23
Xillo Aaca
1 “Ta hentha bessan de7iya dorsata dhaysiyanne laaliya henthanchota ayye!” yaagees Goday.
2 Goday, Isra7eele Xoossay, ba asaa heemmiya henthanchota haysada yaagees: “Hinte ta dorsata laallida gisho, gooddida gisho, naagiboonna gishonne hinte oothida hinte iita oosuwa gisho ta hintena seerana.
3 Ta wudiyape attidaysata ta kase laallida biitta ubbaafe ta huuphen shiishana. Enta guye enta hentha bessaa zaarana; enti yan yeletidi darana.
4 Enta loythidi heemmiya henthanchota entaw shuumana. Enti zaaridi yayyokona; dagammokona; entafe issoyka dhayenna” yaagees Goday.
5 “Dawita kochaafe xillo aaca denthana wodey yaana. I kawotethaa cincatethan aysana; biitta bolla suurenne xillo oothana.
6 Iya kawotetha wodiyan Yihudi attana; Isra7eeley saro daana. Iya sunthay, ‘Xoossay nu Xillotethaa’ geetetana” yaagees Goday.
7 Hessa gisho, “Asay, ‘Isra7eela asaa Gibxe biittafe kessida Goday eriya mela’ yaagidi caaqanaysa aggidi,
8 ‘Isra7eela kochaa pudeha bagga biittafenne enta laallida biitta ubbaafe ehida Goday eriya mela’ yaagidi caaqana wodey yaana. Hessafe guye, enti banta buzo biittan daana” yaagees Goday.
Wordo Nabeta
9 Nabetaba ta qopiya wode ta wozanay daaburees; ta meqethati kokoroosona. Godaa gishonne iya geeshsha qaala gisho woyney xoonin mathotida asi gidas.
10 Biittay laymatethan kumis. Qangetha gisho, biittay yeekees; bazzo hentha bessati melidosona. Nabeti iita ogen hemetoosona; banta maata like gidonna ogen go7etoosona.
11 “Nabetinne kahineti tunidosona; hari attoshin ta keethan enti oothiya iitaa ta be7as” yaagees Goday.
12 “Hessa gisho, enta ogey hallixana; enti dhuman yegetana, dhubetidi kundana. Enti seeretiya wode enta bolla gado ehana” yaagees Goday.
13 “Samaare nabeta giddon iitabaa be7as. Enti Ba7aale sunthan tinbite odoosona; ta asaa Isra7eele balethoosona.
14 Qassi Yerusalaame nabeta giddonka haythas deexiyaba be7as. Enti laymatoosona; wordotidi de7oosona. Oonika ba iita oosuwape simmonna mela enti iitaa ootheyisata minthethoosona. Enti ubbay taw Soodoma mela; Yerusalaame asay Gamoora mela” yaagees Goday.
15 Hessa gisho, Ubbaafe Wolqaama Goday nabetaba haysada yaagees: “Yerusalaame nabeta doonape tunabay keyidi, biitta ubban laaletida gisho, ta enta cammiya kathi muzana; enta wodhiya haathi ushshana” yaagees.
16 “Nabeti odiyaba si7opite; enti hanonna ufaysan kunthoosona. Goday odonnashin enti bantafe medhi kessidi qoncethi odoosona.
17 Tana kadheysatako, ‘Hinte saro daana’ yaagosona; qassi banta wozana iitatethaa kaalleysatako, ‘Hintena iitabay gakenna’ yaagosona” yaagees Ubbaafe Wolqaama Goday.
18 “Shin be7anaw woyko iya qaala si7anaw Goday zoriya bessan entafe oone eqiday? Iya qaala si7iday oonee?
19 Godaa gotey hanqon dendana; wolqaama hobbey iitata huuphiya shocana.
20 Ba wozanaa qofaa polonna de7ishe, Godaa hanqoy simmenna. Wursetha wodiyan haysa hinte akeekana.
21 Ta ha nabeta kiittabike; shin enti banta kiita ekidi woxoosona. Ta entaw odabike; shin enti tinbite odoosona.
22 Enti ta zoriya bessan eqidabaa gidiyako, ta qaala, ta asaas odanashin. Enti iita ogiyapenne enta iita oosuwape zaaranashin” yaagees Goday.
23 “Ta mata xalaala Xoossee? Haaho Xoossi gidikina?
24 Ta be7onnaada, asi geema bessan bana qosanaw danda7ii? Saloninne sa7an kumiday tana gidikina?” yaagees Goday.
25 “Ta sunthan wordo tinbite odeysati giyaba si7as. Enti, ‘Ta amuho be7as; ta amuho be7as’ yaagosona.
26 Ha nabeti bantaw medhidi kessidi odiya wordo tinbitey enta wozanan awude gakanaw gam7anee?
27 Enta aawati Ba7aale eeqa goyinnidi ta sunthaa dogidaysada, enti issoy issuwas odiya amuhuwan, ta asay ta sunthaa dogana mela oothanaw qopoosona.
28 Amuho amuhiya nabey ba amuhuwa odo; shin ta qaala si7iya nabey ta qaala ammanetidi odo. Dalinne gistey awun gahetii?
29 Ta qaalay tama mela gidennee? Zaalla mentherethiya naariqa mela gidennee?” yaagees Goday.
30 “Hessa gisho, ta qaala issoy issuwafe kaysotidi taape ekida daanisidi tinbite odiya nabeta ta ixayis.
31 Hessadaka, banta wozanaa qofaa odishe, ‘Goday yaagees’ giya nabetaka taani ixayis.
32 Wordo amuhishe tinbite odiya nabeta bolla ta dendana. Enti banta amuhuwan katidi tinbite odiya nabeta taani ixayis. Ta enta kiittonnashin woyko shuumonnashin wordo tinbite odoosona; ta asaa balethoosona. Enti ha asaa aykoka maaddokona” yaagees Goday.
Godaa Kiita
33 “Goday taako, ‘Ha asay woyko nabey woyko kahiney, Godaa kiitay aybee?’ gidi oychiko, ne entako, ‘Goday, ta hintena holana’ yaagees” gada oda.
34 “Nabey woyko kahiney woyko asay, ‘Haysi Godaa kiita’ yaagidi odiko, ta he addiyanne iya soo asaa seerana.
35 Hessa aggidi issoy issoy, ‘Goday woygidee? woyko Goday ay odidee?’ yaagidi ba laggetanne ba dabbota oychanaw bessees.
36 Hizape oonika, ‘Godaa kiita’ yaagidi zaaridi odetanaw bessenna. Hessa gisho, iya doonape keyiya qaalay iyaw kiita gidiya gisho, de7o Xoossaa, Ubbaafe Wolqaama Godaa, nu Xoossaa qaala hinte mirqeeta.
37 Neeni nabetako, ‘Goday hintena woygidee?’ woyko ‘Ay odidee?’ yaagada oychanaw bessees.
38 Shin hinte, ‘Haysi Godaa kiita’ giiko, Goday haysada yaagees: taani hintena, ‘Haysi Godaa kiita goopite’ yaaginka hinte, ‘Haysi Godaa kiita’ gideta.
39 Hessa gisho, ta hintena dogana; hintenanne hinte aawatas immida katamaa kumethi ta sinthafe diggana.
40 Ta hinte bolla merinaa kawushanne dogetonna yeella ehana” yaagees Goday.