4
ድቦራነ ባራቃ
1 ናኦድ ሀይቅዳፐ ጉየ እስራኤለ አሳይ ጎዳ ስንꬃን ዛሪድ ኢታባ ኦꬅዶሶና።
2 ሄሳ ግሾ፥ ጎዳይ ሀፆራ ካታማን ደእያ ካናነ ካዋ እያብሳስ ኤንታ አꬅድ እሚስ። እያ ቶራ ሞጮናይ ሀሮሴት ሀጎይማ ካታማን ደእያ ስሳራ።
3 እያብሳስ ኡዱፉን ፄቱ ብራታ ፓራ ጋረት ደእያ ግሾነ እ እስራኤለ አሳ ቃይ ባይና ላታሙ ላይꬅ ኡንኤꬅዳ ግሾ ኤንቲ ማዶ ደማናዉ ጎዳኮ ዋስዶሶና።
4 ሄ ዎደ ላፍዶታ ማችያ፥ ናብያ ድቦራ እስራኤለ አሳ ካለꬃዉስ።
5 ድቦራ ደረይ ዳርያ ኤፍሬማ ቢታን፥ ራማፐነ ቤተለፐ ግዶን ደእያ ድቦራ ዛምባ ጋርሳን ኡታዳ ፕርዳዉሱ። እስራኤለ አሳይ ፕርዳ ደማናዉ ኢኮ ዮሶና።
6 እስ ጋላስ ድቦራ አብኖማ ናኣ ባራቃ ንፍታለመ ቢታን ደእያ ቃደሳፐ ፄግሳዳ፥ “ጎዳይ እስራኤለ ፆሳይ ነና ሀይሳዳ ያግድ ኪትስ፤ ‘ንፍታለመነ ዛብሎና ዛርያፐ ታሙ ሙኩሉ አሳ ኤካዳ ታቦረ ዙማ ቦላ ከያ።
7 ታኒ ያብና ቶራ ሞጮናታ ስሳር ፓራ ጋረታነ ኦላንቾታ ኤክድ፥ ቅሶና ሻፋን ነና ኦላናዉ ያና መላ ኦꬃና። ያን ታኒ ነዉ እያ አꬃዳ እማና’ ያጌስ” ያጋሱ።
8 ባራቅ፥ “ኔኒ ታራ ቢኮ ታኒ ባና፤ ሽን ኔኒ ታራ ቦና እፅኮ ታኒ ቢከ” ያግስ።
9 እያ ዛራዳ፥ “ኤሮ፥ ታኒ ኔራ ባና፤ ሽን ጎዳይ ስሳራ ማጫሳ ኩሸን አꬅድ እማና ግሾ ታ ቡሳይ ነዉ ቦንቾ ግደና” ያጋሱ። ሄሳ ግሾ ድቦራ ደንዳዳ፥ ባራቃራ ቃደሳ ባሱ።
10 ባራቅ ንፍታለመነ ዛብሎና ኮቻታ ቃደሳ ፄግን፥ ታሙ ሙኩሉ አስ እያ ካልድ ከይስ፤ ድቦራካ እያራ ባሱ።
11 ሄ ዎደ ቄና አስ ግድዳ ሄቤር፥ ሙሰ ቦሎይ፥ ሆባባ ያራይ ሀራ ቄናታፐ ሻከትድ ቃደሳ ማታን ዘናንመን ደእያ ዎላ ማታን ባ ዱንካንያ ቶክስ።
12 አብኖማ ናአይ ባራቅ ታቦረ ዙማ ብዳይሳ ስሳር ስእዳ ዎደ፥
13 ኡዱፉን ፄቱ ብራታ ፓራ ጋረታነ ባራ ደእያ አሳ ኡባ ፄግስድ፥ ሀሮሴት-ሀጎይማፐ ቅሶና ሻፋ ሺሽስ።
14 ያትን ድቦር ባራቃኮ፥ “ሀች ጎዳይ ስሳራ ነ ኩሸን አꬅድ እምያ ጋላስ ግድያ ግሾ ደንዳ። ሄኮ፥ ጎዳይ ነዉ ስን አꬍስ” ያጋሱ። ባራቅ ታሙ ሙኩሉ ኦላንቾታ ካለꬅድ፥ ታቦረ ዙማፐ ዎꬍስ።
15 ጎዳይ ስሳራ፥ እያ ፓራ ጋረታነ እያ ኦላንቾታ ኡባ ባራቃ ማሻስ አꬅድ እሚስ። ያትን፥ ስሳር ባ ፓራ ጋርያፐ ዎꬍድ ቶሆን ባቃትስ።
16 ባራቅ ፓራ ጋረታነ ኦላንቾታ ሀሮሴት-ሀጎይማ ጋካናዉ የደꬅስ። ስሳራ ኦላንቾት ኡባይ ማሻን ሀይቅዶሶና፤ እስ አስካ አትቤና።
17 ሄ ዎደ ሀፆራ ካዎይ ያብን ሄቤራ ኬꬃ አሳራ ሳሮ ደኤስ። ሄሳ ግሾ፥ ስሳር ቶሆን ባቃትድ፥ ቄና አስ ግድዳ ሄቤራ ማቸ ያኤል ዱንካንያ ጋክስ።
18 ያኤላ ስሳራ ሞካናዉ ከያዳ፥ “ታ ጎዳዉ፥ ገላ፤ ሃ ገላ፤ ያዮፋ” ያጋሱ። እ ዱንካንያ ግዶ ኢኮ ገልን እያ አፍላራ ካማስ።
19 ስሳር፥ “ታና ሳሜስ፤ ሃ ታና ኡሻርክ” ያግስ። እያ ማꬃ ኦጎሮ ዶያዳ ኡሻሱ፤ ያታዳ ዛራዳ ካማሱ።
20 ሄሳፈ ጉየ፥ እ፥ “ዱንካንያ ፐንገን ኤቃ። አይ አስካ ይድ፥ ‘ሀይሳን አስ ደኢ?’ ያግድ ኦይችኮ፥ ‘ባዋ’ ያጋ” ያግስ።
21 ስሳር ዳሮ ዳቡርዳ ግሾ ꬍስኮ ሀይቅ አግስ። ሄቤራ ማችያ ያኤላ ናርቃነ ዱንካነ ꬍሸ ኤካዳ፥ ሎዳራ እያኮ ሺቃዳ ꬍሽያ ሀይꬃ ካረን ꬍሻዳ፥ ሳአራ ኦይꬅን ስሳር ሀይቅስ።
22 ባራቅ ስሳራ ኮይሸ ይን፥ ያኤላ እያ ሞካናዉ ካረ ከያዳ፥ “ሃያ፤ ነ ኮይያ አድያ ታኒ ነና በሳና” ያጋሱ። ሄሳ ግሾ፥ ኢራ ዱንካንያ ግዶ ገልድ፥ ስሳራ ሀይꬃ ካረን ꬍሸይ ገልን እያ አሀይ ሳአን ዝንእዳይሳ በእስ።
23 ሄ ጋላስ ፆሳይ እስራኤለ አሳይ ካናነ ካዋ ያብና ፆናና መላ ኦꬅስ።
24 ያብና ካዋ ꬋይሳና ጋካናዉ እስራኤለ አሳይ እያ ቦላ ምን ምን ብስ።