56
Azazettiza Ubbaas Imettida Atoteth
1 GODAY, «Tumu pirda naagite;
lo7o ooththite;
gaasoykka ta atoteththay
matan dees;
ta xilloteththayka
eeson qonccana.
2 Sambata tunisontta bonchchizay,
iita oosoppe ba kushe
shiishshizaynne naagizay,
haytantta polizay
anjjettidaade» gees.
3 GODAAKKO shiiqida betey,
«GODAY tana ba asaappe
tumu shaakkana» gooppo.
Gundulaykka,
«Tani melida miththa» gooppo.
4 GODAY, «Ta Sambatata
bonchchiza gundulatas,
tana ufayssiza miish doorizaytas,
ta caaqo qaala naagizaytas,
5 ta Keeththaninne
ta gimbeta giddon
attuma naytappenne
macca naytappe aadhdhiza
hassa7issiza miishshinne
sunth isttas immana;
mernaas dhayontta sunth
ta isttas immana.
6 GODAAS haggazanaas,
bana GODAARA gaththi
waaxida bete asata
GODAA sunth siiqizaytanne
izas goynnizayta,
sambata tunisontta
bonchchiza ubbatanne
caaqo qaala naagizayta,
7 tani ta geeshsha zumaa bolla
istta ehana;
ta woosa keeththa giddon
ta istta ufayssana.
Taas yarsho yarshizasoza bollan
istti shiishshiza
xuugettiza yarshonne
hara yarshota ta ekkana;
gaasoykka ta keeththay
ubbaa asaa
woosa keeth geetettana» gees.
8 Laalettida Isra7eele shiishshiza,
Ubbaa Haariza GODAY,
«Shiiqidayta bolla gujja,
tani haratakka zaara shiishshana» gees.
Iitata Bolla Xoossa Walasse
9 Intteno do7atoo,
intteno wora do7atoo
ubbayka haa yiite;
intte achchaarakka
puuzereththite.
10 Isra7eele asaa naagizayti qooqe;
isttas erateththi deenna
istti ubbay boccontta kana mala;
boccanaas dandayettenna;
istti ichchidi agumetteettes;
istti dhiskanchcha.
11 Istti ganjama kana mala;
miidi kalli erettenna.
Istti akeekay baynda
heenththanchchata;
istti ubbay
bantta oge oge beettes;
issoy issoy ba go7a xalla xeellees.
12 Istti issoy issaara,
«Haa yiite;
woyne ushshu ane uyoos.
Ane maththottana
gakkanaas uyoos!
Wontoyka hachcha mala gidana;
woykko hachchifekka aadhdhi
lo7o gidana» geetettana.