11
1 ነኖ፥ ልባኖሰ፥
ታም ነ ዝጋታ ማና መላ፥
ነ ፐንገታ ዶያ!
2 ነኖ ፂዳዉ፥ ዝጋይ ኩንድዳ ግሾ፥
ቦንቾ ምꬃት ꬋይዳ ግሾ፥ ዪ ጋዳ ዬካ!
ህንተኖ ባሳና ዎላቶ፥
ሄ ስከትዳ ዎራይ ማንኤትዳ ግሾ፥ ዪ ግድ ዬክተ።
3 ኤንታ ሎኦ ሄንꬃ በሳይ ꬋይዳ ግሾ፥
ሄንꬃንቾታ ዘለልሳ ስእተ፤
ዮርዳኖሰ ዎራይ ꬋይዳ ግሾ፥
ጋሞት ጉደይሳ ስእተ።
ናምኡ ሄንꬃንቾታ
4 ጎዳይ ታ ፆሳይ ታኮ ሀይሳዳ ያግስ፦ “ሹከታናዉ ደእያ ዶርሳ ዉድያ ሄማ።
5 ኤንታ ሻመይሳት ሹኮሶና፤ ሽን ሴረቶኮና። ባይዘይሳት፥ ‘ኑኒ ዱረትዳ፤ ጎዳይ ጋላተቶ’ ያጎሶና፤ ሀር አቶሽን፥ ኤንታ ሄንꬃንቾት ኤንታዉ ቃቶኮና” ያግስ።
6 ጎዳይ ሀይሳዳ ያጌስ፦ “ታኒ ህዛፐ ጉየ ሀ ቢታን ደእያ አሳስ ቃትከ። ታኒ እስ እስ አሰ እያ ሾሩዋስነ እያ ካዋስ አꬃዳ እማና። ኤንቲ ቢታ ꬋይሳና፤ ታኒ እስ አስካ ኤንታ ኩሽያፐ አሽከ” ያጌስ።
7 ሄሳ ግሾ፥ ታኒ ሹከታናዉ ደእያ ዶርሳታ፥ አꬃዳ ቃስ ዉድያ ግዶን ኡንኤትዳይሳታ ሄመይሳ ግዳስ። ያታዳ ዶርሳታ ሄማናዉ ናምኡ ፃምአታ ኤካዳ፥ እሱዋ “ዶሰትዳይሳ” ጋዳ ፄጋስ፤ ናምአንꬁዋ “እስፈተꬅ” ጋዳ ፄጋስ።
8 ታኒ እስ አጌናን ሄꬑ ሄንꬃንቾታ ꬋይሳስ። ኤንታ ሀኖተꬃይ ታዉ ዳንዳኤተና፤ ኤንትካ ታና እፅዶሶና።
9 ያታ ስማዳ ታ ዶርሳታኮ፥ “ታኒ ህንተና ናምአንꬆ ሄምከ፤ ሀይቀይስ ሀይቆ፤ ꬋየይስ ꬋዮ፤ አትዳይሳት እሶይ እሱዋ ሞ” ያጋስ።
10 ሄሳፈ ጉየ ታኒ “ዶሰትዳይሳ” ጌተትያ ፃምአ ኤካዳ መንꬃስ። ሄሳ ታ ኦꬅዳይ ካዎተꬃታራ ገልዳ ጫቆይ ዱፅዳይሳ በሳናሳ።
11 ሄ ጋላስ ጫቆይ መእስ፤ ሄ ዎደ ዶርሰ ሻመይሳትነ ባይዛይሳት ታና በእድ፥ ሄስ ጎዳ ቃላ ግደይሳ ኤርዶሶና።
12 ታኒ፥ “ህንተ ዶስኮ ታ ዳሞዝያ እምተ፤ እፃስ ጊኮ አጋግተ” ያጋስ። ያትን ኤንቲ ታዉ ሀስታሙ ብራ ሳንትመ እምዶሶና።
13 ጎዳይ ታኮ፥ “ኤንቲ እምዳ ቦንቾ ሚሽያ ኤፋዳ ፆሳ ኬꬃን ደእያ ኦቱዋን የጋ” ያግስ። ታኒ ሄ ሚሽያ ኤፋዳ ፆሳ ኬꬃን ደእያ ኦቱዋን የጋስ።
14 ሄሳፈ ጉየ፥ ታኒ ይሁዳስነ እስራኤለስ ግዶን ደእያ እሻተꬃይ ꬋይዳይሳ በሳናዉ “እስፈተꬅ” ጌተትያ ታ ናምአንꬆ ፃምኣ መንꬃስ።
15 ቃስካ ጎዳይ ታና፥ “ናምአንꬆ ባዳ ፓꬆና ሄንꬃንቾታ ሚሽያ ኤካ።
16 ታኒ ሀ ቢታን እስ ሄንꬃንቾ ደንꬃና። እ ቆሄትዳ ዶርሳታ ማደና፤ ላለትዳ ዶርሳታ ሺሸና፤ መቅዳ ዶርሳታ ኮለና፤ ፓፃ ደኤይሳታ ሄመና። ሽን እ ሄሳ አግድ፥ ሞꬎታ ሹክድ ሜስ፤ ኤንታ ኮልዝያ ꬎጌስ።
17 ዶርሳ ዉድያ የግ ꬋይዳ ሄ ፓꬆና ሄንꬃንቾታ አየ! እያ ቀስያነ እያ ኡሻቻ አይፍያ ቦላ ማሽ ዎꬎ። እያ ኡሻቻ ኩሸይ ስሎ፤ እያ ኡሻቻ አይፈይ ቆቆ” ያግስ።