8
Asoore Kawo Yuus
1 GODAY tana, «Gita xaaththa waraqata ekkada, ‹Maher-shalal hash-baaz› gaada nababettiza pidalen xaafa.
2 Qeese Ooriyanne Baarakiyo naa Zakaraasa taas ammanettida markkata gidana mala ta istta xeygana» gides.
3 Hessafe guye ba machcho nabeyra aqides; izakka shaarada attuma naa yeladus; histtiin GODAY tana, «Iza sunththaa, ‹Maher-shalal hash-baaz› gaada sunththa.
4 Naazi, ‹Aabboo! Aayee!› gi xeys eranaappe kase Asoore biitta kawoy Samaariyanne Damasqo aqota di7i efana» gides.
5 Qasseka GODAY taas,
6 «Ha derey co7u gi goggiza
Selihoome haaththata
aggidi Eraasooneninne
Eromeliyo naazan ufayettides.
7 Hessa gishshas
tani GODAY minonne
wolqqama gidida
Efiraaxise haaththa haro,
Asoore kawo iza teemaranne
bonchchozara istta bolla ehana;
haaththazi shaafaza
kumi polchchidi
shaafa doonan diza
biitta ubbaa mittana.
8 Buuri ekkidi
duge Yuhuda wodhdhana;
biittaa kumidi aadhdhana;
qoodhe gakkanaas
mittana» gides.
Gido attiin Amanu7eelee!
Micettida iza qefey
ne biittaa gaxappe
gaxa gakkanaas
kammi oykkides.
9 Intteno kawoteththatoo!
Olas dendidi waassite;
intte dippi gaana;
haaho deren dizayti ezgite!
Olaska giigettite!
Intte dippi gaana;
Olaska giigettite!
Intte meqerettana;
10 Olas zorettite;
gido attiin inttes suurenna;
halchcho kessite;
gido attiin inttes minnenna.
Gaasoykka Xoossay nunara dees.
Godaan Ammaneteth
11 GODAY ba mino kushe ta bolla woththidi tani ha asaa oge kaallontta mala seerides;
12 «Hayssi asay, ‹Iita maqqo›
gi xeygiza miish
intte aykkoka,
‹Iita maqqo› goopite;
istti babbizayssas intte babbofte;
izas yarkiyarkofte.
13 Intte dummasana bessizay
Ubbaafe Wolqqama GODAA xalla;
intte yayyanaassinne
kokkoranaas bessizay iza.
14 Izi geeshshasoho gidana;
gido attiin izi
Yuhuda biittaa asaassinne
Isra7eele keeththaa asaas
dhuphiza shuchchinne
kundisiza zaalla gidana;
Yerusalaamen diza asaas
izi gitenne woximade gidana.
15 Isttafe daroti dhuphettana;
kundidikka meqqana;
woximaden
geli oykettana» gides.
16 Markkateththaa lo7eththa oykka;
ta tamaareta giddon
wogaa maatamen shoca.
17 Tani ba sinth Yaaqoobe zaretappe
genththida GODAA naagana;
izakka hidota ooththana.
18 Tananne taas GODAY immida nayta be7ite. Nuni Xiyoone zuman diza Ubbaafe Wolqqama GODAAPPE Isra7eeles malatanne markka.
19 Asay inttena, «Bessonttaaz tattafettishenne Saasukettishe haasayettiza bitizaytanne moytille xeygizayta oychchite» giikko derey ba GODAA oychchanaas bessennee? De7o Xoossaa aggidi hayqqidayta oysho ays koshshizee?
20 Wogaakkonne markkateththa qaalaakko biite! Istti hayssa mala qaala inttes yootontta aggiko wontta poo7oy isttas poo7enna.
21 Istti ceecishenne gafishe biitta bolla toylattana; istti keehi gafida wode hanqettana; pude xeellidi bantta kawaanne bantta Xoossaa qanggana.
22 Hessafe guye istti duge biitta xeellana; istti xeellanayssika waaye, dhumanne dhippi gida babisiza miish xalla; istti girdi gida dhuman yegettana.