49
Godaa Oosanchcha
1 Intteno harurotoo,
ta gizayssa siyite.
Intteno haahon diza
kawoteththatoo,
hayssa ezgite.
Tani ta aayi ulon dishin
GODAY tana xeygides;
ta yelettontta dishin tana
ta sunththan xeygides.
2 Ta inxarsaa
giththa mashsha mala qarasides;
ba kushe kuwan
tana genththides;
izi tana hoxe
yiishsha mala ooththides;
histtidi ba kooho giddon
tana qottides.
3 Izi tana, «Isra7eele
ne ta aylle,
tani ta bonchcho
nenan qonccisana» gides.
4 Gido attiin tani,
«Tani mela coo daaburadis;
go7ay baynda
coo hada miishshan
ta wolqqa wursadis;
gidikkoka ta oosozas
kushe zaaranay GODAA;
ta waagaykka
ta Xoossa matanna» gadis.
5 Ha7i tani GODAA ayfe
sinththan bonchchettadis;
Xoossay taas wolqqa gidides;
tani Yaaqoobe
izakko zaarana mala,
Isra7eele izakko shiishshana mala
ooththida GODAY
ha7ikka zaaridi,
6 «Neni taas oosanchcha gideththi,
Yaaqoobe qommota
ne zaaranayssinne
ta naagida Isra7eele zaarada
ne ehanayssi
hessi nena deexxenna;
qasseka ta atoteththaa
biitta gaxa ne gaththana mala,
tani nena kawoteththatas
poo7o histtana» gees.
7 Kadhettidayssassinne
kawoteththan ixettidayssas,
dere haarizayta
ashkara gidida nees,
GODAY, Isra7eele
ashshiza Geeshshay,
«Kawoti nena be7idi dendi eqqana;
kawo nayti nena be7idi
nees ziggana;
gaasoykka nena doorida GODAY,
Isra7eele Geeshshay
ammanettidaade» gees.
Isra7eele Zaari Eso
8 GODAY,
«Tani doorida wode
ne oyshaa zaarana;
atoteththa gallas
tani nena maaddana;
deraas caaqo qaala gidana mala,
biittayokka ne zaara essana mala,
kase biitta yeggi dhaydaytas
istta xinxxo
ne zaara immana mala,
ta nena maaddana;
ta nees ooththana.
9 Neni di7ettidayta,
‹Haa kezite!›
dhuman dizayta,
‹Poo7on kezite›
gaana mala ta ooththadis.
Istti ogey dizason dizason
kath maana;
aykkoy baynda zumbulla bolla
heemettizaso demmana.
10 Istti gafettettenna
woykko saamettettenna;
istta bazzo biitta seelay
woykko awa seelay qohenna.
Isttas qadhettizay
istta kaaleththana;
haaththa pulttoy dizason
istta heemmana.
11 «Ta zumata ubbaa
oge kessana;
ta wogga ogetikka dhoqqu gaana.
12 Hekko istti haaho dereppe yaana;
issi issineti pudehappe,
baggayti arshey wulliza baggafe,
hankko attidayti Sinimeppe
yaana» gees.
13 Salotoo intte, ilili giite;
biittayee neni ufayetta.
Intteno Zumatoo ufayssan yexxite;
gaasoykka GODAY
ba deraa minththeththees;
metotanchchatas qadhettees.
14 Xiyoona gidikko,
«GODAY tana aggides;
GODAY tana balides» gadus.
15 GODAY,
«Aaya ba dhanththiza naa
balanaas dandayazee?
ba yelida naas qadhettekee?
oonee erizay
iza balana dandayawus;
tani gidikko nena balikke.
16 Hekko tani nena
ta kushe qaa7an xaafadis;
ne dirsa gimbetikka ubbatoo
ta sinththan deettes.
17 «Ne attuma naytikka
eeson simmana;
nena laallidayti neeppe baqatana.
18 Ane dhoqqu gaada
ne yuusho xeella;
ne nayti ubbay issife shiiqidi
neekko yaana.
Tani GODAY ta de7on caaqqays;
neni istta ubbaa
alleqo mala may7ana;
ne istta mishira may7o mala
may7ana» gees.
19 «Ne laalettada bula gidikkoka,
ne biittay mulera dhaykkoka,
hach neni ne derezas
xunth gidikkoka,
nena mittidayti
neeppe haakkana.
20 Ceece wode ne yelida nayti,
ne hayththi siyishin,
‹Hayssi gadey
nuus keehi xuummides;
nu daanaas nuus
gidizaso imma› gaana.
21 Neni ne wozinan,
‹Hayta taas yeliday oonee?
Tani ceecizaadenne maynne;
tani goodettidaadenne
ixettidaade gida dishin
haytantta dichchiday oonee?
Tani tarkka attadis shin
histtiin haytanti
awappe yidoo?› gaasa» gees.
22 Ubbaa Haariza GODAY, «Be7a,
tani kawoteththata
malatan xeygana;
tani ta bandira asaas
dhoqqu histta essana;
ne attuma nayta
istti idimmi ehana;
ne macca naytakka
bantta hashen
tookkidi ehana.
23 Kawoti nena dichchiza
aawata gidana;
istta machcheti nena dichchiza
aayeta gidana;
istti gufannidi nees goynnana;
ne toho bollafe
baanaakka laaccana;
nekka tani GODAA
gididayssa erana;
tanan hidota ooththizayti
yeellatettenna» gees.
24 Di7i ekkida miish olanchchatappe
guye zaaranaas,
di7etti bidayta
menxe iitata kusheppe
ashshanaas dandayettizee?
25 Gido attiin GODAY,
«Tumukka olanchchati
di7i efida miish
kessi ekkanaas,
menxe iitata kusheppe
di7ettidayta ashshanaas
dandayettees;
nenara olettizaytara ta olettana;
ne naytakka tani ashshana.
26 Nena un7eththizayti
banttarkka ba asho maana;
woyne ushshan
maththottiza mala
banttarkka ba suuththan
maththottana;
hessafe guye asa zereth ubbay,
tani GODAA, nena Ashshizayssa,
nena wozzizayssanne
Yaaqoobe Wolqqama gididayssa
hessan erana» gees.