25
Laappun Tammu Di7eteththa Layththata
1 Yuhuda kawo Iyosiyaasa naa Iyo7aaqemey kawotida oydanththo layththan, Baabiloone kawo Nabukadanaxoorey kawotida koyro layththan Yuhuda asaa ubbaa gishshas Ermaasakko yida qaalay hayssa.
2 Nabe Ermaasi Yuhuda asaa ubbaassinne Yerusalaamen diza ubbatas,
3 «Yuhuda kawo Amoone naa Iyosiyaasi kawotida tammanne heedzdzanththo layththafe doommidi hach gakkanaas nam7u tammanne heedzdzu layth kumeth GODAA qaalay taakko yides. Histtiin tanikka zaara zaarada inttes yootadis; gido attiin intte siyontta ixxideta.
4 «GODAY ba aylle gidida nabeta ubbaa zaari zaaridikka intteko kiittides; gido attiin intte istta siyontta ixxideta; isttaskka wudu gontta ixxideta» gides.
5 Istti, «Intte ubbayka intte iita ogeppenne intte iita oosoppe ha7i simmite. Histtiko GODAY inttessinne intte aawatas meri mernaas immida biittan intte daana.
6 Eeqa xoossatas ooththanaassinne goynnanaas kaallofte; qasse intte kushey ooththida miishshan tana yiillosopite. Histtiko ta intte bolla iita ooththike» gida.
7 GODAY, «Intte tana siyontta aggida gishshas intte kushey ooththida miish ubbaan tana hanqeththideta; histtidi intte bolla iita miish ehideta» gees.
8 Hessa gishshas Ubbaafe Wolqqama GODAY, «Intte ta qaalas azazettontta ixxida gishshas,
9 tani pudeha bagga deraa ubbaanne ta aylle gidida Baabiloone kawo Nabukadanaxoore xeygana. Histtada istta ha biitta bolla, ha biittan diza asaa bollanne heeran diza kawoteththata ubbaa bolla ehana; tani inttena mulera dhayssana; qasse mernaas asi kadhizanne qidhiza bula kessana.
10 Tani isttafe ufayssinne ililisa cenggurssa, mishirazanne mishiray cenggurssa, woxa giirissinne xomppe poo7o dhayssana.
11 Ha biittay mulera bulanne kays gidana; ha kawoteththatikka Baabiloone kawos laappun tammu layth haarettana.
12 «Laappun tammu layththay polettidaappe guye Baabiloone kawo, iza deraanne iza biittaa mooro gishshas tani qaxxayana; istta biittaaka mernaas bula ooththana.
13 Tani he biitta bolla haasaydayssa ubbaa, ha maxaafazan xaafettidayssa, Ermaasi kawoteththata ubbaa bolla yootida tinbiteta ehana.
14 Baabiloone derey daro kawoteththatassinne gita kawotas aylle gidana; istta kushe ooso mala ta isttas qanxxana» gees.
Xoossa Hanqo
15 GODAA Isra7eele Xoossay taas, «Hayssa ta hanqo woyne ushshazi kumida wanca hey; efada tani nena kiittiza kawoteththata ubbaa ushsha.
16 Istti uyida wode gandigarana; istta bolla ta yeddida olaa gaason istti gooyana» gides.
17 Histtiin tani GODAA kusheppe wancaa ekkada izi tana kiittida kawoteththatakko baada istta ushshadis.
18 Hach hanidayssa mala istti bula, asi harasettizayta, kadhizaytanne qanggettidayta gidana mala Yerusalaamenne Yuhuda katama asata, istta kawotanne istta shuumeta ubbaa,
19 Gibxe biitta kawo, iza aylleta, iza shuumeta, iza deraa ubbaa,
20 heen diza walaka deraa ubbaa, Uuxe biitta kawota ubbaa, Filisxeeme kawota, Asqeloonan, Gaazan, Aqarooneninne Azaxoonen atti diza deraa ubbaa,
21 Eedoome, Mo7aabenne Amoone,
22 Xiroosenne Sidoona abbafe he pinththa gaxan diza kawota,
23 Dadaane, Teema, Buuzenne bantta hu7e gaamme meediza asaa ubbata,
24 Arabiya biitta kawota ubbaanne bazzo biittan diza walaka dere kawota ubbaa,
25 Zimire, Elaamenne Meedoone kawota ubbaa ushshadis.
26 Haahoninne matan diza pudeha bagga kawota ubbaa, taran taran biitta bolla diza kawoteththata ubbaa ushshadis. Istta ubbaafe guye Baabiloone kawoykka uyana.
27 Hessa gishshas GODAY tana, «Ubbaafe Wolqqama GODAA Isra7eele Xoossay inttena, ‹Uyite; maththottite; cooyite nam7anththo intte dendontta mala ta intte giddo yeddiza olaa sinththan kundite› gees.
28 Gido attiin istti ne kusheppe wancaa ekkonttanne uyontta ixxiko isttas, ‹Ubbaafe Wolqqama GODAY intte dosontta uyana.
29 Be7ite; ta sunththay xeygettida katamayo ta dhayso doommana; histtiin intte qaxxayettontta atti baanee? Tani sa7an diza ubbaa bolla ola xeygida gishshas intte qaxxayettontta atteketa› gees» gides.
30 Hessa gishshas GODAY Ermaasas,
«Ha qaala ubbaa istta bolla
tinbite yoota;
‹GODAY bollafe waassana;
ba diza geeshsha sohoppe
dadattiza ba gunththaa sissana;
izi ba biitta bolla keehi waassana;
woyne maxishe yexxiza mala
sa7an diza ubbaa bolla izi guummana.
31 GODAY kawoteththata bolla pirdiza wode
iza cenggurssay
biitta gaxa gakkanaas siyettana;
izi as ubbaa bolla pirdana;
iitatakka mashshas
aaththi immana› » gides.
32 GODAY Ubbaafe Wolqqama Xoossay,
«Be7a, iita miishshi kawoteththaafe
kawoteth aakki aakki bides;
sa7a gaxappe wolqqama gote
carkoy dendides» gees.
33 He woden GODAY wodhidayta ahay
biitta gaxaappe biitta gaxa gakkanaas
porccu gi kundana;
isttas yeekettenna;
istta ahay shiiqennanne moogettenna;
biitta bolla buura mala olettana.
34 Intteno heenththanchchatoo!
Yeekkitenne waassite.
Intteno wudaa heemmizaytoo!
bidinththan genderettite.
Intte shukettana
wodey gakkida gishshas
lo7i medhettida mana miishshi
tinchchettiza mala
intte kundi tinchchettana.
35 Heenththanchchati baqatizasoy deenna;
wude heemmizayti kessi ekki
attizasoy baa.
36 GODAY istti heemmizasoho
dhayssida gishshas heenththanchchata waasonne
wude heemmizayta yeeho siyite.
37 GODAA hanqo seela gaason
saro biittay bula gidana.
38 Gaammoy ba aqizasoppe yeggi biza mala
un7eththizayssa mashshafenne
GODAA hanqofe dendidayssan
istta biittaya bula gidana.