2Sameela Maxaafa
Giddo Qofa
Nam7anththo Sameela maxaafay koyro Sameela maxaafappe kaallizayssa gidishin Dawiti koyro dugeha baggara Yuhuda kawo [1-4], guuththara gam7ishe pudeha baggara diza Isra7eelekka gujjidi dere ubbaas kawo gididi haaridayssa yootiza taarike [5-24]. Maxaafazi Dawiti ba kawoteththa aassanaassinne ba maataa minththanaas deraa giddoninne deraappe karera diza morkketara izi baaxetida mino baaxe paatti yootees. Dawiti ammanon minonne Xoossa siiqizaade; hessaththoka dereza achchan ammanettidaade gididayssa qonccisees; haraykka izi issi issi wode menxe iita ooso ooththizayssanne ba asho amo polanaas daro iita nagara ooththidayssa paatti yootees. Gidikkoka Xoossa nabe Naataaney izakko shiiqidi izi ooththida nagara iza erisiin izi ba nagaraa paaxidi Xoossi izas immida qixaateza ekkides.
Dawite de7oynne izi ooththida oosoy Isra7eele asaa daro lo7ida gishshas izappe kaalliza wodetan deraa bolla metoy gakkishin gakkishin istti banttas hara kawoththanaas koyza wode, Dawite naa woykko Dawite zare gididi Dawite mala ayssiza as demmanaas amotteettes.
Ha Maxaafay Oykkida Kumeththa Qofa
Yuhudan Dawite kawoteth 1:1—4:12
Kumeththa Isra7eelen Dawite kawoteth 5:1—24:25
Izas koyro kawoteththa layththata 5:1—10:19
Dawitenne Bersaabeho 11:1—12:25
Metonne waaye 12:26—20:26
Wurseththa layththata 21:1—24:25
1
Dawiti Sa7oole Hayqo Sis
1 Sa7ooli hayqqidaappe guye Dawiti Amaaleeqe asaa oli xoonidi simmides; Xigilaagenkka nam7u gallas gam7ides.
2 Heedzdzanththo gallas daakettida may7o may7idi ba hu7e bolla gudulla laallidi issi naateththa naa dayssi Sa7oole gutappe yides. Dawitekko gakkida mala zaqulth zirxxi giidi bonchchos kushe denththides.
3 Dawitikka iza, «Ne awappe yadii?» giidi oychchides.
Izi qasse, «Tani Isra7eele asay dizasoppe kessa ekka yadis» gides.
4 Dawiti qasse iza, «Aazee waaniday ane taas ubbaa yoota» giidi oychchides.
Izikka Dawites, «Asazi olasoppe baqatides; daroy kundides; Sa7oolinne iza naa Yoonataaney hayqqida» gides.
5 Hessafe guye Dawiti woreza izas yootida naaza, «Sa7oolinne iza naa Yoonataaney hayqqidayssa aazan eradii?» gi oychchides.
6 Woreza izas yootida naateththa naazi izas zaaridi, «Toorontta dashe tani pude Gilbo7a zuma bolla kezadis; Sa7ooli heen ba toora bolla zemppi dishin para-gaaretinne toga asay goodereththishe iza bolla gakki wodhdhida.
7 Izikka guye simmi xeellidi tana be7idi xeygides; tanikka, ‹Ta nees ay ooththoo?› gadis.
8 «Izikka tana, ‹Ne oonee?› gi oychchides. Tanikka izas, ‹Tani Amaaleeqe asa› gaada yootadis.
9 «Izikka taas, ‹Ta hayqqanaas toqqays; gido attiin taas shemppoy kezontta ixxides; zay haa ya; tana shempisa› gides.
10 Histtiin tani izi kundichchidaappe guye izi attonttayssa erada ta izakko shiiqada iza wodhadis. Iza hu7e bolla diza kallachchazanne iza qese sagayoza ekkada hekko ta godaas ehadis» gides.
11 Hessafe guye Dawitinne izara diza asay ubbay bantta may7o daakkida.
12 Istti mashshan siifettida gishshas Sa7oolessinne iza naa Yoonataanes, GODAA olanchchatassinne kumeththa Isra7eele asaas kayottida, yeekkidanne omars gakkanaas xoomida.
13 Dawiti qasse he woreza izas ehida naateththaza, «Ne awappe yadii?» gi oychchides. Naazikka, «Tani ne deren beti diza Amaaleeqe asa naa» gides.
14 Dawiti qasse, «Histtiin neni GODAY tiydayssa dhayssanaas ne kushe waana xala denththadii?» gi oychchides.
15 Hessafe guye Dawiti naateththatappe issaa xeygidi, «Neni izakko shiiqada iza wodha» gides. He naateththazi Amaaleeqeza caddi wodhides.
16 Dawitikka Amaaleeqeza, « ‹GODAY tiydayssa tani wodhadis› gaada ne bolla nerkka ne markkattida gishshas ne suuththaa gomey ne bolla gido!» gides.
Sa7oole Gishshassinne Yoonataane Gishshas Shiiqida Zilassa Ginxo
17 Dawiti Sa7oole gishshassinne Yoonataane hayqo gishshas zilalishe yeekkides.
18 Qasseka, «Wondafe milas» geetettiza zilasaa Yuhuda deraa tamaarsana mala azazides. Hessi Yashaare Maxaafan xaafeti uttides.
19 «Haysso Isra7eelee!
Ne bonchchoy zumbullata bolla
cadetti hayqqides;
ola qarati waani
hayssaththo kundidoo!
20 «Filisxeeme macca nayti
ufayettontta mala,
qaxxarettontta asaa macca nayti
ililontta mala,
hayssa Geeten woresopite;
Asqeloonankka awajjofte.
21 «Intteno Gilbo7a zumatoo!
Intte bolla iray bukkofo;
xaazaykka intte bolla dooppo;
yarshos gidiza kaththi
intte goshsha biittan mokkofo.
Heen ola qaraza
gondalley tunides;
Sa7oole gondalley
hayssafe guyen
zayten qucettenna.
22 Yoonataane wondafey
wodhontta simmi erenna;
Sa7oole mashshayka
morkke qanxxereththi yeggees;
Wolqqamatakka
menththereththi yeggees;
iza morkketakka wodhides.
23 «Sa7oolinne Yoonataaney
shemppora paxa dishe
siiqettizaytanne qofan gayttizayta.
Hayqqisheka shaakettonttayta;
golle kafoppe pilatizayta;
gaammofekka minnizayta.
24 «Intteno Isra7eele maccassatoo!
Ochcha teera misatiza al7o
qamisa inttena mayzida;
intte may7oza worqqa
xibaben alleqissida;
Sa7ooles yeekkite.
25 «Ola qarati waani hayssa mala
olason kundidoo!
Yoonataaney ne zumbullata bolla
cadetti hayqqides.
26 Ta isha Yoonataanee!
Tani ne gishshas kayottadis;
ne taas keeha al7okoshin;
ne siiqoy tana
malalisizaazakkoshin
macca siiqoppeka keehi
aadhdheeskoshin.
27 «Ola qarati waani kundidoo!
Ola massaratikka waani
hada gidanee!»