2
Bana Xalla Siiqoy Hada
1 Tani ta wozinan, «Ane taas gita ufays immizay aazakko, qasse lo7o miishshi aazakko eranaas koyays» ga qoppadis; gido attiin hessi hada.
2 Qasseka, «Miichchi eeyateththa; ishalossinne ufayssas ay go7ay dizee?» gadis.
3 Hessi wuri haniinkka aadho erateth demmanaas ta wozinan amottada tana woyne ushshan ufayssanaassinne eeyateth oykkanaas baaxetadis; qasse asay sa7a bolla diza qaanththa layththan salo gufanththon diza miish ubbaa bolla ooththidaakko istta go7izaazi aazakko ta erana koyadis.
4 Hessa gishshas hara issi gita miishshata ooththadis; taas keeththatakka keexxadis; woyne turakka tokkadis.
5 Dumma dumma atakilteta, dumma dumma ayfe ayfiza miththata tokkadis; yuuyi ufayettizaso giigsadis.
6 He dicciza miththata ushshanaas haath eelissizaso zeera giigsadis.
7 Attumanne macca aylleta shammadis; taas soon yelettida hara aylletikka deettes; taappe kase Yerusalaamen de7ida oonappeka bollara daro mehe, deyshinne dorsa wude haaradis.
8 Tani dumma dumma biittatappe gita asatappenne kawotappe aqota, worqqanne bira taas dagasadis. Qasse addenne macca yeththanchchata shiishshadis; gujjadakka asaa ufayssanaas daro macca nayta ehadis.
9 Hessa gishshas tani taappe kase Yerusalaamen de7ida ooppenne aadhdhida gita as gidadis; ta aadho erateththayka tanara de7ides.
10 Ta ayfey xeellidayssa diggabeekke;
ta wozinay amottidayssa
ubbaa diggabeekke;
tani ooththida ubbaan
ta wozinay ufayettides;
ta daaburaas wodhey hessa.
11 Gido attiin hessa ubbaa
ooththa simmada
tani akeekiza wode
tani keeha demmana gaada
daaburda daabura ubbaa
ta qoppiza wode ubbayka hada;
salo gufanththon
ay wodheykka deenna;
ubbayka carko oykkanaas
yedeththiza mala.
12 Hessafe guye
tani aadho erateththi,
eeyateththinne gooshshateththi
aazakko pilgga eranaas
qofa doommadis;
kawo sohon kawotida
hara kawoy
kase oosettidayssafe
hara ay ooththanee?
13 Tumukka poo7oy
dhumappe lo7iza mala
aadho erateththika eeyateththafe
aadhdhizayssa be7adis.
14 Era asa ayfey
izaades hu7e bolla dees;
eeyay gidikko
dhuma giddora hemettees;
gido attiin
istta nam7aa qaadaykka
issino gididayssa akeekadis.
15 Tani ta wozinan,
«Eeya gakkiza qaaday
tanakka gakkana;
histtiin tani
aadho eranchcha gidoyssas
wodhey aazee?» gaada qoppadis.
Qasse tani ta wozinan,
«Hayssi ubbayka hada» gadis.
16 Aadho eranchchayka eeyaza mala
mernaas hassa7ettenna;
sinththafe yaana layththatan
nam7ayka dogettana;
eeyay hayqqiza mala
aadho eranchchasikka
hayqoy attenna.
Asa Dafeteththi Hada
17 Salo gufanththon haniza miishshi ubbay iitiza gishshas ha sa7a duussay tana iitees; hessi ubbayka hada; carko oykkanaas yedeththiza mala.
18 Salo gufanththon tani keeha daabura demmida ubbaa taappe guyen yiza yeletas yeggada biza gishshas tani daabura demmida ubbay tana iitees.
19 Taappe guyera yaanayssi izi aadho eranchcha gidiin woykko eeya gidiin oonee erizay? Izi oona gidikkoka tani keeha daaburdayssanne ta aadho erateththan tani demmida ubbaa bolla goda gidana; hessika hada.
20 Hessa gishshas salo gufanththon hayssa keena ays daaburadinaa gaada ta wozinan hidota qanxxo doommadis.
21 Gaasoykka asi ba ubbaa aadho erateththan, eraninne hiillan daaburdi demmidaa ubbaa aykkoka daaburontta asas aggi bees; hessika hadanne gita qoho.
22 Hessa gishshas salo gufanththon asi keehi dafettikonne daaburkko izas ay wodhey dizee?
23 Izi ba de7o layththan daaburza daaburay ubbay waayenne meto xalla; omarsika iza guuggey shempo demmenna; hessi ubbayka hada.
24 Asas muussafenne ushshafe qasse ba ooththida ooson ufayeteththafe hara lo7iza miishshi deenna; hessika Xoossa kusheppe imettizayssa ta beyadis.
25 Iza achchafe imettontta aggiko ooni maanaassinne ufayettanaas dandayzee?
26 Xoossi bana ufayssiza asas aadho erateth, erateththinne ufays immees; gido attiin nagaranchchay Xoossa ufayssizaytas yeggi baana mala aqota dagasanaassinne ooththanaas wolqqa immees; hessika hadanne carko oykkanaas yedeththiza mala.