3
ሳርዴሳ ዎሳ ኬꬅ
1 “ሳርዴሳ ዎሳ ኬꬃ ኪታንቹዋስ ሀይሳዳ ያጋዳ ፃፋ።
ላፑን ፆሳ አያናታነ ላፑን ፆልንቶታ ኦይክዳይስ ሀይሳዳ ያጌስ፦ ታኒ ነ ኦሱዋ ኤራይስ፤ አስ ነና ፓፃ ደኤስ ጊኮካ፥ ነ ሀይቃዳሳ።
2 ባርካ፤ አትዳ ጉꬃባነ ሀይቃናዉ ማትዳባ ምንꬃ። ነ ኦሶይ ፆሳ ስንꬃን ፖሎ ግዶናይሳ ደማስ።
3 ህዛ፥ ነ ኤክዳባነ ስእዳባ አኬካ፤ ናጋ፤ ነ ናጋራፐ ስማ። ኔኒ ባርኮና እፅኮ ታ ካይሶዳ ያና፤ ታ አይ ዎደ ያነኮ ነ ኤራካ።
4 ሽን ባንታ ማኡዋ ቅታዮና ጉꬃ አሳት ሳርዴሳን ደኦሶና። ኤንታዉ በሲያባ ግድያ ግሾ ቦꬃ ማኦ ማእድ ኤንቲ ታራ ሄመታና።
5 ፆንያ ኦንካ ኤንታይሳዳ ቦꬃ ማኦ ማአና። ታኒ እያ ሱንꬃ ደኦ ማፃፋፐ ቁችከ። ታኒ ታ አዋ ስንꬃንነ እያ ኪታንቾታ ስንꬃን እ ታባ ግደይሳ ማርካታና።
6 ጌሻ አያናይ ዎሳ ኬꬃታስ ግያባ ስእያ ሀይꬅ ደእያ ኦንካ ስኦ።
ፍላደልፍያ ዎሳ ኬꬅ
7 “ፍላደልፍያ ዎሳ ኬꬃ ኪታንቹዋስ ሀይሳዳ ያጋዳ ፃፋ።
ጌሻይነ ቱማንቾይ፥ ዳዊታ ቁልፕያ ባ ኩሸን ኦይክዳይስ፥ ሀይሳዳ ያጌስ፦ እ ጎርድን ኦንካ ዶያናዉ ዳንዳኤና፤ ቃስ እ ዶይን ኦንካ ጎርዳናዉ ዳንዳኤና።
8 ታኒ ነ ኦሱዋ ኤራስ፤ ሄኮ ታ ነ ስንꬃን ኦንካ ጎርዳናዉ ዳንዳኦና ዶያ ፐንገ ዎꬃስ። ነ ዎልቃይ ጉꬃ ግድኮካ፥ ታ ቃላ ናጋዳሳ፤ ታና ካዳባካ።
9 አይሁደ ግዶናሽን፥ ባንታና አይሁደ ግያ ዎርዶታነ ፃላሄ ባጋታ ኔኮ ኤሀናነ ነ ስንꬃን ጉልባትሳና። ታ ነና ዶሰይሳ ኤንታና ኤርሳና።
10 ኔኒ፥ ‘ገንጫ’ ጋዳ ታ ኪትዳ ኪታ ናግዳ ግሾ፥ ኩመꬃ አላምያ ፓጫናዉ ያ ዋየ ዎድያፐ ታኒ ነና ናጋና።
11 ታኒ ኤለሳዳ ያና፤ ኦንካ ነ ካላቻ ኤኮና መላ ነዉ ደእያባ ምንꬃዳ ኦይካ።
12 ፆንዳይሳ ታ ፆሳ ኬꬃን ቱሱ ኦꬃና፤ እ ያን መርናዉ ዳና። ታኒ ታ ፆሳ ሱንꬃነ ታ ፆሳ ካታማ ሱንꬃ እያ ቦላ ፃፋና፤ እያካ ታ ፆሳ ማታፐ ዎꬍያ ኦራꬃ የሩሳላመ። ቃስ ታኒ ታ ኦራꬃ ሱንꬃካ እ ቦላ ፃፋና።
13 ጌሻ አያናይ ዎሳ ኬꬃታስ ግያባ ስእያ ሀይꬅ ደእያ ኦንካ ስኦ።
ሎዶቀ ዎሳ ኬꬅ
14 “ሎዶቀ ዎሳ ኬꬃ ኪታንቹዋስ ሀይሳዳ ያጋዳ ፃፋ።
አምንእ ግድዳ አማነትዳ ቱማ ማርካይ፥ ፆሳ መተꬃ ሃረይስ ሀይሳዳ ያጌስ፦
15 ታኒ ነ ኦሱዋ ኡባ ኤራይስ፤ ኔኒ እርፃ ዎይኮ ምሻ ግዳካ፤ ኔኒ ናምኣፈ እሱዋ ግድኮ ሎኦ!
16 ኔኒ እርፃ ዎይኮ ምሻ ግዶናሽን፥ ቦልኦ ግድያ ግሾ ታ ነና ታ ዶናፐ ጩታና ሀናይስ።
17 ህዛ፥ ኔኒ፥ ‘ታኒ ዱረ፥ ሻሎራ ደአይስ፥ ታዉ አይብባይካ ፓጭቤና’ ያጋሳ። ሽን ኔኒ መቶታንቾ፥ ማንቆ፥ ቆቀነ ካሎትዳ አስ ግደይሳ ኤራካ።
18 ሄሳ ግሾ፥ ነ ዱረታናዉ ታማን ጌይዳ ዎርቃ፥ ነ ዬላ ካሉዋ ካማናዉ ቦꬃ ማኦነ ሎይꬃ ፄላናዉ ዳንዳእስያ አይፈ ꬋለ ታፐ ሻማና መላ ነና ታ ዞራይስ።
19 ታ ዶሰይሳ ሴራይስነ ሀንቃይስ፤ ህዛ ምና፤ ነ ናጋራፐ ስማ።
20 ሄኮ፥ ታ ካረን ኤቃዳ ፄጋይስ። ኦንካ ታ ፄሳ ስእድ፥ ዉላ ዶይኮ፥ እያኮ ገላና፤ እያራ እስፈ ካꬅ ማና፤ እካ ታራ እስፈ ማና።
21 ታ ፆናዳ ታ አዋራ እያ አራታን ኡትዳይሳዳ ፆንዳይ ታራ ታ አራታን ኡታና መላ ማታ እማና።
22 ጌሻ አያናይ ዎሳ ኬꬃታስ ግያባ ስእያ ሀይꬅ ደኤይ ኦንካ ስኦ” ያግስ።