51
Xiyoonis Mernaa Atoteth
1 «Intteno xilloteth kaallizaytoo,
GODAA koyzayto siyite.
Intte izappe phalqetti
kezida zaallazanne
intte booketti kezida
ollaa xeellite.
2 Intte aawa Abrahaamekko,
inttena yelida Saarakko xeellite.
Izi barkka dishin
tani iza xeygadis;
tani iza anjjadissinne darssadis.
3 «GODAY Xiyoono
tumu minththeththana;
izi laaleteththaa
qadhetan xeellana;
izi bazzo biittaza Edene mala,
izi bazzo biittaza
GODAA atakiltesoho mala
ooththana;
ishaloynne ufayssi,
galataynne yeththa cenggurssi
izin seetettana.
4 «Ta baggatoo ta gizayssa siyite;
ta derezoo ta gizaa ezga;
wogay taappe kezana;
ta pirday kawoteththatas
poo7o gidana.
5 Ta xilloteththay
eesoti yeeththa bolla,
ta atoteththay matishe dees;
ta qesey kawoteththatas
tuma pirda ehana;
haruroti taakko xeellana;
ta qesekka hidota ooththana.
6 Pude dhoqqu giidi salota xeellite;
ziqqi giidi duge sa7aakka xeellite.
Saloti cuwa mala
tim7i gi dhayana;
sa7aykka afaladan ceeggana;
izin de7iza asay udunxxe mala
eeson dhayana;
ta atoteththay mernaas daana;
ta xilloteththaaska
wurseththi deenna.»
7 GODAY, «Intteno
xilloteth erizaytoo,
ta wogaa intte wozinan
woththida asatoo
ta gizaa siyite.
Asay inttena kadhishin babbofte;
istti inttena
cayishin dagammofte.
8 Bilay may7o miza mala
istta maana;
istti guxuney mida
suufe mala gidana;
ta xilloteththi gidikko mernaas,
ta atoteththi yeletappe
yeleta gakkanaas daana» gees.
9 Abeet GODAA qesey denda;
wolqqa may7a;
kase aadhdhida wodetan,
miimintte qanxxereththiday,
gita daweza caddiday
nena gidikkii?
10 Wozzetti attidayti pinnana mala,
abbaanne ciimmaa
haaththaa melissiday,
ciimma giddora oge giigsiday
nena gidikkii?
11 GODAY wozzidayti simmana;
yexxishekka Xiyoone gelana;
mernaa ufayssa kallachcha
hu7en goxxana;
istti injjenne ufayssa
duus demmana;
ceeceynne yeehoy
isttafe baqatana.
12 GODAY,
«Inttena minththizay
Tani xalla Iza;
hayqqiza asa zereth,
maata mala shulliza asa naas
ays babbay?
13 Nena medhdhidayssa,
salota tolidayssa,
sa7as yoch yeggidayssa ne baladasa;
nena dhayssanaas giigettida
menxe iitaza gaasoppe
dendidayssan
ubbaa gallas shiron daasa;
histtiin he menxe iitaza hanqoy
ha7i awan dizee?
14 Qashettidayti eeson birshettana;
istti ba qashettida
olla giddon hayqqettenna;
kaththi isttas paccenna.
15 Gaasoykka dambalay dendana mala
abba qaaththiza
Tani GODAY ne Xoossa;
ta sunththi GODAA
Ubbaafe Wolqqama Xoossa.
16 Tani ta qaala
ne doonan woththadis;
ta kushe kuwan kammadis;
salota istti dizason woththiday,
biittas yoch yeggiday,
Xiyoono, ‹Ne ta dere›
giday Tana» gees.
Godaa Hanqo
17 GODAA kusheppe hanqo
ushshu uyidaaree,
orccoka ashshontta,
as gandigarssiza ushshu
xixxi histta uyidaaree,
hanne Yerusalaame denda!
denda, denda eqqa!
18 Iza yelida nayta ubbaafe
kaaleththizay issoyka baawa;
qasse iza dichchida
nayta ubbaafekka
izi kushe oykkizay
issoyka baawa.
19 Be7a bashsha bolla bashshi
ne bolla yides;
histtiin nena oonee
minththeththanay?
isttika laaleteththinne dhays,
koshanne mashsha.
20 Ne attuma nayti daaburda;
woximaden oykettida
genessa mala
oge gaxan ubbaan ichchida.
GODAA hanqoynne
ne Xoossa seeray
istta bolla kumides.
21 Hessa gishshas woyne
ushshan gidontta
coo maththottizaare hayssa siya
22 Ba deraa ashshiza ne GODAY
Ubbaafe wolqqama Xoossay,
«Be7a; nena gandigarssiza
ushshaa ne kusheppe
ta ekkadis,
ta hanqo xuu7aappe
nam7anththo uyakka.
23 Tani hessa nena un7eththizayta
kushen woththana.
Istti nena, ‹Nuni ne bollara
hemettidi aadhdhana mala zaqulla› gida.
Histtiin istti aadhdhana gakkanaas
ne zokko isttas biitta malanne
oge mala ooththadasa» gees.