45
Qiroose Dooreteth
1 «Ta tiydayssas,
ushachchaa ta oykkidayssas,
kawota gith birshana malanne
kawoteththati iza sinththan
haarettana mala,
pengeti gordettontta mala
iza sinththan pengeta
doyanaas Qirooses GODAY,
2 Tani ne sinththara baana;
zumata baasa ginasana;
xarqimala pengeta menththana;
birata kolatatakka qanxxana.
3 Nena ne sunththan xeygida GODAY,
Isra7eele Xoossay tana gididayssa
ne erana mala,
geemason dagattida aqota,
dhumason diza haaro
ta nees immana.
4 Ta ashkara Yaaqoobe gishshassinne
tani doorida Isra7eele gishshas,
ne tana erontta aggikokka
tani nena ne sunththan xeygadis;
bonchcho sunththika
nees immadis.
5 Tani GODAA;
taappe haray oonikka deenna;
taappe hara Xoossi deenna;
ne tana erontta aggikokka
ta nena minththana.
6 Hessika asay
arshey mokkizasoppe biidi
arshey wullizaso gakkanaas
taappe haray bayndayssa
erana malassa.
Tani GODAA;
taappe haray oonikka deenna.
7 Tani poo7o ooththadis;
dhumakka medhdhadis;
ta duresayssinne manqisays;
hayssa ubbaa ooththiza
GODAY tana.
8 Intteno salotoo,
bollafe xilloteth bukisite;
shaaratikka duge xokisite;
biittay doyetto;
atoteththi mokko.
Xilloteththika izara issife dicco.
Tani GODAY hessa medhdhadis.
Xoossay Medheteththassinne Taarikes Goda
9 «Mana miishshata giddofe
bana medhdhidayssara
marshettizayssas
aayye ana!
Urqqay bana medhdhidayssa,
‹Ne ay ooththay?› gi erizee?
Ne ooththiza oosoy,
‹Nees kushey baa› gi erizee?
10 Ba aawa,
‹Ays tana hayssaththo yeladii?›
ba aayo,
‹Ays ne hayssaththo miixattadii?›
gizaades aayye ana!
11 «Isra7eele Geeshshay,
iza medhdhida GODAY
sinththafe hanana
hanota gishshas,
‹Ta nayta gishshas
tana oychcheetii?
Ta kushe oosota gishshas azazeetii?
12 Sa7a ooththiday tana;
asikka izi bolla medhdhadis.
Salota tani ta kushen toladis;
istta bolla
salo medhetata woththadis.
13 Tani Qiroose xilloteththan denththana;
iza oge ubbaa giigsana;
ta katamayo izi
zaari essana;
di7ettida ta asaa miish
qanxxisontta coo
izi mela yeddana› » gees
GODAY Ubbaafe
Wolqqama Xoossay.
14 GODAY, «Gibxe dureteththinne
Tophphiya zal7ey,
qasse geesan adus gidida
Saaba asatikka neekko yaana;
neyta gidana.
Istti nena kaallana;
sansalatan qashetti neekko yiidi
nees goynnana;
isttas, ‹Tumappe GODAY
nenara dees;
izappe attiin hara Xoossi deenna›
giidi woossana» gees.
15 Ashshiza Isra7eele Xoossawu,
tumappe neni nena
genththiza Xoossa.
16 Eeqa xoossata medhdhizayti
ubbay yeellatana, guuxxana
issi bolla kawuyana.
17 Isra7eeley gidikko
GODAAN mernaa atoteth attana;
intteka mernaas
yeellatekketanne
kawuyekketa.
18 Salota medhdhiday izi GODAA;
biitta giigsidi medhdhiday,
sa7as yoch yeggiday,
iza asa duussaso
gidana mala attiin
coo mela woththanaas
medhdhontta GODAY,
Tani GODAA;
taappe haray deenna.
19 Ta dhuma biittan
geeman yootabeekke;
Yaaqoobe zereththatas,
«Tana coo hada koyite» gabeekke.
Tani GODAY tuma haasayays;
suure yo7o awajjays.
Salonne Sa7aa Medhdhida Xoossaanne Baabiloone Eeqata
20 «Intteno kawoteththatappe
beettidaytoo!
issife shiiqidi haayite;
mata shiiqite.
Miththaafe oosettida eeqa xoossaa
tookkizaytassinne,
ashshanawu dandayontta
xoossaa woossizaytas
erateththi deenna.
21 Ane intte mooto yootite; shiishshite;
istti ane issife
shiiqidi zoretetto.
Hayssa koyrottidi
awajjiday oonee?
Beni yootiday oonee?
Tana GODAA gidikkinaa?
Xilloynne Ashshiza Xoossi
taappe attiin haray deenna.
22 «Intteno biittaa gaxan
de7iza ubbatoo!
taakko simmidi attite.
Tani Xoossa; taappe attiin
haray deenna.
23 Gulbatey ubbay
ta sinththan gulbatana;
inxars ubbayka tanan caaqqana;
Tani tarkka ta hu7en caaqqadis;
guye simmontta qaalay
ta doonappe
xilloteththan kezides.
24 «Istti ta gishshas haasayshe,
‹Xilloteththinne wolqqay
GODAAN xalla dees› gaana» gees.
Iza bolla hanqon dendidayti
ubbay izakko yiidi yeellatana.
25 Gido attiin Isra7eele zereth ubbay
GODAAN xillana;
bonchchoka demmana.