26
Galata Yeth
1 He gallas ha yeththay Yuhuda biittan yexettana.
Nuus mino katamay dees;
Xoossi iza gimbetanne
miixata atoteththas ooththides.
2 Ba ammano naagida,
xillo kawoteththati
gelana mala pengeta doyte.
3 Nenan ammanettida gishshas
nenan zemppida shemppoyo
neni kumeththa
saroteththan naagaasa.
4 Mernaas GODAAN ammanettite;
GODAY nuus mernaa Zaalla.
5 Dhoqqasohon dizayta
ziqqi ooththana;
dhoqqu gida katama
kawushshana;
duge biittan olana;
gudullara walakkana.
6 Tohon yedhettana;
un7ettidayta tohoynne
manqota tohoy iza yedhdhana.
7 Xillota ogey moole.
Nenoo Suurezoo,
neni xillota oge moolisaasa.
8 Abeet GODAWU!
Ne woga ogera hemettishe
nuni nena hidota ooththidos;
ne sunththinne ne gitateththi
nu wozinas amo.
9 Ta shemppoya
omarsi nena laamotawus;
ta ayanay maalado
nena koyawus;
ne pirday biitta bolla yida wode
sa7an de7iza asay
xilloteth tamaarees.
10 Iita asatas kiya ooththikokka,
istti xilloteth tamaarettenna.
Suure biittan iita ooththeettes;
GODAA gitateththaaka
akeekettenna.
11 Abeet GODAWU!
Ne qesey dhoqqu dhoqqu gides.
Istti gidikko be7ettenna;
Ne asaas ne mishettizayssa
be7ettonne yeellatetto;
Ne morkketas giigida
tamay istta mo.
12 Abeet GODAWU!
Neni nuus saroteth
yoch ooththadasa;
nu ooso ubbaa neni ooththadasa.
13 Abeet GODAWU Nu Xoossawu!
neeppe hara allaga xoossati
nuna haarida;
nuni gidikko ne sunththaa
xalla bonchchoos.
14 Istti hayqqida;
simmidi shemppora
paxa de7ettenna;
istta shemppoy simmi yeenna;
neni istta qaxxayadasanne
dhayssadasa;
istta hassa7issiza miish ubbaa
pitta dhayssadasa.
15 Abeet GODAWU!
Neni kawoteththaa darsadasa;
Neni deraa darsadasa.
Neni bonchchettadasa;
biittaa zawa ubbaaka aassadasa.
16 Abeet GODAWU!
Istti metotida wode neekko yida;
Neni istta seerida wode,
saasuki nena woosseettes.
17 Abeet GODAWU! Shaara maccassi
miixan metotiza malanne
waassiza mala
nunikka ne sinththan
metotidi waassoos.
18 Nuni shaaridos;
miixankka un7ettidos;
gido attiin carko yelidos.
Nuni sa7as atoteth ehibookko;
sa7an diza deraakka yelibookko.
19 Gido attiin hayqqida
ne asay paxana;
istta ahaykka dendana.
Intteno biitta garsan dizaytoo!
Dendite ufayssan yexxite;
ne xaazay biitta yakkissiza
maalado xaaza mala
sa7ay mittidayta zaara cuttana.
20 Ta derezoo! Ba ne keeth gela;
ne penge ne bolla gorda;
iza hanqoy aadhdhana gakkanaas
guuththa wodes qotetaashsha.
21 Biittaa bollan diza asaa
istta nagaraa gishshas
qaxxayanaas,
GODAY ba de7izasoppe kezidi yees.
Biittayka ba bollan gukkida
suuththaa qonccisana;
hayqqidaytakka
hayssafe guye qottuku.