19
Gibxe Bolla Yootettida Tinbite
1 Gibxe gishshas yootettida qaalay,
«Be7ite, GODAY eesotiza shaara
toggidi Gibxe yees.
Gibxe eeqa xoossati
iza sinththan kokkoreettes;
Gibxe wozinay
istta giddon seerees» gees.
2 «Tani Gibxeta
issaa issaa bolla denththana;
ishay ishara, shooroy shoorora,
katamay katamara,
kawoy kawora olettana.
3 Gibxeta wozinay labettana;
tani istta halchcho
hada ooththana.
Istta eeqa xoossatanne moytilleta,
tuna ayana xeygizaytanne
marota zore oychchana.
4 Qasse menxe iita asa kushen
ta Gibxeta aaththa immana;
babisiza kawoy
istta haarana» gees
GODAY, Ubbaafe
Wolqqama Xoossay.
5 Abbaye shaafa haaththi paccana;
haaththi guuxxi guuxxi melana.
6 Zara haaththati xinqqana;
Gibxe kanchcheti micci dhayana;
shaccatinne care
maatati shullana.
7 Abbaye shaafa lanqen
haaththa matan diza
miththati shullana;
shaafaa matan zerettida
kath ubbay
carkon pitetti dhayana;
aykkoyka attenna.
8 Mole oykkizayti ceecana;
Abbaye shaafan
gaattile yeggizayti
ubbay yeekkana;
haaththa bolla bantta
gite yeggizayta
ubbaa wolqqay ixxana.
9 Paatettida talbba
suqizayti dhayana;
qasse booththa puuttofe
may7o dadizayti
hidota qanxxana.
10 May7o dadizayti ceecana;
damozan aqizayta
wozinay meqqana.
11 Xaanoose biitta halaqati keehi eeya;
aadho eranchcha gidida
kawo Paaroone aadho eranchchata
zorey hada.
Paaroones, «Tani aadho
eranchchatappe issaa;
tani kase kawota kaallizaade»
waanidi geetii?
12 Intte aadho eranchchati
ha7i awan dizoo?
Ubbaafe Wolqqama GODAY
Gibxe bolla ooththana qoppidayssa
ane inttena bessettonne erisetto.
13 Xaanoose halaqati eeyda;
Memppisa shuumeti balettida;
izi dere kaaleththiza erettidayti
Gibxe asaa baleththida.
14 GODAY istta bolla
dochchiza ayana gussides;
maththottida asi ba cooshshan
gandigarza mala
Gibxey ba ooso ubbaan
gandigarana mala ooththida.
15 Kace woykko goyna,
zamba woykko shacca
heyti ubbay
Gibxes aykkoka maadettenna.
16 He wode Gibxe asay maccassa mala gidana. Qasse Ubbaafe Wolqqama GODAY istta bolla ba qese denththiza wode istti yashshan kokkorana.
17 Yuhuda asay Gibxe asaa bolla shiro denththeththana; Ubbaafe Wolqqama GODAY istta bollan ooththana halchchida halchchofe dendidayssan Yuhuda gishshas siyida ubbay shirotana.
18 He wode Gibxe biittan diza ichchash katamati Kanaane qaalan haasayana; Ubbaafe Wolqqama GODAA bagga gidanaas caaqqana. He katamatappe issiniya Bashsha Katama geetetta xeygettana.
19 He wode Gibxe biittan GODAAS yarshosoy oosettana; qasse Gibxe biitta zawan GODAAS tuussi eqqana.
20 Hessi Ubbaafe Wolqqama GODAAS Gibxe biittan malatanne markka gidana; istti banttana un7eththizaytappe dendidayssan GODAAKKO waassiza wode izi istta ashshizaadenne maaddizaade kiittidi istta ashshana.
21 GODAY bana Gibxetas qonccisana; isttika he gallas GODAA erana; yarshoninne kaththa yarshon iza goynnana. Istti GODAAS adinettana; ba adinettidayssaka gaththana.
22 GODAY Gibxe boshan shocana; zaaridikka istta paththana; isttika GODAAKKO simmana; izikka istta woosa siyidi istta paththana.
23 He wode Gibxeppe Asoore gakkanaas wogga ogey oosettana; Asooreti Gibxe, Gibxe asay Asoore baana; qasse Gibxetinne Asooreti issi bolla goynnana.
24 He wode Isra7eeley biittas anjjo gidanaas heedzdzanththo maaran Gibxeranne Asoorera issife qoodettana.
25 Ubbaafe Wolqqama GODAY isttas, «Ta dere Gibxey, ta kushey medhdhida Asoorey, ta xinxxo Isra7eeley anjjettidayta gidetto» gi anjjana.