oychchite;
istti inttes yootana;
kase cimatakka oychchite;
istti inttes
qonccisi yootana.
8 «Ubbaafe Dhoqqa Xoossay
kawoteththatas biitta
gishechchida wode,
asa nayta istta
zaren zaren shaakkida wode,
Isra7eele asaa qooda keena
kawoteththatas dhas woththides.
9 «Isra7eeley GODAAS gisha;
Yaaqoobeykka
izas buzo miishsha.
10 «Aykkoyka baynda bazzon
carkoy punniza biittaan
iza demmides;
izas gondalle gidides;
ba ayfe ciro mala
iza naagides.
11 Golle kafoy ba ciyeta
piradho tamaarsiza mala,
ba qefe miccada
gakka oykka ashshiza mala,
GODAY ba qefen haphphidi
istta ashshides.
12 Hara eeqa xoossati
izara baynda GODAY
iza barkka kaaleththides.
13 «Dhoqqa sohon
iza woththides;
biittafe mokkida kaththa ayfe
iza mizides;
zaallafe beettida ees ushshides;
shuchcha biittan mokkida
wogara zayte mizides.
14 Miizappe dorsafenne
deysha wudeppe
beettiza maaththaninne oys
Baasaane dereppe beettiza
ohala laaqqata,
modhdho dharshota,
wofanotanne deyshata,
lo7o gistte daabbora
istta mizides.
Intte iza dereti
zo7o woyne miththa ayfeppe,
giigida woyne
ushshu uyideta.
15 «Isra7eele asay
ordidessinne makkallides.
Daro miidi modhdhidessinne
moollattides;
bana medhdhida
Xoossaa aggides;
bana ashshidayssaka
kawushshides.
16 Istti eeqa xoossatas
goynnidi Xoossaa mishisida;
bantta iita oosonkka
iza hanqeththida.
17 Hayssafe kase
ba eronttaytas,
Xoos gidontta daydanththatas,
mata wode yida xoossatas,
beni istta aawati isttas
goynnontta eeqatas,
istti yarsho shiishshida.
18 Istti baas de7o immida
zaallaa dogida;
bana medhdhida
Xoossaaka balida.
19 «GODAY hessa be7idi
istta bolla hanqettides;
istta macca naytanne
istta attuma nayta diggides.
20 ‹Tani ta ayfeso
isttafe genththana;
istti geellanne ammanettontta
dere gidida gishshas
istta wurseththi
ay gidanaakko
ta co7u ga beyana.›
21 Tumu gidontta xoossatan
tana mishisida;
go7ay baynda
ba eeqa xoossatan
tana hanqeththida.
Tanikka istta kadhettida
kawoteththata
istti miigettana mala ooththana.
Ta istta akeekontta
deretan hanqeththana.
22 Ta hanqoy
tama mala eexxana;
biittanne biitta bolla diza
ubbaa xuuggana;
he tamay si7oole
ciimmaa gakkanaas eexxana;
tamazi zumaas
yoch gakkanaas maana.
23 Tani istta bolla
zaareththa zaareththa
bosha ehana;
Taas diza wondafe
ta istta bolla wursana.
24 Ta ubbaa wursiza kosha
istta bolla yeddana;
issaafe issaan aadhdhiza
iita hargeninne
boshan istti wurana;
meto gaththiza iita do7atanne
dukkiza marzera diza
shooshshata
ta istta bolla yeddana.
25 Oge ubbaan istta nayta
olay wursana;
keeththa giddonkka
hirgay kumana;
panththatinne geela7oti,
guuththa naytinne
cimati ubbay wurana.
26 Tani istta ubbaa laallana;
Hessafe guye istta
hassa7ana asi deenna.
27 Gido attiin istta morkketi,
‹Nuni nu wolqqan
istta xoonidos attiin
Xoos gidenna› giidi
otoreteththan ceeqettidi
tana hanqeththanaakko
gaada qoppays.
28 Isra7eele asay
yuushshi qoppontta kawoteth;
isttas akeekay deenna.
29 Istti erata gididaakko
hayssa istti kasetidi qoppana;
bantta wurseththankka
hananayssa yuushshi
qoppanashin!
30 Istta medhdhidayssi
istta aaththi immonttaako,
GODAY istta
yeggi aggonttaako,
Issaadey 1,000 as
wostti gooddandee?
Woykko nam7ati 10,000 as wostti gooddanee?
31 Haray attoshin nu morkketi
istta xoossay
laafa gididayssanne
Isra7eele Xoossaa mala
gidonttayssa ereettes.
32 Nu morkketi Sodoomenne
Gamoora dere asaa mala tuna;
isttika camonne marzera diza
ayfe ayfiza woyne miththa mala.
33 Istta woyne ushshay
shooshsha marze mala;
qasseka haso shooshsha
marze mala.
34 «Hayssa tani dogadinaa?
Ta mazgaban xaafetti uttides.
35 Istta morkketa bolla
halo kessanay tana;
ubbaasikka ta istta
ooso ooso mala immana;
isttas dhayo
gallassi gakkida gishshas
istti dhuphettana;
eesonkka dhayana.»
36 Isttas wolqqay
daaburdayssanne
isttaka maaddizay
bayndayssa be7idi,
GODAY ba asaas pirdana;
ba aylletaskka qadhettana.
37 GODAY ba asaa,
«Istti ammanettiza
istta xoossati
awan dizoo?
Istti baqati attiza zaallati
awan dizoo?» gi oychchana.
38 Istti yarshos
shiishshiza tolthoza midayti,
istta woyne ushsha
yarshoza uyida
istta eeqa xoossati
ane ha7i inttena
dendi maaddetto;
qasseka inttes
duussaso immetto.
39 «Tani xalla
Xoos gididayssa erite;
taappe hara Xoossi deenna;
wodhizaykka paxa
woththizaykka tana;
tani madunththayssinne
paththays;
ta kusheppe oonikka
inttena ashshenna.
40 Tani ta kushe
pude salo denththada,
‹Ta mernaas de7ays.
41 Wawaci giza
ta giththa mashshaa leefana;
ta kushey pirdas oykkana;
ta morkketa bolla
halo kessana;
tana ixxizaytas
ta istta ooso mala
isttas immana.
42 Morkketa halaqata,
madunxidaytanne
di7ettidayta suuththan
ta wondafeta
ta maththosana;
ta giththa mashshatikka
ta morkketa asho maana›
ga caaqqana.
43 «Intteno kawoteththatoo!
GODAY ba oosanchchata
suuth accana;
morkketa bolla halo kessana;
bana ixxizayta qaxxayana;
ba dereza nagara wursana;
biittayokka tunateththafe
geeshshana;
hessa gishshas
intte iza asaara
issife ufayettite» giidi,
44 Museynne Nawe naa Iyaasoy derezi siyishin ha mazamureza yootida.
Wurseththan Musey Immida Zore
45 Musey hayta ha qaalata kumeththa Isra7eele asaa sissidaappe guye,
46 izi, «Hayssa woga qaala ubbaa intte nayti lo7eththi naagana mala, istti ooththana malanne intte nayta intte azazana mala hach ta inttes markkattiza qaala ubbaa intte wozinan woththite.
47 Ha qaalay inttes de7oppe attiin coo mela qaalaa gidenna; ha qaala naagikko intte Yordaanoose pinnidi laattana biittankka adussa layth intte de7ana» gides.
Muse Hayqo Gishshas Yootettida Tinbite
48 He gallas GODAY Muses hizgides,
49 «Mo7aabe deren Iyarkko katama ginara diza Abaarime zumata giddofe Nebo zuma bolla keza; histtada tani Isra7eele asaas immana gida Kanaane biitta he pinththan xeella.
50 Ne isha Aarooney Hoore zumaa bolla hayqqidi kase hayqqida ba asatan gayttida mala nekka he zumaa bolla hayqqada ne asatan gayttana.
51 Intte nam7ayka Isra7eele asaa sinththan taas ammanettibeekketa; Xiine bazzon Qaadeese katamaa matan diza Mariiba haaththa achchan ta geeshshateththaa Isra7eele asaa bessibeekketa.
52 Hessa gishshas neni he biittayo haahon dashe be7ana attiin tani Isra7eele asaa laatissana biittayo neni gelakka.»