59
Sa7ooli Dawite wodhanaas kiittida asati iza keeththaa dooddi uttida wode Dawiti zammareta kaabbos, «Dhayssofa» geetettiza diiththa giigson shiishshida woosa mazamure
1 Abeet ta Xoossawu!
Ta morkketappe
tana ashsha;
ta bolla dendizaytappe
tana naaga.
2 Iita ooththizaytappe
tana maadda;
suuth gussiza asatappe
tana ashsha.
3 Abeet GODAWU!
Istti tana wodhanawu
zamadidi naagizayssa be7a!
menxe iita asati
tani mooronne
nagara ooththontta dishin
ta bolla duulateettes.
4 Aykko mooro ta ooththontta dishin
tana dhayssanaas giigettida;
hayssa neni be7ada
tana maaddana denda.
5 Abeet GODAWU!
Ubbaafe Wolqqama Xoossawu!
Neni Isra7eele Xoossa;
kawoteththata ubbaa
qaxxayanaas ne beegga;
makkalla ooththizayta maaroppa.
6 Istti kana mala hoskkattishe
katama giddon yuuyi pe7idi
omars simmana.
7 Istta doonappe kezizayssa siyite!
istta inxarsay mashsha mala;
istti, «Oonee nuna siyanay?»
gi qoppeettes.
8 Gido attiin abeet GODAWU!
Neni istta bolla miiccaasa;
kawoteththata ubbaa kadhaasa.
9 Ta Xoossawu!
Ne taas miixa gidida gishshas
ta nenan ammanettays.
10 Ta Xoossay ba mernaa siiqon
tanara gayttana;
ta morkketa kundeth
izi tana bessana.
11 Abeet nuus gondalle gidida
Godawu! Ta asay
neni halo kessizayssa
balontta mala
neni istta wodha dhayssofa;
gido attiin ne wolqqan
istta laallanne kawushsha.
12 Istti bantta doonappe
kessiza nagara gishshas,
bantta inxarsaa qaala gishshas,
istti qanggida qanggeththa
gishshassinne
wordotiza gishshas
bantta otoreteththan oyketetto.
13 Ne hanqon istta dhayssa;
istta mulera dippi histta;
he wode Xoossi
Yaaqoobe zereththa
ayssizaadenne
sa7a gaxa gakkanaas diza deraa
haarizaade gididayssa
asi ubbay erana.
14 Istti kana mala hoskkattishe
katama giddon yuuyi pe7idi
omars simmana.
15 Istti miza miish hasishe yuuyeettes;
kallontta aggiko
kana mala laweettes.
16 Gido attiin tani
ne wolqqa sabbana;
maalado maalado
ne mernaa siiqo gishshas
yexxana.
Neni taas meto gallas
zempponne baqata attiza miixa.
17 Abeet Xoossawu!
Ta wolqqay nena;
ne taas miixa;
ne mernaa siiqon tana siiqaasa;
hessa gishshas galata yeththan
ta nena sabbana.