2Taarike Maxaafa
Giddo Qofa
Nam7anththo taarike maxaafay koyro taarike maxaafay eqqidasoppe doommees. Hessika kawo Solomooney kawotida wodeppe doommidi izi hayqqida wode gakkanaassa (1-9). Iyorba7aame kaaleththon pudeha baggara diza qommoti ba aawa Solomoone sohon kawotida Yuhuda kawo Erobi7aame bolla istti makkallida hanoza yootidaappe guye Yesusi yelettanaappe kase 586 layththan Yerusalaamey laalettida wode gakkanaas dugeha baggan diza Yuhuda kawoteththa taarike issi bolla gaththi yootees (10-36).
Ha Maxaafay Oykkida Kumeththa Qofa
Solomoone erateththinne iza aqota 1:1-17
Xoossa Keeththa keexonne anjjiso 2:1—7:22
Solomoone woden oosettida hara oosota 8:1—9:28
Solomoone hayqo 9:29-31
Pudeha baggara diza Isra7eele asay Erobi7aame bolla denth 10:1-19
Yuhuda dere kawota 11:1—28:27
Kawo Hizqiyaasanne Asoore dere asaa worajja 29:1—32:33
Kawo Minaasenne kawo Amoone 33:1-25
Kawo Iyosiyaasanne Xoossa woga maxaafa 34:1—35:27
Yuhudas wurseththa kawota 36:1-16
Yerusalaame laaleteththinne asay Baabiloone di7etti buus 36:17-21
Faarise kawo Qiroosi Ayhuda asay Yuhuda simmana mala immida piqaade 36:22-23
1
Aadho Erateth Ekkanaas Kawo Solomoone Woosa
(1Kawo 3:1-15)
1 Dawite naa Kawo Solomooney ba kawoteththan minnides; GODAA iza Xoossay izara gidida gishshas iza keehippe gitasides.
2 Solomooney Isra7eele ubbaa, shaalaqata, mato halaqata, daannata, Isra7eele asaa kaaleththiza ubbatanne soo asaa halaqata xeygi shiishshides.
3 Hessafe guye Solomooneynne shiiqida asay ubbay Geba7oonen de7iza goynniza dhoqqa soho bides; ays giikko GODAA aylle Musey bazzon ooththida Xoossa Dunkaaney heen dees.
4 Kase Dawiti Xoossaa Taabotaas Yerusalaamen dunkaane tolides; Xoossaa Taabotaa Qiriyaate-Yi7aarime katamappe ba giigsi woththida soho ehides.
5 Huures naaza naa, Uure naa Basli7eeley xarqimalappe ooththida yarshosoy Geba7oonen GODAA Dunkaaneza sinththan dees. Solomooneynne shiiqida asay GODAAS heen goynnida.
6 Solomooney Xoossaa Dunkaaneza sinththan de7iza xarqimalappe oosettida yarshosozakko, GODAA sinth biidi, 1,000 xuugettiza yarsho yarshides.
7 He gallassa omars Xoossi Solomoones qonccidi, «Ta nees ay immana mala koyay?» gides.
8 Histtiin Solomooney Xoossaa, «Neni ta aawa Dawites gita kiyateth ooththadasa; tanakka izasohon kawoththadasa.
9 Ha7ikka abeet ta GODAA Xoossawu! Ne tana sa7an de7iza gudulla mala corattida asaa bolla kawoththida gishshas kase ne ta aawa Dawites gida qaalay poletto.
10 Tani ha deraa kaaleththana mala aadho erateththinne akeeka taas imma; histtontta aggiko hayssa gita deraa neyssa ooni ayssanaas dandayzee?» gides.
11 Xoossika Solomoones, «Neni dureteth, woykko aqota demmanaas, woykko bonchchettanaas, woykko ne morkketi hayqqana mala, woykko nees adussa layththi imettana mala oychchabeekka; gido attiin ne wozina amoy tani nena istta bolla kawoththida ta asaa ayssanaas aadho erateththinne akeeka gidida gishshas,
12 tani nees aadho erateththinne akeeka immana; qasse neeppe kase de7ida kawotas woykko neeppe guyen yaana kawotaskka baynda dureteth, aqotanne bonchcho tani nees immana» gides.
13 Hessafe guye Solomooney Xoossa Dunkaaney Geba7oonen de7iza zumbullaafe Yerusalaame simmidi Isra7eele bolla kawotides.
Kawo Solomoone Minoteththinne Iza Dureteth
(1Kawo 10:26-29)
14 Solomooney para-gaaretanne parata shiishshides; izas 100 para-gaaretinne 12,000 parati deettes; izi istta para-gaareta katamataninne ba de7iza Yerusalaame kataman woththides.
15 Kawozi worqqanne bira Yerusalaamen shuchcha mala korides; zigakka shaara menththon dicciza eththa miththaththo corattana mala ooththides.
16 Solomoone parati Gibxeppenne Qaawe geetettizasohoppe yida; kawoza zal7anchchati istta Qaaweppe shammi ehida.
17 Istti issi issi para-gaare 600 saqile biran, issi issi para 150 saqile biran Gibxeppe shammi shammi ehidi Hiiteta kawotassinne Aaraame kawotas bayzeettes.