8
Di7etti Bidasoppe Izrara Simmida Asaa
1 Kawo Arxekisisi kawoteththan ayssiza woden tanara Baabiloone dereppe simmida korapinneta sunththi hayssafe kaalli dizayssa;
2 Finihaase zereththatappe
Gershoome,
Itamaare zereththatappe
Daaneela,
Dawite zereththatappe Haxushe,
3 izikka Shakaaniya naa,
Paaroose zereththatappe
Zakaraasinne istta soo asatappe
150 addeti xaafettida;
4 Pahaate-Mo7aabe zereththatappe
Zarahiya naa Elho7enayeynne
200 attumasati,
5 Zaato zereththatappe
Yahazi7eele naa Shakaaniyara
300 attumasati,
6 Adiine zereththatappe
Yoonataane naa Ebeedenne
50 attumasati,
7 Elaame zereththatappe
Attaaliya naa Yesha7iyanne izara
70 attumasati,
8 Shafaaxiya zereththatappe
Mika7eele naa Zabaadiyanne
izara 80 attumasati,
9 Iyo7aabe zereththatappe
wurseththata sunththay
Yihi7eele naa Abdiyunne
izara 218 attumasati,
10 Baane zereththatappe
Yospiya naa Shalomitenne
izara 160 attumasati,
11 Bebaye zereththatappe
iza naa Zakaraasanne
28 attumasati,
12 Azgaade zereththatappe
Haqoxe naa Yohanaanenne
izara 110 attumasati,
13 Adonqaame zereththatappe
wurseththata sunththay,
Elfaleexe, Yi7i7eele, Shama7enne
isttara 60 attumasati,
14 Biguwaye zereththatappe
Uutaye, Zakurenne
isttara 70 attumasati simmida.
Izray Xoossa Keeththan Ooththiza Lewe Zereththata Demo
15 Tani Izray kumeththa dereza Ahiwa goggiza haaththa shaafaa ach shiishshada heen heedzdzu gallas gam7idos; he shiiqozan qeesetappe attiin hara Lewe zereththati bayndayssa eradis;
16 hessa gishshas tani deraa kaaleththiza uddufun asata El7ezeere, Ar7eele, Shama7e, Elnataane, Yaribe, Elnataanenne, Naataane, Zakaraasanne Mashulaame; qasseka nam7u astamaareta Yoyaaribenne Elnataane geetettizayta xeygisadis.
17 Isttaka Kaspiya deren halaqa gidida Iddoko kiittadis; Iddoynne iza dabboti Xoossa Keeththan ooththiza oosanchchati nuus Xoossa Keeththan ooththana as yeddana mala ooththadis.
18 Gita Xoossa wolqqay nunara diza gishshas istti lo7o erateththi dizayssa Mahile zereththatappe Isra7eele naa Lewe zare gidida Sherebiya yeddida; izikka 18 ba attuma naytanne ba ishata kaaleththi ekkidi nuukko yides.
19 Qasse Meraare zereththatappe Hashaabiyanne Yesha7iya geetettiza 20 dabbotara nuukko yeddida.
20 Iza bolla gujjidi isttas kase aawati Leweta zereththata maaddana mala kawo Dawitinne izara issife ooththiza daannati piqaade immida; heen 220 oosanchchati deettes; isttika ba sunththan xaafettida.
Xoomanne Woosa
21 Xoossi nu oge lo7eththana mala, nunanne nu nayta qasseka nuus dizaaz ubbaa naagana mala iza sinththan nunateththaa ziqqi ooththidi woossanaas Ahiwa shaafa achchan xooma awajjadis.
22 Hayssafe sinththan ta kawo Arxekisisi erisiza wode «Nu Xoossay izan ammanettizayta ubbaa anjjees; iza aggizayta gidikko keehi qaxxayees» gaada ta qonccisida gishshas nunara ogen gaaggana morkketappe nuna naagana mala kawoza wottadaratanne toga asata imma gaada oychchidaakko yeellatanakoshin.
23 Hessa gishshas Xoossay barkka nuna naagana mala xoomaninne woosan shiiqidos; izikka nu woosaa siyides.
Xoossa Keeththas Shiiqida Imota
24 Kaaleththiza qeeseta giddofe Sherebiya, Hashaabiyanne harata 10 asata dooradis.
25 Hessafe guye kawozinne iza zoranchchati, Shuumetinne heen diza Isra7eele asati wuri nu Xoossa Keeththa oosos immida bira, worqqanne hara dumma dumma miishshata ubbaa meezaanen woththada isttas immadis.
26 Ta isttas immida Xoossa Keeththa miishshati hayssafe kaalli dizayta;
22,000 kilo gidiza bira,
70 kilo gidiza birappe oosettida
xeetu miishshata,
3,400 kilo gidiza worqqa;
27 Osppun kilonne 400
giraame gidiza
worqqafe oosettida shel7etanne
worqqafe oosettida malay xolqiza
xarqimalappe oosettida
2 shel7eta.
28 Tanikka isttas, «Intteninne ha miishshati Xoossas dummatidayta; biraynne worqqay intte aawata Xoossaassa; hessika intte intte sheneninne ufayssan immiza dumma imota.
29 Yerusalaamen diza Xoossa Keeththa gaaththan ba kifilen kifilen diza qeese halaqata, Leweta daannatassinne Isra7eele zereththa halaqata sinththan intte meezaanen woththi immana gakkanaas lo7eththi naagite» gadis.
30 Hessafe guye qeesetinne Leweti geeddarettida bira, worqqanne hara Xoossa Keeththa miishshata Yerusalaamen diza Xoossa Keeth efanaas alaafeteth ekkida.
Asay Yerusalaame Simo
31 Koyro aginay gelida mala tammanne nam7anththo gallas Yerusalaame baanaas nunikka Ahiwa shaafa achchafe dendidos; nu Xoossaa kushey nunara diza gishshas nu biza ogen diza morkketappenne pangatappe nuna ashshides.
32 Yerusalaame gakkidi heen heedzdzu gallas shempidos;
33 Oydanththo gallas biidi bira, worqqanne Xoossa Keeththa miishshata Xoossa Keeththan geeddaridi Uriya naa qeese Mermotes immidos; Finihaase naa El7ezeerey, qasseka Lewe Iyaaso naa Yozabaadeynne Binuwe naa No7aadiyay izara issife deettes.
34 Ubbaa miishshay heerakka taybettidaappe guye geeddarettidi wogara xaafettides.
35 Hessafe guye di7eteththafe simmidayti Isra7eele Xoossas yarsho gidizayssa 12 mirgota, 96 dharshota, 77 dharsho laaqqata qasseka nagara digganaas shiiqiza yarshos 12 orgeta; hayssi ubbay Xoossas xuugetti shiiqiza yarsho.
36 Kawoza azazo iza garsan poliza daannatassinne Efiraaxise shaafa pinththan diza dere ayssizaytas immida; isttika deraanne Xoossa Keeththa ooso maaddida.