እብራወ አሳስ
ፃፈትዳ ኪታ
ጋꬃ ቆፋ
ሀ ኪታይ ፃፈትዳይ፥ ዎልቃማ መቶይ ጋክን፥ ባንታ አማኑዋ አጋናዉ ማትዳ አማንያ አሳሳ። ሀ ማፃፋ ፃፈይ፥ የሱስ ክርስቶሲ ዉርሰꬅነ ቱማ ፆሳ ቆንጨꬅ ግደይሳ እብራወ አሳስ በሴስ። አማንያ አሳይ ባንታ አማኑዋን ምናና መላ ኤንታ ምንꬄስ። እ ሄሳን ሄꬑ አይፈ ቆፋታ ቆንጭስድ በሴስ።
1. የሱሲ ባ ኤክዳ መቱዋን አዋስ ቱማ ኪተትዳ መርና ፆሳ ናአ። እ ፆሳ ናአ ግድዳ ግሾ፥ ጋልአ ጫቁዋ ዎደ ደእያ ናበታፐ፥ ኪታንቾታፐነ ሙሰፐ ቦላ።
2. የሱሲ ጋልአ ጫቁዋ ካህነታፐ ዳሮ አꬍያ መርና ካህነ ግደይሳ ፆሳይ ባ ሁጰን ማርካትስ።
3. የሱሳ ባጋራ አማንያ አስ ናጋራፐ፥ ያሻፈነ ሀይቆፐ አቴስ። የሱሲ ካህነ ሀላቃ ግደይሳዳ፥ ካሰ እብራወታ አማኖ ዎጋንነ መሄ ያርሾን ኩያዳ በንትያ አቶተꬃ ኦሱዋ ሀእ ቱማ ኦꬅስ።
ፃፈይ እስራኤለ አሳ ታርከን ዳሮ ኤረትዳ አሳ አማኖ ሌምሶ ኦꬅ ኤክድ (ሸም 11) ሀ ማፃፋ ናባብያ አሳይ ባንታ አማኑዋን ምናና መላ አኬክሴስ። ሄሳዳካ፥ ሸምፖ 12 ናባብያ አሳይ ባንታ አይፍያ የሱሳ ቦላ ዎꬅድ፥ ባንታ አማኑዋን ምናና መላነ አይ መቶይነ ዋየይ ጋክኮካ፥ ገንጫና መላ ዞሬስ። ዉርሰꬃን ዞረንነ አኬክሶ ቃላን ባ ኪታ ኩዬስ።
ማፃፋ አይፈ ቆፋታ
ፆሳይ ክርስቶሳ ባጋራ ቆንጭስ (1:1-4)
ክርስቶስ ኪታንቾታፐ ቦላ (1:4—2:18)
ክርስቶስ ሙሰፐነ እያሱፐ ቦላ (3:1—4:13)
ክርስቶሳ ካህነተꬃይ ቦላ (4:14—7:28)
ክርስቶሳ ጫቆይ ቦላ (8:1—9:22)
ክርስቶሳ ያርሾይ ቦላ (9:23—10:39)
አማኖ ባይራተꬅ (11:1—12:29)
ፆሰ ኡፋይስያ ደኦ (13:1-19)
አኬክሶነ ዞረ (13:20-25)
1
ናአይ ኪታንቾታፐ ቦላ
1 ካሰ ፆሳይ፥ ኑ አዋታስ ናበታ ባጋራ ዱማ ዱማ ኦገን ዳሮ ዎደ ኦድስ።
2 ሽን ሀ ዉርሰꬃ ዎድያን ኡባ እያ ላትስዳ ቃስ አላመ እያ ባጋራ መꬍዳ ባ ናኣ ባጋራ ኑስ ኦድስ።
3 ናአይ ፆሳ ቦንቹዋ ጶለꬃነ ኩመꬃ ፆሳ ፆሳተꬃ ኤክድ፥ ባ ዎልቃማ ቃላን ሀ አላምያ ካትስድ ኦይክስ። አሳ ኤንታ ናጋራፐ ጌሽዳፐ ጉየ ኡባፈ ቦላ ፆሳ ኡሻቻ ባጋን ሳሉዋን ኡትስ።
4 እያዉ እመትዳ ሱንꬃይ ኪታንቾታ ሱንꬃፈ ቦላ ግደይሳዳ እ ኤንታፈ ቦላ።
5 ህዛ፥ ፆሳይ ኪታንቾታፐ ኦደኮ፥
“ኔኒ ታ ናአ፤
ታ ሀች ነዉ አዋ ግዳስ” ግዴ?
ዎይኮ ቃስ ኦደኮ፥
“ታኒ እያዉ አዋ ግዳና፤
እካ ታዉ ናአ ግዳና” ግዴ?
6 ቃስ ፆሳይ ባ ባይራ ናኣ ሀ አላምያ ኪትሸ፥
“ፆሳ ኪታንቾት ኡባይ እያዉ ጎይኖ”
ያግስ።
7 ፆሳይ ኪታንቾታባ ኦድሸ፥
“ፆሳይ ባ ኪታንቾታ ጫርኮ፥
ባ አይለታ ታማ ላጮ ኦꬄስ”
ያጌስ።
8 ሽን ባ ናአባ ኦድሸ፥
“ፆሳዉ፥ ነ አራታይ መርናዉ ደኤስ።
ነ ካዎተꬃ ነ ፅሎተꬃን አይሳሳ።
9 ኔኒ ፅሎተꬅ ዶሳዳሳ፤ ኢታ እፃዳሳ።
ፆሳይ፥ ነ ጎዳይ፥ ነና ነ ላገታፐ አꬅድ ዶርስ፥
ኡፋይሳ ዛይተ ነና ትይስ”
ያጌስ።
10 ፆሳይ ዛሪድ፥
“ጎዳዉ፥ ኮይሮ ኔኒ ሳአ መꬋዳሳ፤
ሳሎት ነ ኩሸ ኦሶ።
11 ሄሳት ኡባይ ꬋያና፤
ሽን ኔኒ ዳና።
ኤንቲ ኡባይ አፍላዳ ዉራና።
12 ኔኒ ኤንታ ሳሌናዳ ፃፃና፤
ቃስ ኤንቲ አፍላዳ ላመታና።
ሽን ኔኒ ኡባ ዎደ ነና፤
ነ ላይꬃይካ ዉረና”
ያጌስ።
13 ሽን ፆሳይ ኪታንቾታፐ ኦደኮ፥
“ታኒ ነ ሞርከታ ነ ቶሆይ
የꬍያሶ ኦꬃና ጋካናዉ፥
ሀይሳን ታፐ ኡሻቻ ባጋን ኡታ” ግዴ?
14 ኪታንቾት ኡባይ አቶተꬅ ደማናዉ ደእያ አሳታ ማዳናዉ ፆሳይ ኪትዳ አያናታ ግዶኮናዬ?