16
ካዋ አሳ ዉርሰꬃ ላይꬃታ
(1 ካዎ 15:16-22)
1 አስ ካዎትዳ ሀስታማነ ኡሱፑንꬆ ላይꬃን እስራኤለ ካዎይ ባኦስ ይሁዳ ቦላ ደንድስ። ይሁዳ ካዋ አሳኮ ኦንካ ገሎና መላነ ከዮና መላ ተቃናዉ ራማን ሚፃ ኬፅስ።
2 ካዎይ አስ ፆሳ ኬꬃንነ ባ ካዎ ጋꬎን ደእያ ቡቁራ ምንጅያ ኬꬃፈ ዎርቃነ ብራ ኤክድ ዳማስቆን ደእያ ሶረ ካዋ ዎልደ-አዳራስ ሀይሳዳ ያግድ የድስ።
3 “ካሰ ታ አዋራነ ነ አዋራ ጫቅዳይሳዳ ታራነ ኔራ ጫቆስ። ሄኮ፥ ታ ነዉ ብራነ ዎርቃ የዳስ። እስራኤለ ካዎይ ባኦስ ባ ኦላንቾታ ታ ቢታፈ ከሳና መላ ነ ካሰ እያራ ጫቅዳ ጫቁዋ ላላ” ያግስ።
4 ካዎይ ዎልደ-አዳር፥ አስ ግዳይሳ ኤክድ ባ ቶራ ሞጮናታ እስራኤለ ኦላና መላ የድስ። ኤንቲ እዮና፥ ዳነነ አቤል-ማይማ ጌተትያ ካታማታነ ንፍታለመ ቢታን ደእያ ቡቁራ ምንጅያ ካታማታ ኡባ ፆንዶሶና።
5 ባኦስ ሄሳ ስእድ ራማን ኦꬅያ ሚፃ አጋግስ።
6 ካዎይ አስ ይሁዳ አሳ ኡባ ሺሽስ፤ አሳይ ባኦስ ካሰ ያን ጎኤትያ ሹቻነ ምꬃ ራማፐ ኤክድ ግብአነ ምፅጳ ካታማታን ሚፃ ኬፅስ።
7 ሄ ዎደ ቆንጨꬅ በእያ አናን ይሁዳ ካዋ አሳኮ ይድ፥ “ኔኒ ሶረ ካዋን አማነታዳ፥ ጎዳን ነ ፆሳን፥ አማነታቦና ግሾ ሶረ ካዋ ኦላንቾት ነ ኩሸፐ ከስ ኤክዶሶና።
8 ቶጰነ ሊበ አሳት ዳሮ ፓራ ጋረትነ ፓራት ደእያ ዳሮ ኦላንቾታ ግዶኮናዬ? ሽን ኔኒ ጎዳን አማነትዳ ግሾ ጎዳይ ኤንታ ነ ኩሸን አꬅድ እሚስ።
9 ባ ኩመꬃ ዎዛናን ጎዳን አማነትያ አስ ምንꬃናዉ ጎዳ አይፈይ ሳኣ ኡባ ፄሌስ። ኔኒ ኤያተꬃ ኦሶ ኦꬅዳ ግሾ ህዛፐ ኦል ኔፐ ሻከተና” ያግስ።
10 አስ ቆንጨꬅ በእያ ኡራ ቦላ ዳሮ ሀንቀትዳ ግሾ እያ ሳንꬃላታን ቃችድ ቃሾ ኬꬃን የግስ። አስ ሄ ዎደ እስ እስ አሳታ ዳሮ ኡንኤꬅስ።
11 ሄኮ፥ አስ ኦꬅዳባይ ኮይሮፐ ዉርሰꬅ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትስ።
12 አስ ካዎትዳ ሀስታማነ ኡዱፉንꬆ ላይꬃን ቶሆ ሳከትስ፤ ሳሆይ ዳርኮካ፥ እ አክመታ ኮይስፐ አትሽን፥ ጎዳ ኮይቤና።
13 አስ ካዎትዳ ኦይታማነ እስንꬆ ላይꬃን ሀይቅድ ባ ማይዛታ ጋክስ።
14 ኤንቲ እያ ዳዊታ ካታማን ዛላ ዎጭድ ከስዳ ዱፎን ሞግዶሶና። እያ አሀ ዱማ ዱማ ሽቶን ትየትዳ አርሳ ቦላ ዎꬅዶሶና። ኤንቲ እያ ቦንቹዋስ ዳሮ ምꬅ ዶር ኤꬅድ ዬክዶሶና።