28
Efreemes Imettida Seera
1 Efreemen diza maththottizaytas,
otoreteththas,
kallachcha gididaaris,
cilila shoobba hu7en
kippi ga uttida,
izas bonchcho seelo gidida
shulla ciishshays,
woyne ushshay istta zereththas
otoreteththas gidida katamays
aayye ana!
2 Be7ite, Godaas wolqqamanne
mino gidida issoy dees;
hessika shachcha uusho mala,
dhayssiza gote carko mala,
wolqqama dambala malanne
wolqqama ira mala
wolqqan izi izo
duge biittan yeggana.
3 Maththottiza Efreeme asata
otoro kallachchay
tohon yedhettana.
4 Cilila shoobba hu7en kippi ga uttida
izas bonchcho seelo gidida
shulla ciishshaya,
kaththa shiishoppe
sinththan gakkiin
asi be7ida mala xuphi ekkidi
heerakka mittiza
balase mala gidana.
5 He gallas Ubbaafe
Wolqqama GODAY
ba asaappe casha attidaytas
bonchcho kallachchanne
puula akilile gidana.
6 Izi pirdizaytas
suure pirda pirdiza ayana
olaa katama pengefe zaarizaytas
wolqqa gidana.
Maththottiza Yuhuda Nabetanne Qeeseta,
7 Hayti woyne ushshu
uyidi yiicoteettes;
maththosiza ushshan gandigareettes.
Qeesetinne nabeti maththosiza
ushshan gandigarda;
woyne ushsha gaason
yo7oy isttafe balettides;
maththosiza ushshan
gandigarda;
ajjuutaa likkera be7ettenna;
pirda pirdishe dhuphetteettes.
8 Istta maadda ubbay coosh xalla;
cooshshan moorettonttasoy
deenna.
9 Istti, «Izi oona tamaarsizee?
Kiitaakka oos qonccisizee?
Maath aggida naytasseyee
dhanththa duuso naytassee?
10 Azazo bolla azazo,
azazo bolla azazo
woga bolla woga,
wogaa bolla woga,
haankka guuththara,
heenkka guuththara
ooththees» gaana.
11 Histtiko sinththafe
Xoossay allagata qaalaninne
imaththata doonan
ha asaas haasayana.
12 Izi isttas, «Hanna shemposo;
daaburday shemppo;
hanna shemposo»
giday oonassee?
Istti gidikko
siyana koyibeettenna.
13 Hessa gishshas GODAA qaalay
istti biidi guye kundana mala,
madunxana malanne
woximaden oykettana mala,
di7ettana mala
azazo bolla azazo,
azazo bolla azazo,
woga bolla woga,
woga bolla woga gididi,
haan guuththara,
heen guuththara hanana.
Xiyoonen Gula Shuch
14 Hessa gishshas
intteno Yerusalaamen
diza asaa haariza qilccizaytoo!
GODAA qaalaa siyite.
15 Intte, «Nuni hayqora caaqettidos;
duuforakka sigettidos;
wordo nuus zempposonne
qotettizaso ooththidos;
wolqqama boshay pitti ekki bishe
nuna bochchanaas dandayenna»
gi otorettideta.
16 Hessa gishshas Ubbaa
Haariza GODAY,
«Be7ite! Tani Xiyoonen
paacettida shuch,
yochcha shuch,
mino yochchas gidiza
bonchchettida gula
shuch woththana;
izan ammanizay yeellatenna.
17 Tani suure pirda wadha wodoro,
xilloteththika
tumbe mala ooththana;
intte wordo zempposo ooththidayssa
shachcha iray meeccana;
intte qotetti attizasozakka
haaththi mittana» gees.
18 Intte hayqora caaqettida
caaqoy attana;
intte duufora sigettida
sigay laalettana;
wolqqama boshay pitti ekki bishe
inttenakka pitti ekki baana.
19 Izi yida wode wode
inttena ekki baana;
maalado maalado,
qammanne gallas
inttena pitti efana;
ha qaalaa intte akeekizaa gidikko
shiro bolla shiro ehana.
20 Toho cogotti ichchontta mala
hiixay qaanththa;
gaththi may7anaas
afalaykka guuththa.
21 GODAY Paraaxime zuman
ooththida mala,
ba ooso, ba imaththa ooso,
hessika ba ooraththa
ooso ooththanaas dendana.
Qasse Geba7oone zullen
ooththida malakka ooththana.
22 GODAY, Ubbaafe Wolqqama GODAY
izi boshaa biitta ubbaa bolla
ehanaas awajjidayssa
tani siyida gishshas
ha7i intte qilccizayssa aggite;
akkay giikko intte bolla
qashoy minnana.
Xoossa Aadho Erateth
23 Ezgidi ta yootizayssa siyite;
akeekidi ta qaala siyite.
24 Goshshanchchay kath zeranaas
ubba wode
he soho goyishe de7izee?
Qasse izi hem7e liiqisishenne
ubbato pixishe de7izee?
25 Goshshaa liiqisidi aasutanne
aanuga zerennee?
Gistteza izas giigidasohon,
banggaa izas giigidasohon
arddaa izas
giigidasohon zerennee?
26 Iza Xoossay iza tamaarssees;
suure ogekka iza bessees.
27 Aasutay lodan bukettenna;
aanugay para-gaaren bukettenna;
aasutay guufen,
aanugay qeeri lodan bukettees.
28 Sollo uukkanaas
kaththi gaacettees;
hessa gishshas issi asi
mernaas kath bukkenna;
kath bukkiza para-gaareta
iza bollara laaggikokka
kaththaa gaacettenna.
29 Hayssi ubbay ba zoren malalisizaaz,
ba aadho erateththan
malalisizaaz gidida
Ubbaafe Wolqqama
GODAAPPE hanees.