36
1 “Yo, walala yurru ŋuriŋiyi yolŋu'‐yulŋuyu djämanydja djan'kukuma yana ŋunhi nhaltjarra ŋayi Garrayyu yukurrana ḻakaraŋala.”
2 Bala walalanydja ḏarramuwurruyunydja ŋuli yukurranha djämanydja,
3 ga bitjana liŋgu walala yolŋu'‐yulŋuyunydja ŋuli yukurranha gänhana ḻatju'na girri' ŋulaŋuru wäŋaŋurunydja, dhuḏikurru‐ŋäthilina, biyapulnha marrtjinya bukulili ŋal'maranha.
4 Bala walala ŋunhi djämamirriyunydja walalay waŋana Mawtjitjnhana,
5 “Way, liŋguna dhuwala, gana'na yulŋunydja. Bala walalanydja yukurra yolŋu'‐yulŋuyunydja mukthun warray gäma lili,” bitjarra.
6 Bala ŋayi Mawtjitjthunydja djuy'yurruna dhäruknha djunuma wäŋalilinydja, “Liŋguna dhuwala, gana'na yulŋunydja. Yakana biyapulnydja walala gäŋa lili.” Bala walala yolŋu'‐yulŋunydja ḏaḏawyurrunana; yakana biyapulnydja gäŋala,
7 ŋunhina liŋgu walala ŋunhi buku‐waŋganynha gäŋalanydja, gana'na yana ŋuriki djämawu dhawar'maranharawuna.
Walala djämanydja ŋunhiyi Withiyanminyarawuynha Buṉbu Godkuna
36:8—39:43 (They built the tent of the Lord’s presence)
8-38 Yo, djämanydja walala yukurrana ŋunhiyi Garraywu buṉbunydja ŋuriŋiyi Betjalilyu ga wiripu‐guḻku'yu gaḏamanmirriyu ḏarramuwurruyu, djämanydja walala yukurrana ŋunhiyi dhomalany'tja ḻatju'na miny'tji‐maypamirrina, milkuminy ga ḻingarryinyara ga miku. Ga bitjarrayi walala liŋgu djämayi lanapuny'tja dharpa ŋal'‐ŋalmaraŋala marrtjina ŋurikiyi buṉbuwunydja, bala ŋäkirrmaraŋalana ŋunhiyi waḏaŋgany'tja warrpam'thurruna yana monyguŋala ŋuriŋiyinayi miny'tjimirriyuna dhomala'yu, bala ŋäkirrmaraŋala ŋapa‐ŋayŋunydja ŋunhiyi gaywaraŋu'yuna dhomala'yu. Ga biyapulnydja walala wäyinnha barrwaṉ buyu‐wuṉḏaŋarrnha miku'kuŋala miny'tji djäma, bala yana ŋapa‐ŋäkirrmaraŋalana ŋunhi gaywaraŋu'nhanydja, ga biyapul warraŋullilinydja warrpam'thurrunana buku‐ŋäkirrmaraŋala wäyingalana barrwaṉ'thu ŋuriŋina ḏälyuna wal'ŋu. Ga bitjarrayi liŋgu walala yukurrana djäma dhomala ŋurikiyi djinawa'wunydja wäŋawu dhuyuwunydja, bala dhaŋganhamirriyaŋalanydja ṉapuŋga'kurru yana, ganaŋ'maraŋala ŋärra' wal'ŋu ŋunhiyi Godku nhanŋuway dhaḻakarr.
37:1–9
Ga bitjarrayi liŋgu walala djämayi ŋunhiyi Dhawu'‐nherraṉminyaranydja Bathi, ga dhurrwaranydja ŋurikiyi bathiwu, ŋunhiyina Mel‐wuyunaramirrina dhaḻakarr yäku, ga djämayi ŋayi mali yolŋunhanydja maṉḏanha, djiwarr'wuynhanydja maṉḏanha, gumurr'yunminyara nhinanhara, binbarrnydja bärr'yunmaraŋala ŋunhi Mel‐wuyunaramirrinhanydja yukurrana monyguŋala.
10-29 Ga bitjarrayi ŋayi djäma ŋathawuynydja bala'palanydja, ŋurikiyinydja dharrpalwunydja ŋayaŋay'wu, märrma' ruluwu ga märrma' bäythinyarawuywunydja ŋuriki; ga wiripu lanhdhirra'wuy garwarrwarr' ŋayi djämayi nhära'‐nharanharawu, djarraṯawun' wekanharawunydja. Ga bitjarrayi ŋayi djäma buŋgangu bäw'wunydja dhaliyarra' märr‐nyumukuṉiny', märr yukurra yurru ŋayi gaŋgathirri buŋgan bäwny'tja ŋulaŋuruyi bitjanna liŋgu yurru Garraywu. Ga bitjarrayi ŋayi djämayi weyikany'tja ŋurikiyi lanhdhirra'wunydja, ga djämayi ŋayi buŋgan bäwny'tja bathanarawunydja.
38:1–8
Yo, ga bitjarrayi liŋgu ŋayi djäma yana dhaliyarra' yindinydja wal'ŋu, wäyingunydja bathanarawu, ga yindi wal'ŋu banikin rurrwuyunminyarawu, yurru walala ŋunhi banikin bathalanydja djäma ŋulaŋuru djambaka wal'ŋu bitjan djarrami'yinyara, ŋunhi ŋuli walala dhäykawurru nhänharaminya yukurranha walalanhawuy walala ŋunhimalayi.
9-20 Ga bitjarrayi liŋgu walala djämayi gunganhamirriyaŋala ḻoḻunydja ŋunhiyi buṉbunha, dhaŋganhamirriyaŋala marrtjina ḻiw'maraŋalanydja ŋuriŋina dhomala'yuna buyu‐wuṉḏaŋarrmirriyuna yana gungaŋala warrpam'thurruna, märr yurru walala yolŋu'‐yulŋu gulŋiyirri yukurra ŋuliwitjan dhurrwarakurrunydja ŋunha djinawa'lilinydja dhaḻakarrlili, buku‐ŋal'yunarawuna nhanŋu Godkuna.
39:1–31
Ga bitjarrayi liŋgu walala maryakalnydja djäma ḏalkarra'mirriwunydja walalaŋgu, gäna wal'ŋu girri', märr walala yurru gärri yukurra ŋunhimala Ganaŋ'maranharawuylili Wäŋalili, Garraynha gumurr‐watjman ŋurikimirrinydja girri'mirri yana. Ga nhanŋu Yärungunydja walala djäma ḻatju' girri' dhika wal'ŋu, miny'tjimirri, yurru nhanŋunydja ŋunhi girri' gäna yana nhanŋuway wal'ŋu ŋurikiyi ŋurruŋuwu ḏalkarra'mirriwu. Yurru mayali'mirri ŋunhiyi girriny'tja bukmaknha yana ŋunhi walala yukurrana djämanydja.
32-43 Yo. Djämanydja walala ŋunhi bukmaknha yana, dhawar'maraŋalana warrpam'nha, balanyarana liŋgu ŋunhi yulŋunydja djan'ku yana bitjarra ŋayi Garrayyu ḻakaraŋala yukurrana Mawtjitjkala. Yo, dhawar'maraŋalanydja walala bukmakkuŋala yana, bala yana ŋuliŋurunydja waŋgany‐mana'manaparanydja. Bala Mawtjitjthunydja nhäŋa'‐nhaŋalana marrtjina mala‐yarr'yurrunana, nhäŋalanydja marrtjina ḻatju'mirri warray dhika yana, ŋulinyara yana bili ŋunhi ŋayi Garrayyu ḻakaraŋala yukurrana. Bala ŋayi Mawtjitjtja wokthurrunana wirrkina walalambala, buku‐wurrpara ŋurikiyyi djämawuynydja.
God gulŋiyinanydja ŋayi, bala nhinana wäŋaraŋalana ŋunhiliyi buṉbuŋuranydja
40:1–38 (God’s glory filled the Tabernacle)
40:1–15
Bala ŋayi Garraynydja waŋana Mawtjitjkala bitjarrana, “Gatjuy ŋal'maraŋunydja nhuma boŋguŋu dhuwali buṉbunydja ŋarraku, bala nherru'‐nherruluna marrtji bukmakkuŋuna djinawa'lilina, bala ŋämiluna marrtji weyika'yuna ŋunhiyi malanha bukmakkuŋuna yana, ganaŋ'maraŋuna ŋunhiyinydja ŋarrakuwaynha wal'ŋu. Ga biyakayi gäŋa Yärunnhanydja ga nhanŋu gäthu'mirriŋunha walalanha ŋunhamala dhurrwaralili wal'ŋu ŋunhi buṉbulili, nhuma yurru walalanha ganaŋ'marama ŋunhiliyinydja, märr yurru walala ŋarrakuway yana ḏalkarra'mirri walala gupaḏalnha‐wala.”
16-29 Bala ŋayi Mawtjitjthu djämanydja bukmakkuŋalana yana, bitjarrana liŋgu yana ŋunhi Garrayyu nhanukala ḻakaraŋala; walala djäma ŋunhiyinydja buṉbu, bala nherra'‐nhirrarana marrtjina ŋunhiyi dharrpalnydja malanha girri' ŋunhiwalana wal'ŋu djinawa'lilina buṉbulili. Rulwaŋdhurrunanydja ŋayi dhuyuna rruthi, ŋathanydja ŋunhiyi 12 ŋunhiwala bala'palalilinydja, ga bitjarrayi liŋgu lanhdhirrany'tja ŋayi dhuŋgur'yurrunana, ga bitjarrayi liŋgu ŋayi djalkthurruna buŋgan bäwny'tja ŋunhimalayi yutjuwaḻa'lili dhaliyarra'lili, märr yurru ŋayi yukurra ŋunhi buŋgan ŋawululny'tja gaŋgathirrina nhanŋu Garraywuna. Ga bitjarrayi liŋgu ŋayi nherrara banikin ŋunhi bathalanydja wal'ŋu ŋuriki rurrwuyunminyarawunydja ga barŋ ŋunhiyi, maṉḏa yukurrana ŋunhiyi dhärrananydja ga warraŋul ŋunhili buṉbuŋura, dhurrwaraŋura wal'ŋu, yurru ḻoḻunydja ḻiw'maranhara gunganhara ŋunhi.
30-32 Bala ŋayi Mawtjitjthu rarr'yurruna gapuna ŋunhiwalayinydja banikin'lili yindililinydja, bala garr'yurruna gäŋalanydja Yärunnhana ga gäthu'mirriŋunha walalanha, bala walala yukurrana rurrwuyunminana ŋunhiliyinydja ŋarambiya'na ga djalkirina. Yo, bitjana liŋgu walala ŋuli rurrwuyunminyanydja ŋäthilinydja, yurruna walala yurru gulŋiyirri ŋunhimalayi buṉbulilinydja, ga marrtji galkithirri ŋunhimala barŋlili.
33 Yo, ŋayi Mawtjitjthu nherra'‐nhirrarana ŋunhiyi ḻoḻunydja ḻiw'maraŋalana yanana ŋunhina buṉbunhanydja, bala djäma dhurrwaramirriyaŋalana. Ga bitjarrayina ŋayi ŋunhi dhawar'maraŋalanydja warrpam'thurruna yana.
34 Bala ŋayi ŋunhiyi maŋandja dhunarranana dhunupana yana, bala ŋäkirrmaraŋalana ŋunhi wäŋanhanydja buṉbunhanydja, bala yana ŋunhi djinawany'tja dhaŋaŋdhinana warrpam'nha ŋayipina djarraṯawun'thuna, ḻatju'yuna dhikana, ga wäŋanydja ŋunhi warrpam'nha djeŋarra'yina nhanukiyingalana ŋayi baḏayala'yu.
35 Yakana ŋayi Mawtjitj gulŋiyinanydja ŋunhimalayi buṉbulilinydja, liŋgu Garrayyunydja ŋayipinydja ŋuriŋi djarraṯawun'thunydja warrpam'nha dhikana gungaŋala ŋunhiyi buṉbunhanydja.
36 Ga bitjanana liŋguna maŋandja ŋunhiyi ŋuli yukurranha djingaryunana yana ŋunhilina bäyma buṉbuŋurana. Wiripunydja ŋuli ŋunhiyi waŋupini yana gaŋgathinya, bala dhawuṯthunana, bala walala ŋuli yolŋu'‐yulŋunydja ŋunhiyi ḏurryunana, dhoṯkunhana marrtjinya girriny'tja, bala yana wäŋganhana ŋuli, malthunana ŋurikiyina maŋanguna, ŋunhi ŋayi ŋuli ŋurru‐warryunna walalanha.
37 Ga ŋunhi ŋayi ŋuli maŋan ŋunhiyi yaka gaŋgathinya, walalanydja ŋunhiyi yolŋunydja walala ŋuli nhinanha yukurranha ŋunhili bäyma wäŋaŋura, yana liŋgu ga biyapul ŋayi ŋuli ŋunhiyi gaŋgathinya maŋan.
38 Bitjarrana liŋguna ŋayi yukurrana walalanha monyguŋalana yulŋunydja ŋuriŋiyi Garraywalaŋumirriyunydja waŋupini'yu, ŋunhi walala yukurrana marrtjina bala. Ga walu‐ŋupananydja ŋayi yukurranha maŋandja ŋuli djingaryunana yana ŋunhilimi Ganaŋ'maranharawuyŋuranydja Buṉbuŋura, ga munhakunydja ŋayi ŋuli ŋunhiyi maŋan wiriputhinyana bitjanana bitjan ŋuli gurtha nhäranha waŋupini'ŋura. Ga bukmakthu ŋuriŋiyi yolŋu'‐yulŋuyu Yitjuralpuyŋuyunydja yukurranha nhänhana ŋuli yana, ŋunhi ŋayinydja Garraynydja walalaŋgala ŋunhilimi ṉapuŋga.