12
ማጫስዉነ ዳውያ
1 ሄሳፈ ጉየ፥ ሳሎን ዎልቃማ ማላት በንትስ። አዋ ማአዳ፥ አጌና ቦላ ኤቃዳ፥ ታማነ ናምኡ ፆልንቶ ካላቻ ባ ሁጰን ዎꬅዳ ደእያ፥ እስ ማጫስያ በንታሱ።
2 ሄ ማጫስያ ቃን፤ ሽን እዮ እቀꬅ ኦይክን ኡንኤታዳ ዋሳሱ።
3 ቃስ ሀራ ማላት ሳሎን በንትስ። ላፑን ሁጰትነ ታሙ ካጨት ደእያ ግታ ዞኦ ዳወይ በንትስ። እ ባ ሁጰታ ቦላ ላፑን ካላቻ ዎꬅስ።
4 ሄ ዳወይ ባ ጎይናን ፆልንቶታፐ ስኩዋ ሳሎፐ ዳፍድ ሳአን የግስ። ሄ ዳወይ ናአይ የለት ዎꬍዳ መላ ምታናዉ ኮይድ፥ የላናዉ ኤቀትያ ማጫሰ ስንꬃን ኤቅስ።
5 ሄ ማጫስያ ካዎተꬃ ኡባ ብራታ ፃምአን ሃራናዉ ደእያ አደ ናአ የላሱ። ናአይ ፆሳኮነ እያ አራታኮ ፑደ ኤከትስ።
6 ማጫስያ 1,260 ጋላስ ጋካናዉ እዮ ናጋና መላ ፆሳይ እዉ ጊግስ ዎꬅዳ በሳ መላ ቢታ ባቃታሱ።
7 ሳሎን ኦል መትስ። ምካኤል ባ ኪታንቾታራ ዳውያራ ኦለትስ፤ ዳወይ ባ ኪታንቾታራ ግድድ ዛር ኦለትስ።
8 ሽን ዳወይ ፆነትድ ሳሎን ኤንታዉ ደእያ በሲ ꬋይዶሶና።
9 ግታ ዳወይ፥ በን ሾሻይ፥ ሳአን የገትስ። እካ ዳቡሎሳ ዎይኮ ፃላሄ ጌተትያ አላምያ ባለይሳ። እ ባ ኪታንቾታራ እስፈ ዱገ አላምያ የገትስ።
10 ሄሳፈ ጉየ፥ ሳሎን ሀይሳዳ ግያ ቃላ ስአስ።
“ሀእ አቶተꬃይ፥ ዎልቃይነ ካዎተꬃይ፥ ኑ ፆሳሳ፤
ማታይ ክርስቶሳስ ግድስ።
ህዛ፥ ቃማነ ጋላስ ፆሳ ስንꬃን፥
ኑ እሻታ ሞተይስ ሳሎፐ ዱገ ሆለትስ።
11 ኤንቲ ዶርሳ ሱꬃንነ ባንታ ማርካተꬃ ቃላን፥
እያ ኦልድ ፆንዶሶና።
ኤንቲ ባንታ ሸምፑዋስ ምሸቶና
ባንታና ሀይቆስ አꬅድ እምዶሶና።
12 ሄሳ ግሾ፥ ሳሎንነ እያ ግዶን ደኤይሳቶ ኡፋይትተ።
ሽን ቢታነ አባ አየ!
ህዛ፥ ፃላሄይ ባዉ ጉꬃ ዎደይ አትዳይሳ ኤርዳ ግሾ፥
ዎልቃማ ሀንቆን ህንተኮ ዎꬍስ”
ያግስ።
13 ቃስ ዳወይ ባና ሳአ የግዳይሳ በእዳ ዎደ አደ ናአ የልዳ ማጫስዉ ጎድስ።
14 ማጫስዉ ሾሻይ ቆሆና መላ ሄꬑ ላይꬅነ ባጋ ማሸነ ኡያሸ እያ ናገትያ በሲ መላ ቢታ ፕራꬋዳ ባና መላ ናምኡ ዎልቃማ አርጋንꬃ ቀፈይ እዉ እመትስ።
15 ያትድ፥ ማጫስዉ ድኦይ ድእድ ኤፋና መላ ዳወይ ሻፋ ሃꬃ መላ ባ ዶናፐ ማጫሰ ጉየራ ጮይስ።
16 ሽን ቢታይ ማጫስዉ ማድስ፤ ቢታይ ባ ዶና ዶይድ ዳውያ ዶናፐ ከይዳ ሃꬃ ምትስ።
17 ሄ ዳወይ ማጫሰ ቦላ ዳሮ ሀንቀትድ፥ እ ኮቻታ፥ ፆሳ ኪታ ናገይሳታነ የሱሲ ቆንጭስዳ ቱማስ አማነትዳይሳታ ኦላናዉ ብድ።
18 አባ ጋፃን ደእያ ሻፍያን ኤቅስ።