13
Baabiloone Bolla Yootettida Tinbite
1 Amoxe naa Isayaasas GODAY Baabiloone gishshas qonccisiin izi be7idayssi hayssafe kaallizayssa;
2 aykkoy baynda mela diza
zumbulla bolla malata essite;
intte qaala dhoqqu
histti waassite;
istta shuumeta pengera
gelana mala malata bessite.
3 Ta xoonon ufayettizayta
ta geeshshata azazadis;
ta hanqo istti polana mala
ta olanchchata xeygadis.
4 Daro derey wocamiza mala
zumata bolla wocamiza
wocamaa siyite!
Kawoteththata giddon
metottida derey
gugumiza gugunththaa siyite!
Ubbaafe Wolqqama
GODAY olanchchata
olas salfisides.
5 GODAYNNE izi ba hanqo polisanaas
go7ettiza miishshati
biitta ubbaa dhayssanaas
haaho biittafe
salota gaxappe yida.
6 GODAA gallassi
matida gishshas yeekkite!
He gallas Ubbaa Dandayza
Xoossaa matappe bashshi yaana.
7 Hessa gishshas kushe ubbay silana;
asa ubbaa wozinaykka seerana.
8 Istti shirotana;
istta waayeynne metoy gakkana;
miixay oykkida maccassa mala
istti miixattana;
issoy issaara dagaman xeelettana;
istta ayfesoy dagaman
shaala may7ides.
9 Be7ite GODAA gallassay menxe iita;
biitta mela ashshanaas
izin diza nagaranchchata
dhayssanaas bashsharanne
gita hanqora yaana.
10 Salo xoolinttetinne
istta butteti poo7o immettenna;
arshey buro
mokkida mala dhumana;
aginaykka ba poo7o immuku.
11 GODAY, «Tani alame
izi iitateththaa gishshas
qaxxayana;
iitatakka istta
nagara gishshas qaxxayana.
Tani otoranchchata
otoreteth shaarana;
menxe iitata otoreteth
ta kawushshana.
12 Attida asati muuruta
worqqafe bollara al7o gidana;
ofire worqqafekka al7o gidana.
13 Hessa gishshas tani Ubbaafe
Wolqqama GODAY,
‹Tani ta hanqo qonccisiza wode
salo qaaththana;
sa7akka izi de7izason
kokkorsana› gees.
14 Shankkatizaadefe
baqatiza genessa mala,
heemmizaadey baynda
dorsa wude mala,
asi ubbay
ba asaakko asaakko simmana;
issoy issoy ba dere baqatana.
15 Di7ettida ubbay cadettana;
oykettida ubbay
mashshan hayqqana.
16 Istta ayfey be7ishin
istta nayta busakkana;
istta keeththatikka bonqqettana;
istta machchetakka
haray gayttana» gees.
17 Be7ite, biras wudu gonttayta,
worqqankka ufayettonttayta
Meedoone dere asaa
ta istta bolla denththana.
18 Istta wondafeti wodallata wursana;
qeeri naytakka maarettenna;
istta wozinaykka
naytas mishettenna.
19 Kawoteththatas bonchcho,
Kaladaawetas
ceeqo gidida Baabiloone
GODAY Sodoome malanne
Gamoora mala izo shiri yeggana.
20 He biittan mulekka asi de7enna;
izin uttiza asikka deenna;
Arabe asikka heen
ba dunkaane tokkenna;
mehe heemmizaytikka
bantta wude
heen shempisettenna.
21 Gido attiin bazzo do7ati
heen ichchana;
izi keeththan worakanati kumana;
heen guttoti de7ana;
bazzon deysh misatiza
daydanththati
izi bolla guppana.
22 Izi miixan godareti waassana;
lo7iza izi kawoteththa
keeththaankka
worakanati waassana;
izi wodey matides;
izi gallassayka aduqqenna.